Աղբիւր՝ www.yerkir.am
The New York Times թերթին տւած հարցազրոյցում Հ.Հ.-ի նախագահ Սերժ Սարգսեանը, պատասխանելով լրագրողի հարցին, թէ Հայոց ցեղասպանութեան 100-ամեայ տարելիցին ընդառաջ Ա.Մ.Ն.-ի հասարակութիւնն այդ իրադարձութիւնների կապակցությամբ ի՞նչ հետեւութիւն պէտք է անի, ասել է. «Նոյնիսկ այսօր է մարդկութիւնը նման սարսափելի յանցագործութիւնների ականատես լինում: Պատմութիւնը կը շարունակի կրկնւել, քանի դեռ անցեալի յանցագործութիւնները չեն ստացել միանշանակ գնահատական: Այսօր մենք՝ որպէս ցեղասպանութիւն վերապրած ժողովուրդ, որոշակիօրէն պարտաւորւած ենք զգում, քանի որ իւրայատուկ առաքելութիւն ենք կրում՝ ցեղասպանութիւնների յետագայ կրկնութիւնը կանխելու համար: Այդ իսկ պատճառով մենք ձգտում ենք, որպէսզի անցեալի յանցագործութիւնները ճանաչւեն եւ դատապարտւեն:
Մենք հաւատում ենք, որ ողջ մարդկութիւնը պէտք է հետեւողական լինի այս յանցագործութիւնների ճանաչման, դատապարտման, ժխտողականութեան ու բացառման հարցում: Սա է մեր ուղերձը միջազգային հանրութեանը, այդ թւում` Միացեալ նահանգների կառավաւրութեանն ու հասարակութեանը Հայոց ցեղասպանութեան հարիւրամեայ տարելիցի նախօրէին: Հայոց ցեղասպանութիւնն անվիճելի փաստ է՝ միջազգային հանրութեան կողմից փաստաթղթաւորւած, որը Օսմանեան կայսրութեան իրագործած զանգւածային կոտորածներից փրկւած հարիւրհազարաւոր հայերի ապաստան էր տրամադրում: Այսօր նոյնիսկ թուրքական հասարակութեան կրթւած շրջանակներն են հաշտւել իրենց անցեալի հետ՝ ի հեճուկս իրենց պետութեան պաշտօնական ժխտողական դիրքորոշման:
Քանի որ միջազգային հանրութեան համար մարդու իրաւունքներն ու հիմնարար ազատութիւնները դառնում են բացարձակ արժէքներ, Հայոց ցեղասպանութեան ճանաչումը քաղաքական շահերին ենթակայ դարձնելը հակասում է ժամանակակից աշխարհակարգի բարոյական եւ իրաւական նորմերին: Ա.Մ.Ն.-ի ուժը նոյնպէս պայմանաւորւած է այդ բացարձակ արժէքներին հաւատարմութեամբ: Ա.Մ.Ն.-ի օրէնսդիր մարմինը Հայոց ցեղասպանութիւնը ճանաչող ութ բանաձեւ է ընդունել: Ա.Մ.Ն.-ի 40 նահանգներում այդ բանաձեւը պաշտօնապէս ճանաչւել է: 1980-ականներին Ռէյգանի վարչակազմը ճանաչել եւ դատապարտել է Հայոց ցեղասպանութիւնը: Վաղ թէ ուշ Թուրքիան ստիպւած կը լինի առերերսւել սեփական անցեալի հետ եւ կազատագրւի՝ արդարութեան վերականգնմամբ»: