ՄԵՐ ԿԵԱՆՔԻ ԸՆԹԱՑՔԸ

Բնութեան օրէնքների համաձայն, ծնւում ենք եւ աշխարհ ենք գալիս ակամայ ու անգիտակից, որպէս մեկնարկը մեր սահմանափակ կեանքի, որի սկզբնական ժամանակահատւածի ընթացքում ամբողջութեամբ յանձնւած ենք լինում մեր ծնողների կամ խնամակալների հոգածութեանն ու գուրգուրանքին:

Տարիների թաւալմանը զուգընթաց, մեր բանականութիւնը հետզհետէ աճում է եւ զարգանում աստիճանաբար, ոչ միայն մեզ աւելի եւ աւելի գիտակից ու կամքի տէր դարձնելով մեր գործերին, այլեւ պատասխանատու՝ մեր կեանքին: Սոյն զարգացման կամ հասունացման ընթացքը կարող է աննշմար թւալ օրին, սակայն տարիներ անց, երբ յետադարձ ակնարկով մերթ ընդ մերթ ետ ենք նայում՝ իր փուլերով պարզորոշ է դառնում մեր կեանքի անցած ճանապարհը:

Այս պատկերացումը կեանքի փափագելի ու օրինակելի ընթացքներից մէկն է նկատւում յաճախ, սակայն միակը չէ: Իւրաքանչիւրիս կեանքի մէջ, անպայման, պատահական խաչաձեւումներ ու անխուսափելի անակնկալներ են պատահում, որոնք կարող են վատ անդրադարձ ունենալ մեր կեանքի վրայ կամ նոյնիսկ շեղել նրա բնականոն ընթացքը:

Նմանօրինակ մի պարագայ էր 2019 թւականի աւարտին ծնունդ առած եւ մօտ երեք տարի շարունակ աշխարհն ու մեր կեանքը անդամալուծած «COVID 19» յորջորջւած «Թագաժահր»-ը, որին իր կարելի բոլոր միջոցներով փորձեց դէմ կանգնել ամբողջ մարդկութիւնն ու գիտա-բժշկական ոլորտը:

Այսօր շատերն ունեն այն համոզումն ու ներքին զգացումը, թէ՝ ականատեսն ենք ցարդ վերջին համաճարակի մայրամուտի, որին յաղթահարելուց յետոյ կարող ենք վերադառնալ մեր բնականոն ու հեզասահ կեանքին, սակայն ներկայ ժամանակի մերօրեայ պայմաններն ու պարագաները, իրենց անակնկալ խաչաձեւումներով, մեզ մատնում են շփոթի եւ անորոշութեան:

Համաճարակ, սով, մահ, երկրաշարժ ու պատերազմ նորութիւններ չեն աշխարհիս երեսին, սակայն ժամանակի գլորման հետ նրանց բազմանալը, ծաւալելն ու ընդարձակւելը լրջօրէն մտահոգելուց այն կողմ, սկսել են ոչ միայն մեր կեանքի ընթացքը խառնակել, այլեւ մեր ապագայի ծրագրերը խանգարել:

Այս բոլորին ի տես, մարդ արարածը կարող է վհատւել, որի պարագային պէտք չէ նրան ո՛չ մեղադրել եւ ո՛չ էլ դատապարտել, որովհետեւ այդ երեւոյթը մարդկային տկարութեան բնական դրսեւորումն է. սակայն պարագան նոյնը չէ՛ երբ անհատը մի քրիստոնեայ է, քանզի իսկական քրիստոնեային թոյլատրելի չէ՛ վհատւելը, այլ վայել է միայն հաւատքով ու յոյսով վերազինւել:

«COVID 19 Թագաժահր»-ը մեր մօտալուտ ապագայի երազները անշնչացնելուց աւելի, կարծէք մեզ մղեց անձնատուր լինել խոր քնի, որից ուշքի գալու համար հարկաւոր է լուրջ ծրագրաւորում, բայց մանաւանդ հաւատք ու յոյս՝ յաղթահարելու մեր թմրութիւնը եւ կազդուրմամբ վերադառնալու մեր նախկին իրավիճակին:

Քնաթաթախ մարդն երբ ուզի ճիշտ պահին սթափւել, կարիքն ունի զարթուցիչ ժամացոյցի, որի դերակատարութիւնն աւելի ճշգրիտ եւ ազդեցիկ է մանաւանդ ներկայ օրերին: Նրանց արդիականացւած տեսակն իր մէջ պարունակում է իւրայատուկ ծրագրերից նաեւ SNOOZE (կարճատեւ քուն կամ նիրհ) առաւելութիւնը, որին մատի մի հպումով առիթ է ընծայւում մի քանի րոպէ աւելի վայելել կիսատ քնի հրապուրիչ քաղցրութիւնը:

Մերօրեայ ընթացքը կարծէք մեզ յուշում է նոյն վիճակը. եռամեայ վտանգաւոր նիրհից զարթնելու համար մենք եւս կարիքն ունենք զարթուցիչ անձերի կամ առիթների: Պատեհ առիթներ կամ բարեսէր անձինք կարող են անպակաս լինել մեր շրջապատի մէջ, սակայն վտանգը նիրհելու գայթակղեցուցիչ շարունակութեան մէջ է կայանում: Մատի մի հպման նման անգիտակից երկարաձգումը կարող է առաջնորդել երկրորդին ու երրորդին, որոնց կրկնութիւնը մեզ ի վերջոյ անխուսափելիօրէն յանգեցնելու է կործանման:

Ըստ մարդկային սովորութեան, նորանոր երազներով փորձում ենք դիմաւորել իւրաքանչիւր տարեմուտ: Պատրաստւում ենք ոչ միայն նորոգել մեր անաւարտ ծրագրերը, այլեւ թարմացնել մեր ապագայի տեսլականները: Հասունացման հիման վրայ հաշւեյարդար ենք կատարում մեր անձերի հետ, որպէսզի սրբագրւած նոր եռանդով վերսկսենք մեր կեանքի երթը:

Նոր Տարին լաւագոյն առիթներից մէկն է, որպէսզի չյանձնւենք անտարբերութեան, ծուլութեան, յուսալքման կամ թերահաւատութեան, որոնց հետեւանքով զարթնումի փոխարէն թմբիրը կը շարունակւի, մինչ նինջը կարող է մեզ առաջնորդել հոգեւոր ներաշխարհի մահաքնի: Ուստի դարձեալ մեզ վրայ վերցնենք հոգեւոր զէնքերը, գօտեպնդւենք վերանորոգ հաւատքով ու յոյսով, ծանրախոհ կերպով ծրագրենք մեր յառաջիկայ տարիների իդէալ գաղափարներն ու երազանքները, ծնունդ տանք լուսաւոր ու բարգաւաճ տեսլականների, որպէսզի աստւածահաճոյ կեանքով ձգտենք բարեգործութեան եւ քրիստոնէավայել մտքով, սրտով ու հոգով շնորհաւորենք իրար՝ ասելով. «Շնորհաւոր Նոր Տարի, Տարին Լինի Միշտ Բարի»: