Ս. Սարգիս զօրավարի եւ Նոր Ջուղայի «Ս. Սարգիս» եկեղեցու անւանակոչութեան տօների առիթներով, հոծ թւով հաւատացեալների մասնակցութեամբ երկօրեայ արարողութիւններ տեղի ունեցան նշւած եկեղեցում:
Ուրբաթ՝ 2020 թւականի փետրւարի 7-ի առաւօտեան տեղի ունեցաւ աղօրհնէքի կարգը՝ Սպահանի հայոց թեմի առաջնորդ գերշ. Տ. Սիփան եպս. Քէչէճեանի նախագահութեամբ, իսկ աւելի ուշ կէսօրից յետոյ՝ ոչխարների զենման արարողութիւնը:
Նոյն օրը երեկոյեան ժամը 6:00-ին, թեմակալ առաջնորդի նախագահութեամբ ու եկեղեցական դասի մասնակցութեամբ իրականացւեց հսկման արարողութիւնը, որին յաջորդեց զինւորների օրհնութեան կարգը, ուր Իրանի Իսլ. Հանրապետութեան զինւած ուժերում ծառայող թեմիս զաւակները Սրբազան Հօր միջոցով ստացան Աստծոյ օրհնութիւնը:
Այնուհետեւ բոլորը համախմբւեցին եկեղեցու բակում, որտեղ Սրբազան Հօր, Կրօնական խորհրդի ատենապետ Վարուժ Մովսիսեանի, Թեմական խորհրդի փոխ-ատենապետ դոկտ. Նորայր Թումանեանի եւ Նոր Ջուղայի Հայոց Առաքելական Եկեղեցեաց վարչութեան ատենապետ Հենրիկ Յակոբեանի միջոցով, Կրօնական խորհրդի կողմից նւէրներ շնորհւեցին թեմիս 9 զինւորներին: Ծառայութեան պատճառով բացակայ զինւորների նւէրները յանձնւեցին նրանց ծնողներին:
Վերջում ներկաներին իր հայրական պատգամն ուղղեց գերշ. Տ. Սիփան եպս. Քէչէճեանը, ով գնահատանքի խօսք ուղղելով զինւորական ծառայութեան շրջանն անցկացնող թեմիս զաւակներին՝ աւելացրեց, որ այսօր երկրում խաղաղութիւն եւ ապահովութիւն հաստատւելու գործում մեծ դերակատարութիւն ունեն այսպիսի երիտասարդ զինւորները: Նա իր խօսքի շարունակութեան մէջ մատնանշելով Ս. Սարգիս տօնին առնչւող Նոր Ջուղայի աւանդոյթները, կոչ արեց մոռացութեան չենթարկել եւ պահպանել ու նոր սերնդին փոխանցել բոլոր սովորութիւնները:
Շաբաթ՝ փետրւարի 8-ին, եպիսկոպոսական Սուրբ եւ Անմահ Պատարագ մատուցւեց թեմակալ առաջնորդի ձեռամբ:
Տօնին պատշաճ իր քարոզը փոխանցեց պատարագիչ Սրբազան Հայրը: Նա անդրադառնալով սուրբ Սարգիս զօրավարի կեանքին, հաւատին ու քրիստոնէութեան տարածման ուղղութեամբ գործունէութեանը՝ յորդորեց. «Նախ ունենալ կատարեալ հաւատ Աստծոյ նկատմամբ եւ կեանքի նպատակները դարձնել՝ անձերի եթէ ոչ զոհաբերումը, նւազագոյնը նւիրումն ու ընծայաբերումն առ Աստւած, ապա աղօթել, որ Տէրը օգնութեան հասնի այդ ճանապարհին եւ հոգեկան ուժ ու կորովի կողքին պարգեւի նաեւ կամքի զօրութիւն՝ արժանանալու համար Ամենասուրբ Երրորդութեան շնորհներին, աստւածային օրհնութիւններին՝ ի մասնաւորի մեր Երկնաւոր Հօր ողորմութեանը, գթութեանն ու ներողամտութեանը»:
Վերջում Ս. Սարգիս զօրավարի աջով կատարւեց ջրօրհնէքի արարողութիւն, ապա բոլորը համախմբւեցին եկեղեցու բակում, ուր օրհնւեց պատրաստւած հարիսան եւ բաժանւեց ժողովրդին:
Երկօրեայ արարողութիւններին մասնակցութիւն ցուցաբերեց թեմիս եկեղեցական դասը: Պատարագի ընթացքում երգեցողութեամբ հանդէս եկաւ Ս. Ամենափրկիչ վանքի «Կոմիտաս» երգչախումբը՝ դոկտ. Արբի Բաբումեանի ղեկավարութեամբ:
Յատկանշական է, որ այս առիթով ուխտաւորներն իրենց խորհուրդը կատարեցին նւիրատւութիւններով ու մատաղներով:
Թղթակից (Նոր Ջուղա)
