Աղբիւր՝ www.mindiaspora.am
Ապրիլի 18-ին Երեւանի Պատմութեան թանգարանում Հ.Հ. Սփիւռքի նախարարութեան նախաձեռնութեամբ կայացաւ ջաւախահայ նկարիչների աշխատանքների ցուցահանդէսի բացման արարողութիւնը, որին ներկայ էին մշակոյթի գործիչներ, պետական, հասարակական կազմակերպութիւնների ղեկավարներ, հիւրեր:
Ողջունելով ներկաներին՝ Հ.Հ. Սփիւռքի նախարարի պաշտօնակատար Հրանուշ Յակոբեանը շնորհաւորեց ջաւախահայերին հերթական մշակութային գեղեցիկ ձեռնարկի կազմակերպման առիթով եւ յաւելեց. «Մօտենում է 100-րդ տարին, բայց ժողովրդի պայքարը չի դադարում: Աշխարհի հայութիւնը՝ Հայրենիքի, Արցախի, Ջաւախքի, Սփիւռքի հայերը ձեռք-ձեռքի տւած պայքարում են Ցեղասպանութեան ճանաչման, Հայ դատի, արդարութեան վերականգնման համար: Այդ պայքարի ձեւերից մէկն էլ մշակոյթն է, որի միջոցով մեր դատը ներկայացնում ենք աշխարհին: Մշակոյթն այն ուժն է, որ կարողանում է սօսնձել, իրար միացնել անցեալը, ներկան եւ ապագան»:
Ողջոյնի խօսքով հանդէս եկաւ նաեւ Հայաստանի նկարիչների միութեան նախագահ Կարէն Աղամեանը:
Վրաստանի վաստակաւոր նկարիչ Կառլեն Կարապետեանը շնորհակալութիւն հայտնեց Հ.Հ. Սփիւռքի նախարարութեանը, Երեւանի քաղաքապետարանին, Ջաւախքի աջակցութեան հիմնադրամին (Ջ.Ա.Հ.) ցուցահանդէսի կազմակերպմանն աջակցելու համար. «Այսօրւայ ցուցադրութիւնը մեզ համար մեծ ուրախութիւն եւ յաջողութիւն է, շնորհակալութիւն բոլոր աջակցողներին: Մէկ անգամ եւս հաւաստւեց, որ Ջաւախքի ժողովուրդը նաեւ մեծ արւեստ ունի: Մենք ցուցադրւել ենք ոչ միայն Հայաստանում եւ Վրաստանում, այլեւ Ա.Մ.Ն.-ում եւ Կանադայում: Դիտելով մեր աշխատանքները՝ դուք կզգաք մեր ուրախութիւնը եւ ցաւը»:
Հ.Հ. Սփիւռքի նախարարի պաշտօնակատար Հրանուշ Յակոբեանը հայ մշակոյթի զարգացման եւ տարածման գործում ունեցած նշանակալի աւանդի համար Կառլեն Կարապետեանին պարգեւատրեց «Արշիլ Գորկի» մեդալով:
Ելոյթ ունեցան նաեւ բարերար, գործարար, Ջաւախքի աջակցութեան հիմնադրամի համահիմնադիր Սօս Սահակեանը, Հայկական հանրագիտարանի գլխաւոր խմբագիր Հրաչ Այւազեանը, Հ.Հ. Գ.Ա.Ա. պատմութեան ինստիտուտի տնօրէն Աշոտ Մելքոնեանը, Ջաւախահայերի հայրենակցական միութեան նախագահ Շիրակ Թորոսեանը, «Վիրահայերի միասնութիւն» Հ.Կ.-ի նախագահ, Հ.Հ. Ա.Ժ. պատգամաւոր Տաճատ Վարդապետեանը: Երեւանի 131 դպրոցի տնօրէն, «Սայաթ Նովա» աշուղական անսամբլի մեներգիչ Գրիգոր Սաֆարեանը կատարեց Ջիւանու «Առաւօտեան քաղցր հովին» ստեղծագործութիւնը:
«Ցեղասպանութեան 100-ամեայ տարելիցին ընդառաջ» խորագրով ցուցահանդէսին իրենց աշխատանքներն են ներկայացրել քանդակագործներ Սերգօ Սահակեանը՝ «Պատրանք», «Աշուն», «Մարդ էլ կա, մարդ էլ», «Փրկութիւն», «Աշխարհայեացք», Ռաֆիկ Սարգսեանը «Պարոյր Սեւակ», Նարեկացի, Բաղդասար Սարգսեանը՝ «Ծովինար», «Հայելու առջեւ» ստեղծագործութիւններով:
Ցուցահանդէսում առանձնայատուկ ուշադրութեան արժանացան Կառլեն Կարապետեանի՝ Ցեղասպանութեանը նւիրւած շարքը՝ «Եղեռն-եռապատկերը», եւ «Մօր դիմանկարը», «Հայեացքը», «Արեւի աղջիկը» կտաւները:
Ուշագրաւ էին նաեւ Համլետ Արոեանի, Մնացական Դալլաքեանի, Հայկազուն Ղարագուլեանի՝ Ջաւախքի թեմաներով բնապատկերները, դիմանկարներն ու նատիւրմորտները:
Ցուցահանդէսը կը գործի ապրիլի 18-23-ը: