Աղբիւր՝ www.yerkirmedia.am
Սահմանամերձ Բերքաբեր գիւղի բնակելի հատուածի հիմնական մասը հակառակորդի ուղիղ նշանառութեան տակ է:
Օգոստոսեան յայտնի իրադարձութիւնների ժամանակ, երբ, ի թիւս սահմանամերձ այլ բնակավայրերի, Բերքաբերը նոյնպէս ենթարկւում էր պարբերական հրետակոծութեան, թշնամու հիմնական թիրախը գիւղի դպրոցն էր: Երեխաների կեանքը վտանգուած է յատկապէս դասամիջոցի կամ դասերից ազատ ժամանակ, երբ նրանք խաղում են դպրոցի յարակից տարածքում: Հաշուի առնելով հրետակոծութեան սպառնալիքի մշտական առկայութիւնը՝ երկաթբետոնէ բարձր պատի կառուցումը, որպէս պաշտպանութեան ամենայուսալի միջոց, այլընտրանք չունի: Շինարարական աշխատանքները, սակայն, ենթադրում էին որոշակի ծախսեր, որոնք, ներկայ պայմաններում, յաւելեալ բեռ էին առաջացնում գիւղի բիւջէի վրայ:
Վիւասել-Մ.Տ.Ս.-ի ֆինանսների եւ հաշուապահութեան վարչութեան աշխատակիցները, ծանօթանալով խնդրին, հաշուի առնելով դրա կարեւորութիւնն ու հրատապութիւնը, ինչպէս նաեւ գիւղի սահմանափակ ֆինանսական հնարաւորութիւնները, որոշեցին օգնութեան ձեռք մեկնել գիւղին: Սեփական միջոցներից գումար յատկացնելով՝ Վիւասել-Մ.Տ.Ս.-ի աշխատակիցները ձեռնամուխ եղան պաշտպանիչ պատի կառուցման գործին:
Հարկ է նշել, որ աշխատանքներ իրականացնող շինկազմակերպութիւնը` «Շինտեխսերուիս» Ս.Պ.Ը.-ն, Վիւասել-Մ.Տ.Ս.-ի կորպորատիւ պատասխանատուութեան ծրագրերից օրինակ վերցնելով, համաձայնել է մետաղեայ շրջանակների եռակցման աշխատանքներն իրականացնել անվճար՝ որպէս բարի կամքի դրսեւորում: