Երեքշաբթի՝ 2016 թւականի յունւարի 5-ի առաւօտեան ժամը 10:30-ին, «Սրբոց Վարդանանց» դպրոցի շրջափակում Սպահանի հայոց թեմի ազգային առաջնորդարանի եւ Շահինշահրի հայ համայնքի պատասխանատուներին այցելեցին Շահինշահրի ուրբաթօրեայ աղօթապետի տեղակալը, գաւառապետը, քաղաքապետը ընկերակցութեամբ՝ գաւառապետարանի եւ քաղաքապետարանի բարձրաստիճան պաշտօնատարների եւ քաղաքի խորհրդի տնօրէնի ու անձնակազմի:
«Սրբոց Վարդանանց» դպրոցի սրահում հիւրերին ընդունեցին Սպահանի հայոց թեմի թեմակալ առաջնորդ գերշ. Տ. Բաբգէն արք. Չարեանը, համայնքի հոգեւոր տեսուչ հոգշ. Տ. Անանիա վրդ. Գուճանեանը, Կրօնական խորհրդի ներկայացուցիչը եւ Հայ համայնքի վարչութեան անդամները:
Վարչութեան անունից բարիգալստեան խօսքով հանդէս եկաւ պրն. Արիս Դաւթեանը, ով շնորհակալութիւն յայտնեց հիւրերին՝ իրենց ներկայութեան համար եւ խօսքը փոխանցեց քաղաքապետին: Քաղաքապետը շնորհաւորելով Ամանորը եւ 2016 թւականը, իր ուրախութիւնն յայտնեց այս հանդիպման կապակցութեամբ եւ հանգամանօրէն ներկայացրեց այցելու պատւիրակութեանը: Նա յոյս յայտնեց, որ նոր տարւայ ընթացքում Աստծու աջակցութեամբ կարողանան առաւել ներդրում կատարել քաղաքի շէնացման եւ բարգաւաճման, ինչպէս նաեւ քաղաքացիներին ծառայելու նւիրական գործում:
Քաղաքապետը ամփոփելով իր խօսքը՝ շնորհակալութիւն յայտնեց յատկապէս հայ համայնքի ցուցաբերած համագործակցութեան կապակցութեամբ՝ քաղաքապետարանի նախաձեռնութեամբ ծրագրւած եւ կազմակերպւած հասարակական եւ մշակութային ծրագրերի, ինչպէս նաեւ քաղաքի շէնացման աշխատանքների իրականացման գործում:
Այնուհետեւ Ամանորի առիթով գաւառապետ պրն. Բասիրին շնորհաւորման խօսքով ելոյթ ունեցաւ եւ իր հերթին ակնարկելով հայ համայնքի ազնիւ պահւածքը՝ բարձր գնահատեց նրանց ներդրումը քաղաքի բարգաւաճման գործընթացում, ընդգծելով հայ համայնքի ցուցաբերած մասնակցութիւնը քաղաքի անդորրը ապահովելու, ինչպէս նաեւ իրենց պարտականութիւնները լիարժէք կատարելու մէջ:
Վերոյիշեալ երկու պաշտօնատարներն էլ իրենց արտայայտութիւններում յայտնեցին, որ ինչպէս միշտ հասարակական յանձնառութեամբ կը կատարեն հայ համայնքի հանդէպ ունեցած իրենց բոլոր յանձնառութիւնները եւ ցանկալի է կարիք համադրումները կատարւեն՝ աշխատանքները դիւրին եւ նպատակասլաց իրագործւելու համար:
Օրւայ բարեմաղթանքներին միանալով՝ ուրբաթօրեայ աղօթապետի տեղակալը յոյս յայտնեց, որ երկու միաստւածեան՝ քրիստոնեայ եւ իսլամ կրօնների հետեւորդները, ինչպէս միշտ հաշտ ու համերաշխ, փոխըմբռնմամբ եւ փոխհասկացութեամբ կապրեն եւ ձեռնամուխ կը լինեն ստեղծագործ եւ շինարար աշխատանքների:
Գերշ. Սրբազան Հայրն եւս իր հերթին իր ուրախութիւնը յայտնեց պետական բարձրաստիճան պաշտօնէութեան եւ պատասխանատուների այցելութեան առթիւ, այն համարելով պետութեան եւ փոքրամասնութիւնների միջեւ փոխյարգանքի եւ համագործակցութեան արտայայտութիւններից մէկը: Թեմակալ Առաջնորդն իր խօսքում անդրադարձաւ, որ ժամանակակից տհաճ եւ տխուր իրադարձութիւնների ակունքը հիմնականում հանդիսանում է Աստծուց՝ մարդու հեռանալու տխուր երեւոյթը, որից սկիզբ են առնում ժամանակի բոլոր տեսակի բռնարարքներն ու արիւնահեղութիւնները, դաժանութիւններն ու անմարդկային վերաբերմունքը: Երբ մարդ արարածը մոռանում է իր պարտաւորութիւնն ու յանձնառութիւնը Աստծու եւ ապա իր նմանի հանդէպ, իրեն թոյլ է տալիս պղծել սրբութիւններն ու ոտնահարել միւսների իրաւունքները: Սրբազան Հայրը յոյս յայտնեց, որ մի օր մարդը գիտակցելով իր վեհ առաքելութիւնը, դարձի կը գայ ու լսելով Տիրոջ պատգամը՝ իր Աստւածային նկարագրին համահունչ եւ համապատասխան կապրի արժանավայել կեանքով:
Յատկանշելի է, օրւայ առիթով նախապատրաստւել էր հիւրերին վայել հիւրասիրութիւն, որը վայելեցին բոլոր ներկաները՝ տօնականօրէն զարդարւած սրահում՝ ջերմ ու հիւրընկալ մթնոլորտում:
Սոյն հանդիպման աւարտին բոլորը խմբովին լուսանկարւեցին տօնածառի շուրջ եւ Հայ համայնքի վարչութիւնը յուշանւէրներ յանձնեց բոլոր հիւրերին:
