Աղբիւր՝ www.aztagdaily.com
Յունաստանի խորհրդարանը յետաձգել է ցեղասպանութեան ժխտումը քրէականացնող օրինագծի քննարկման հարցը: Յունաստանի Արդարադատութեան նախարար Հարալամպոս Աթանասիուի նախաձեռնութեամբ մշակւած օրինագծի քննարկումը դուրս է եկել խորհրդարանի այս շաբաթւայ օրակարգից` այն պատճառաբանութեամբ, որ գոյութիւն ունեն թեքնիք մի շարք խնդիրներ, որոնց հարթելուց յետոյ միայն կարելի է օրինագիծը ներկայացնել երեսփոխանների դատին:
«Ազատ օր»-ի գլխաւոր խմբագիր Հռիփսիմէ Յարութիւնեանը «Արմէնփրես»-ին յայտնել է, որ ամենայն հաւանականութեամբ օրինագիծը մէկ շաբաթից քննարկման է դրւելու:
Նախատեսւել էր, որ Յունաստանի վարչապետն ու փոխվարչապետը երէկ հանդիպում ունենալով քննարկեն օրինագիծը եւ փորձեն հասկանալ տարակարծութիւնների պատճառը, մեղմացնեն նրանք եւ օրինագծի բարեփոխւած տարբերակը քննարկման համար ներկայացնեն խորհրդարանին:
Յարութիւննեանը հաղորդել է, որ այս հարցում շատ գործունեայ է նաեւ Յունաստանի հայ համայնքը: Տակաւին օրինագծի ներկայացումից 7 ամիս առաջ համայնքի ներկայացուցիչները բազմաթիւ հանդիպումներ են ունեցել խորհրդարանում ընդգրկւած բոլոր քաղաքական ուժերի ներկայացուցիչների հետ եւ քննարկումներ կատարել: «Բազմաթիւ երեսփոխաններ դրական վերաբերմունք ունեն եւ կարծում են, որ ինչպէս հրէական ցեղասպանութեան, նոյնպէս էլ հայերի եւ Պոնտոսի յոյների ցեղասպանութեան ժխտումը պէտք է քրէականացւի: Վերջին պահին Արդարադատութեան նախարարը օրինագծի քննարկումը յետաձգեց` պատճառաբանելով, որ խօսքի ազատութեան եւ սահմանափակման առնչութեամբ հնչել են մի շարք տարակարծութիւններ, եւ այդ խոչընդոտներից յետոյ միայն օրինագիծը կը քննարկւի»,- ասաց Յարութիւնեանը` աւելացնելով, որ հայ համայնքը լուրջ աշխատանք է կատարում` հիմնւելով այն փաստի վրայ, որ Յունաստանի խորհրդարանը 1996-ին ճանաչել եւ դատապարտել է Հայոց ցեղասպանութիւնը եւ 24 Ապրիլն ընդունել է իբրեւ յիշատակի օր:
«Իւրաքանչիւր տարւայ 24 ապրիլին Յունաստանի կառավարութեան նախաձեռնութեամբ երկրի երեք մեծ քաղաքներում կազմակերպւում են յիշատակի ոգեկոչման արարողութիւններ: Հետեւաբար, այս բոլորը հաշւի առնելով, պէտք է նաեւ քրէականացւի ցեղասպանութեան ժխտումը, ինչպէս դա կատարւում է Ողջակիզումի պարագային»,- ասել է Յարութիւնեանը` աւելացնելով, որ համայնքում լիայոյս են, որ արդարութիւնն ու բարոյականութիւնը պէտք է յաղթանակեն, եւ մէկ շաբաթից խորհրդարանականները պէտք է որդեգրեն օրինագիծը: Յարութիւնեանը նշել է, որ համայնքն ուշադրութեամբ հետեւում է բոլոր զարգացումներին եւ անմիջապէս արձագանգում:
22 օգոստոսին Յունաստանի խորհրդարանի օրակարգի վրայ բերւել էր ցեղասպանութեան հերքումը քրէականացնող օրէնքի նախագիծը: Յունաստանի Արդարադատութեան նախարար Հարալամպոս Աթանասիու յայտարարել էր, որ «Այլատեացութեան դէմ» օրէնքի մէջ աւելացւել է Պոնտոսի յոյների, հայերի եւ Փոքր Ասիայի ցեղասպանութիւնների հերքումը քրէականացնելու վերաբերեալ յօդւած:
«Օրինագծի վերջնական տարբերակի համաձայն, Յունաստանի խորհրդարանի կողմից ճանաչւած ցեղասպանութիւնների հերքումը յանցագործութիւն է նկատւելու: Բացի դրանից, քրէականացւելու է նաեւ յունական եւ միջազգային դատարանների վճիռներով որդեգրւած ցեղասպանութիւնների հերքումը»,- ասել է նախարարը: