Աղբիւր՝ www.armenian.irib.ir
ՀՀ ԱԳՆ Էդուարդ Նալբանդեանը ողջունել է Վիեննայում 5+1 եւ Իրանի միջեւ ձեռք բերուած համաձայնութիւնը` Իրանի միջուկային ծրագրի շուրջ եւ այն անուանել կարեւոր ձեռքբերում: Հայաստանը ողջունում է Իրանի եւ միջազգային միջնորդների նպատակասլաց, կառուցողական ջանքերի արդիւնքում իրանական միջուկային ծրագրի շուրջ ձեռք բերուած համաձայնութիւնը։ Երկար սպասուած այս պայմանաւորուածութիւնը կարեւոր ձեռքբերում է՝ ի նպաստ միջազգային, տարածաշրջանային կայունութեան եւ համագործակցութեան ամրապնդման։ Լիայոյս ենք, որ դա յաւելեալ խթան կը հանդիսանայ՝ Հայաստանի եւ բարեկամ Իրանի միջեւ առեւտրատնտեսական համագործակցութեան ընդլայնման, համատեղ ծրագրերի իրականացման համար, յայտարարել է Էդուարդ Նալբանդեանը:
Վիեննայում աւարտուած քննարկումները եղել են արդիւնաւէտ: Շուրջ երկու տարի ընթացող բանակցութիւնների արդիւնքում հնարաւոր է եղել համաձայնութեան հասնել 5+1 եւ Իրանի միջեւ, ինչը միջազգային վերլուծաբաններն ու ԶԼՄ-ները բնութագրում են պատմական: