Աղբիւր՝ www.hyeli.com
«Ցեղասպանութեան 100-ամեակի սեմին կանգնած իրանահայ համայնքը» մտքերի փոխանակման նախագծի վերաբերեալ Թեհրանի Հայ դատի յանձնախումբը՝ «ՀՈՒՍԿ» հաստատութիւնը, հանդէս է եկել յայատարարութեամբ, այս մասին գրում է «Ալիք» օրաթերթը:
Յայտարարութեան մէջ ասւում է.
Հայոց Ցեղասպանութեան 100-ամեակը պահանջում է համահայկական համախմբւածութիւն, ուժերի գերլարում ու առաւել նպատակաուղղւած ու կազմակերպւած աշխատանք:
Այդ գործում մեծ դեր ունեն հայութեան բոլոր հատւածները՝ անկախ բնակութեան վայրից, քաղաքական հայեացքներից, տնտեսական հնարաւորութիւններից, դաւանանքից, սեռից ու տարիքից:
Հայոց երկու պետականութիւնները եւ Սփիւռքի տարբեր հատւածները՝ բոլորը միասին եւ նաեւ առանձին-առանձին, կոչւած են իրականացնելու ե՛ւ միասնական, ե՛ւ տարանջատ ծրագրեր, որով օգտւելով 100-ամեակի նշանակութիւնից՝ հնարաւոր կը լինի առաջ մղել Հայոց Ցեղասպանութեան ճանաչման անհրաժեշտութիւնն ու պահանջատիրութիւնը:
Եթէ Հայաստանի ու Արցախի համար այդ պայքարը առաւել քան քաղաքական է, ապա Սփիւռքի համար այն աւելի բազմաոլորտ է: Սփիւռքի իւրաքանչիւր համայնքի իւրաքանչիւր անդամ, դարձեալ անկախ իր հնարաւորութիւններից, Հայոց Ցեղասպանութեան մասին տեղեկութիւններ տարածող է: Իրանի դէպքում եւս, տարբեր բնագաւառներում ընդգրկւած, տարբեր քաղաքներում բնակւող եւ հասարակական տարբեր խմբերի հետ շփման մէջ եղող իւրաքանչիւր իրանահայ 100-ամեակի խօսնակն է:
Վերը նշւածը վերաիմաստաւորւելու ե՛ւ մշակութային, մարզական, դպրոցական, համալսարանական ու տեղեկատւական բնագաւառներում աշխատող անձանց, ինչպէս նաեւ երիտասարդութեան կարծիքը այս ուղղութեամբ մինչ այժմ կատարւած փորձերի, ձեռք բերւած փորձառութիւնների, հնարաւորութիւնների, կարիքների ու մեր անելիքների մասին լսելու եւ դրանք քննարկելու նպատակով՝ 2014 թ. մայիսի 15-ին եւ 16-ին Թեհրանի Հայ Դատի յանձնախմբի կողմից կազմակերպւած «Ցեղասպանութեան 100-ամեակի սեմին կանգնած իրանահայ համայնքը» զրոյց-քննարկման տարբեր բաժիններում ներկայացւած հարցերը եւ դրանք քննարկող մասնակիցները հաստատում են, որ.
- Հայոց Ցեղասպանութիւնը եւ դրա քաղաքական, տնտեսական, մշակութային, հասարակական հետեւանքներն ու ազդեցութիւնը հայութեան համար մեր ինքնութեան անբաժան մասն են եւ անկախ դրա հետ հաշտւելու կամ չմերւելու մեր ցանկութիւնից ու փորձերից, այդ հարցին ու մեր պահանջատիրութեանը սպասւող ամէն զարգացում շարունակելու է հաւասարապէս ազդել ամէն մի հայի կեանքի ու գործունէութեան վրայ:
- Նոր սերունդին պէտք է սնել ու դաստիարակել Ցեղասպանութեան մասին ճշգրիտ եւ օգտակար տեղեկութիւններով՝ հաշւի առնելով իւրաքանչիւր սերունդի հոգեբանութիւնը, ժամանակի պայմանները եւ պահանջները:
- Մասնագիտական-աշխատանքային ոլորտները յատկապէս, լաւագոյն առիթ են ցեղասպանութեան մասին խօսելու, տեղեկութիւններ փոխանցելու եւ հնարաւորութեան դէպքում աւելի իրական քայլեր ձեռնարկելու համար:
- Չնայած քաղաքական, տնտեսական, մշակութային, իրաւական ու հասարակական խնդիրներին ու սահմանափակումներին՝ անհրաժեշտ է փորձեր կատարել Հայոց Ցեղասպանութեան մասին տեղեկութիւնները մասնագիտական ոլորտներում եւ նաեւ լայն հանրութեան մէջ տարածելու եւ եթէ նման հնարաւորութիւն ծագի, նաեւ պետական մակարդակով Հայոց Ցեղասպանութեան փաստը տեղեկացնելու համար: