Ծաղկազարդին յաջորդող Մեծ Պահքի վերջին շաբաթւայ ընթացքում մինչեւ Ս. Յարութեան տօնը (Զատիկ) Նոր Ջուղայի թաղային եկեղեցիներում, հաւատացեալների խուռներամ մասնակցութեամբ, կանոնաւոր կերպով տեղի են ունեցել բոլոր արարողութիւնները եւ Սպահանի հայոց թեմի թեմակալ առաջնորդ գերշ. Տ. Բաբգէն եպս. Չարեանը հերթաբար նախագահելով տարբեր եկեղեցիների արարողութիւններին՝  իր հայրական օրհնանքն է փոխանցել ժողովրդին:

Աւագ շաբաթւայ արարողութիւնների շարքն սկսեց երեքշաբթի՝ ապրիլի 15-ին, Տասը կոյսերի առակի յիշատակի օրը, որն աւանդաբար կոչւում է «Յիմար-իմատուն»: Այս առթիւ արարողութիւններ տեղի ունեցան Ս. Ստեփանոս, Ս. Մինաս, Ս. Աստւածածին եւ Ս. Յովհաննու եկեղեցիներում, որին մասնակցել էին հայոց դպրոցների աշակերտուհիներից, ներկայացնելով առակի տասը կոյսերը: Առաջնորդ Սրբազան Հայրը նախագահեց Ս. Ստեփանոս եկեղեցում կատարւող արարողութեանը եւ ներկաներին ու յատկապէս աշակերտուհիներին փոխանցած իր պատգամում թելադրեց միշտ արթուն եւ պատրաստ լինել Տիրոջ ուրախութեանը մասնակից լինելու եւ Նրան դիմաւորելու:

Աւագ հինգշաբթի առաւօտեան սուրբ եւ անմահ Պատարագ մատուցւեց Ս. Ստեփանոս եւ Ս. Մինաս եկեղեցիներում: Հերթաբար երկու եկեղեցիներում եւս ներկայ գտնւեց եւ նախագահեց գերշ. Տ. Բաբգէն եպս. Չարեանը՝ ընթերցելով Ս. Բարսեղ Հայրապետի աղօթքը՝ Ս. Հաղորդութեան մասին: Ս. Ստեփանոս եկեղեցում ներկայ էր տարրական օղակի, իսկ Ս. Մինաս եկեղեցում՝ ուղեցոյց եւ միջնակարգ օղակների աշակերտութիւնը: Թեմակալ առաջնորդը Ս. Բարսեղ Հայրապետի աղօթքին անդրադառնալով բացատրեց Ս. Հաղորդութեանը ճիշտ վերաբերւելու անհրաժեշտութիւնը եւ շեշտեց, որ այն չպէտք է դիտւի իբրեւ սոսկ հաց եւ գինի, այլ՝ Քրիստոսի կողմից իսկ հաստատւած՝ Քրիստոսի մարմինն ու արիւնը, որը կարողութիւն ունի սրբացնելու արժանաւոր ճաշակողներին եւ դատապարտելու անարժաններին, որի միջոցով հաւատացեալները հաղորդակցւում եւ միացած են մնում մեր Տիրոջ եւ Փրկչի՝ Յիսուս Քրիստոսի հետ, ինչպէս Պօղոս Ս. Պատարագի բառերն են ասում. «Մօտեցէ՛ք Տիրոջը եւ տեսէք թէ որքա՜ն քաղցր եւ յաւիտենական է Նրա ուրախութիւնը»:

Աւագ հինգշաբթի երեկոյեան, Ոտնլւայի խորհրդաւոր արարողութեան ընթացքում, «Տարեցների տարւայ» առթիւ, հոգեւոր հայրերը լւացին տարեցների ոտքերը: Թեմակալ առաջնորդը ներկայ գտնւեց Ս. Յովհաննու եկեղեցում եւ օրւան պատշաճ իր պատգամի մէջ յիշեց, որ Վեհափառ Հայրապետի կողմից 2014 թւականը «Տարեցների տարի» է հռչակւել, որի պատճառով այս տարի Ոտնլւայի արարողութեանը տարեցների ոտքերն են լւացւում՝ նրանց յարգելու եւ մեծարելու նպատակով: Առաջնորդ Սրբազան Հայրը շեշտեց, որ Ոտնլւայի կարգը խորհրդանիշ է խոնարհութեան, ծառայութեան, նւիրումի եւ զոհողութեան, նաեւ յիշեցրեց, որ Յիսուս Քրիստոսն Իր աշակերտների ոտքերը լւանալով հաստատեց մկրտութեան աւազանը՝ մեղքերից սրբւելու եւ մաքրւելու համար:

Եկեղեցիներում Ոտնլւայի արարողութեանը յաջորդեց Խաւարման հսկումի կարգը Ս. Ստեփանոս, Ս. Մինաս, Ս. Աստւածածին եւ Ս. Յովհաննու եկեղեցիներում: Խաւարման երկարաժամ կարգն ամբողջութեամբ լեցուն է քաղցր եւ խորհրդաւոր շարականներով, երգերով եւ աւետարանական ընթերցումներով: Թեմակալ առաջնորդը նախագահեց Ս. Ստեփանոս եկեղեցում կատարւող արարողութեանը եւ «Ո՞ւր ես մայր իմ» յուզիչ երգից յետոյ, մթութեան եւ լռութեան մէջ իր պատգամը փոխանցեց հաւատացեալներին՝ բնաբան ունենալով Յիսուս Քրիստոսի հետ խաչւող աւազակի զղջման այն խօսքը, թէ՝ «Ո՜վ Տէր, յիշի՜ր ինձ երբ գաս Քո արքայութեամբ» եւ ասաց, որ իւրաքանչիւր հաւատացեալ պարտաւոր է ընդունել Յիսուս Քիստոսին որպէս աշխարհի Փրկչի ու աշխարհի ստեղծողի, եւ իր խօսքի մէջ անդրադարձաւ Քրիստոսի տնօրինական կեանքին, Նրա կատարած բժշկութիւններին, հրաշքներին եւ ուսուցումներին, շեշտելով, որ Նա իր անձը զոհեց եւ Իր արիւնը թափեց ամբողջ մարդկութեան մեղքերից սրբւելու եւ մաքրւելու համար:

Աւագ ուրբաթ երեկոյեան, Սպահանի հայոց թեմի բոլոր հոգեւորական հայրերը Առաջնորդ Սրբազան Հօր գլխաւորութեամբ ներկայ էին Ս. Ստեփանոս եկեղեցում, որտեղ խորհրդանշականօրէն Քրիստոսի թաղման կարգը կատարւեց: Դասի կենտրոնում, Ս. Խորանի առջեւ ծաղիկներով զարդարւած եւ Քրիստոսի գերեզմանը պատկերող սեղանի առջեւ հոգեւոր հայրերը ծնկի իջած երգեցին «Սուրբ Աստւած»-ը: Արարողութեան աւարտին գերշ. Տ. Բաբգէն եպս. Չարեանը, բնաբան ունենալով Պօղոս առաքեալի այն խօսքը, որ ասում է. «Արդէն ազատ ենք Քրիստոսի արեամբ՝ սրբարան մտնելու», իր պատգամը փոխանցեց հաւատացեալ ներկաներին՝ ասելով, որ Քրիստոսն Իր արեան գնով մի նոր եւ կենդանարար ճանապարհ բացեց՝ վերստին Աստծուն մօտենալու եւ յաւիտենական կեանքը ժառանգելու համար: Գերշ. Սրբազան Հայրն իր խօսքի մէջ բացատրեց Քրիստոսի զոհողութեան մասին եւ անդրադառնալով Քրիստոսի գերեզմանի իմաստին՝ ասաց, որ այն խորհրդանիշ է մեղքերի քաւութեան, նոր եւ առաւել կեանքի, որ Յիսուս Քրիստոսը բաշխեց ամբողջ մարդկութեանը: Թեմակալ առաջնորդը նաեւ խօսելով Քրիստոսի բերած խաղաղութեան մասին, շեշտեց, որ այսօր աշխարհը որքա՜ն պէտք ունի այդ խաղաղութեանը եւ մանաւանդ անդրադարձաւ սիրիահայութեան եւ քեսաբահայութեան դիմագրաւած դժւարութիւնների ու տառապանքների մասին եւ աղօթեց, որ շուտով խաղաղութիւնը վերահաստատւի Սիրիոյ մէջ եւ մեր ժողովուրդը կրկին ունենայ իր բնական կեանքը:

Շաբաթ՝ ապրիլի 19-ի երեկոյեան ժամը 6-ից, Ս. Զատկի Ճրագալոյցին Ս. Պատարագ մատուցւեց Նոր Ջուղայի Ս. Ներսէս եկեղեցում՝ նախագահութեամբ Սպահանի հայոց թեմի առաջնորդ գերշ. Տ. Բաբգէն եպս. Չարեանի: Յընթացս Ս. պատարագի, առաջնորդ Սրբազան Հօր միջոցով ընթերցւեց Ն.Ս.Օ.Տ.Տ. Արամ Ա Վեհափառ Հայրապետի պատգամը Ս. Զատկական տօնի առթիւ: Նոյն առիթով ծխատէր քահանայ հայրերի միջոցով Ս. Պատարագ մատուցւեց Ս. Ստեփանոս, Ս. Նիկողայոս եւ Ս. Գրիգոր Լուսաւորիչ եկեղեցիներում, Ս. Հաղորդութիւն ստացան ներկայ հաւատացեալները, որով վերջ գտաւ Մեծ Պահոց ժամանակաշրջանը եւ Յիսուս Քրիստոսի հրաշափառ յարութեան աւետիսն ստանալով՝ արարողութիւնից ստացած օրհնութիւնն իրենց հետ տուն տարան՝ իրենց յարկերը լուսաւորելու աստւածային լոյսով:

Յաջորդ օրը, կիրակի՝ ապրիլի 20-ի առաւօտեան, Փրկչի յաղթական յարութեան տօնի՝ Ս. Զատկի առթիւ, հանդիսաւոր Պատարագ մատուցւեց Նոր Ջուղայի Ս. Մինաս, Ս. Յովհաննու, Ս. Ստեփանոս եւ Ս. Աստւածածին եկեղեցիներում, որտեղ արարողութեան ընթացքում պատարագիչ քահանայ հայրերն ընթերցեցին թեմակալ առաջնորդ Սրբազան Հօր պատգամը՝ նոյն տօնի առնչութեամբ, որտեղ ասւած էր. «Քառասնօրեայ Մեծ պահոց շրջանը համբերութեամբ եւ զգաստութեամբ աւարտեցինք: Մեծ պահոց շրջանին բոլորս անդրադարձանք աստւածային, դրախտային կեանքի պարգեւած ուրախութեանը, բայց միաժամանակ ականջալուր եղանք Աւետարանի ճամբով, թէ՝ ինչպէս մարդը չհնազանդւելով աստւածային կամքին եւ օրէնքին, չպահելով Աստծու պատւիրանը՝ կորցրեց դրախտային կեանքի ուրախութիւնն ու երջանկութիւնը, միաժամանակ անդրադարձանք, որ մարդը կարելիութիւնն ունի վերատիրանալու իր երջանկութեանը: Անառակ որդու նման մարդը հեռացաւ Աստծու տնից եւ օրէնքից, ընկաւ մեղքի տիղմի մէջ եւ մի պահ կորցրեց իր ուրախութիւնը, ազատութիւնն ու անդորրութիւնը: Մարդը մի պահ կորցրեց Աստծու տւած առաջին պատմուճանը հագնելու ուրախութիւնը եւ մարդու մէջ խաթարւեց Աստծու իսկական պատկերը: Քառասնօրեայ պահեցողութեան այս շրջանը, լաւագոյն առիթն էր՝ մտածելու, անդրադառնալու, անձը քննելու, անառակ որդու նման վերադարձի ճամբան փնտռելու եւ գտնելու, սխալը սրբագրելու, մեղքը խոստովանելու եւ կեանքի ընթացքը փոխելու: Աստւած անառակ որդու հօր նման, որպէս մեր բոլորի Հայրը, ամենողորմ Տէրը, սպասում է մեզ, սպասում է մեր վերադարձին, մեր զղջումին եւ խոստովանութեանը: Ճիշտ այս պատճառով Պօղոս առաքեալը թելադրում է մեզ նախ՝ հոգեւորապէս մկրտւել»: Առաջնորդ Սրբազան Հայրն իր պատգամի վերջաւորութեանը յորդորեց հաւատացեալներին քայլել Քրիստոսի ցոյց տւած ճանապարհով, թօթափելով հին՝ մեղանչական մարդը եւ ապրել մի նոր կեանք:

Նշենք, որ Գերշ. Տ. Բաբգէն եպս. Չարեանի ձեռամբ եպիսկոպոսական հանդիսաւոր Ս. Պատարագ մատուցւեց Շահինշահրի եկեղեցում: