Աղբիւր՝ www.armenianchurch.org
Յունիսի 5-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Իրանի Իսլամական Հանրապետութեան հոգեւոր առաջնորդի` ուխտագնացութիւնների հարցով ներկայացուցիչ Սէյեդ Ալի Ղազի Ասգեարին՝ ուղեկցութեամբ ՀՀ-ում Իրանի Իսլամական Հանրապետութեան արտակարգ եւ լիազօր դեսպան Մոհամմադ Ռեյիսիի:
Ողջունելով Իրանի հոգեւոր առաջնորդի ներկայացուցչի այցը Մայր Աթոռ Սուրբ Էջմիածին՝ Վեհափառ Հայրապետը գոհունակութեամբ անդրադարձաւ երկու ժողովուրդների պատմական կապերին` մասնաւորապէս ընդգծելով հարեւան երկրների միջեւ ձեւաւորուած բարեկամութեան ու փոխյարաբերութիւնների առաւել ամրապնդման անհրաժեշտութիւնը: Նորին Սրբութիւնը գնահատանքով խօսեց նաեւ մշակութային եւ հոգեւոր կրթական ծրագրերի իրականացման գործում Մայր Աթոռի եւ ԻԻՀ դեսպանատան միջեւ առկայ սերտ համագործակցութեան մասին:
Իր հերթին Իրանի հոգեւոր առաջնորդի ներկայացուցիչը շնորհակալութիւն յայտնեց Նորին Սրբութեանը հանդիպման համար եւ փաստեց, որ երկու երկրների միջեւ կրօնական, քաղաքական եւ տնտեսական ոլորտներում առկայ են ջերմ ու օրինակելի յարաբերութիւններ, որոնք տարէց տարի առաւել զարգանում են: Սէյեդ Ալի Ղազի Ասգեարը գնահատանքով նշեց նաեւ երկրի կեանքի տարբեր ոլորտներում Իրանի հայ համայնքի ունեցած արժէքաւոր դերակատարութեան մասին:
Զրոյցի ընթացքում Ամենայն Հայոց Կաթողիկոսն ու Իրանի հոգեւոր առաջնորդի ներկայացուցիչը մտահոգութեամբ անդրադարձան ներկայիս մարտահրաւէրներին` համաշխարհայնացման գործընթացին, հոգեւոր-բարոյական արժէքների անկմանը, ընտանիքի պաշտպանուածութեան խնդրին, աշխարհում սկիզբ առած ծայրահեղական շարժումներին, որոնք իրենց կործանարար ազդեցութիւնն են թողնում ողջ մարդկութեան կեանքում: Ընդգծուեց, որ առանձին երկրներ եւ հոգեւոր-կրօնական հաստատութիւններ միայնակ չեն կարող դիմագրաւել մարդկային կեանքը յուզող այդ մարտահրաւէրներին, եւ կարեւորուեց համատեղ ջանքերի գործադրումը` ի նպաստ տարբեր ազգերի եւ կրօնների ներկայացուցիչների խաղաղ ու համերաշխ համակեցութեան, ինչպէս նաեւ հանդուրժողականութեան եւ համագործակցութեան ոգու զօրացման:
Հանդիպմանը ներկայ էին Մայր Աթոռի Արտաքին յարաբերութիւնների եւ արարողակարգի բաժնի տնօրէն Գերաշնորհ Տ. Նաթան արքեպիսկոպոս Յովհաննիսեանը եւ Երեւանի Ս. Գրիգոր Լուսաւորիչ մայր եկեղեցու հոգեւոր տեսուչ, ԵՊՀ Աստուածաբանութեան ֆակուլտետի դեկան Գերաշնորհ Տ. Անուշաւան եպիսկոպոս Ժամկոչեանը: