Աղբիւր՝ www.asbarez.com
Ե.Ա.Հ.Կ.-Ի Մինսկի խմբակը համանախագահող երկիրների պատուիրակութիւնների ղեկավարները՝ Ռուսիայի Արտաքին գործոց նախարար Սերգէյ Լաւրովը, Միացեալ նահանգների Արտաքին գործոց նախարար Ջան Քերին եւ Եւրոպայի հարցերով Ֆրանսայի նախարար Արլեմ Դեսիրը, հինգշաբթի՝ դեկտեմբերի 4-ին միացեալ մի յայտարարութիւն հրապարակելով՝ շեշտել են, որ շարունակում են հաւատարիմ մնալ Լեռնային Ղարաբաղի հակամարտութեան խաղաղ կարգաւորման ընտրանքին:
Ե.Ա.Հ.Կ.-ի համացանցային կայքի վրայ տեղադրուած յայտարարութեան մէջ նշուել է. «Ռազմական լուծում չկայ, եւ մենք կոչ ենք անում կողմերին՝ զերծ մնալ բռնութիւններից եւ աշխոյժ կերպով աշխատել տագնապին երկարատեւ մի լուծում գտնելու նպատակին հասնելու համար»:
Պատուիրակութիւնների ղեկավարները ափսոսանք են յայտնել այս տարուայ ընթացքում հակամարտ զօրքերի շփման գծի եւ հայ-ադրբեջանական սահմանի վրայ բռնութեան աճի առնչութեամբ:
«Յուլիսին եւ օգոստոսին ռազմական գործողութիւնները պատճառեցին զգալի կորուստներ, սրեցին լարուածութիւնը եւ խորացրեցին կողմերի միջեւ անվստահութիւնը: Կողմերը պէտք է յաւելեալ ջանք տանեն 1994-ի հրադադարն ամրապնդելու եւ խաղաղ բանակցութիւններ իրականացնելու համար աւելի բարենպաստ մթնոլորտ ստեղծելու նպատակով»,- ասուել է յայտարարութեան մէջ, որտեղ շեշտուել է նաեւ, որ նոյեմբերի 12-ին տեղի ունեցած ղարաբաղեան ուղղաթիռի խոցումը «մի ողբերգութիւն էր, որից կարելի էր խուսափիլ»:
«Կոչ ենք անում բոլոր կողմերին՝ զսպուածութիւն ցուցաբերել, յետագայ լարուածութեան սրումը կանխելու համար»,- ասուել է յայտարարութեան մէջ:
«2014-ին Սոչիի, Նիւփորթի եւ Փարիզի մէջ կայացած Հայաստանի եւ Ադրբեջանի նախագահների միջեւ կայացած երեք հանդիպումները վերականգնել են կողմերի միջեւ հաղորդակցութեան ամենակարեւոր միջոցը: Կողմերը պէտք է գիտակցեն, որ համապարփակ կարգաւորման հիմքը՝ Ռուսիայի, Միացեալ նահանգների եւ Ֆրանսայի նախագահների միացեալ յայտարարութիւններում շարադրուած տարրերն ու սկզբունքներն են, յատկապէս նրանք, որոնք քննարկուել են Փարիզում, անցած ամռանը»,- նշուել է յայտարարութեան մէջ: