Աղբիւր՝ www.alikonline.ir

 

Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Ա Վեհափառ Հայրապետը ընկերակցութեամբ Թեհրանի, Սպահանի եւ Ատրպատականի հայոց թեմերի հոգեւոր առաջնորդների եւ «Ալիք» հաստատութեան ներկայացուցչի՝ այցելեց, Իսլ. մշակոյթի եւ հաղորդակցութեան կազմակերպութիւն եւ դիմաւորւեց նոյն կազմակերպութեան նախագահ դոկտ. Աբուզար Էբրահիմիի եւ պատկան պատասխանատուների, ինչպէս՝ դոկտ. Հելմի կողմից:

Հանդիպման սկզբում դոկտ. Էբրահիմին ողջունելով Վեհափառ Հայրապետի Իրան կատարած այցը, գովեստով արտայայտւեց իրանահայ համայնքի Իրանում ունեցած եւ շարունակւող ներդրումների մասին:

Նա նաեւ կարեւորութեամբ անդրադարձաւ կրօնների երկխօսութեան անհրաժեշտութեանը եւ ընդգծեց այդ երկխօութեան յարատեւումը: Դոկտ. Էբրահիմին յատուկ ընդգծեց Թ. Հ. թեմի առաջնորդ Տ. Սեպուհ արք. Սարգսեանի անժխտելի դերը համագործակցութիւնների է՛լ աւելի ընդլայնման հարցով եւ կարեւորեց տարածաշրջանային հարցերով Մեծի Տանն Կիլիկիոյ քաղաքական դիրքորոշումները, որոնք համընկնում են Իրանի դիրքորոշումներին:

Հանդիպման ընթացքում Վեհափառ Հայրապետը կարեւորութեամբ անդրադարձաւ կազմակերպութեան ծաւալած աշխատանքներին: Վեհափառ Հայրապետը Իրան կատարած իր հերթական այցը, ինչպէս միշտ համարեց արդիւնաւէտ ու դրական, եւ ասաց. «Ամէն անգամ, որ հոս եկած ենք, մեր համայնքին այցելելու, նաեւ այցելած ենք այս կենտրոնը, որովհետեւ մենք հաւատում ենք այս կենտրոնի ճամբով կատարւող գործին ու տարիներ առաջ սկսեցինք այս երկխօսութիւնը եւ Սեպուհ Սրբազանը այս ուղղութեամբ կարեւոր աշխատանք է ծաւալել»:

Վեհափառ Հայրապետը աւելացրեց. «Մենք ոչ միայն այս կենտրոնի հետ ենք երկխօսութեան մէջ, այլ նաեւ այս կենտրոնի կատարած աշխատանքների դեսպաններն ենք արտաքին աշխարհին մէջ: Մենք ոչ միայն երկխօսութիւն կը կատարենք այստեղ, այլ նաեւ այդ երկխօսութիւնը մենք թարգմանած ենք մեր համակեցութեամբ, այլ գործակցութեամբ: Այսօր արտաքին աշխարհի մէջ պէտք է տիպարը դառնանք երկխօսութեան համակեցութեան ու գործակցութեան»:

Կայացած հանդիպման ընթացքում խօսւեց առաջիկայում Անթիլիասում անցկացւող Կրօնների երկխօսութեան համագումարի ժամանակ շօշափւող թեմաների ու թւականի մասին: