Կիրակի՝ 2014 թւականի օգոստոսի 3-ին, Ս. Ամենափրկչեան վանք այցելեց Սպահանի պետական համալսարանի ընդհանուր տնօրէն պրն. Թալեբին։ Նրան ընկերակցում էին համալսարանի Օտար լեզուների ֆակուլտետի, Հայագիտական բաժնի եւ Միջազգային յարաբերութիւնների գրասենեակի տնօրէնները։ Պատւիրակութեանը ազգային առաջնորդարանի Ծաղկեայ դահլիճում ընդունեցին Սպահանի հայոց թեմի թեմակալ առաջնորդ գերշ. Տ. Բաբգէն եպս. Չարեանը, Պատգամաւորական ժողովի դիւանի, Թեմական եւ Կրօնական խորհուրդների ատենապետերը եւ պետական համալսարանում աշխատող հայ դասախօսներ։
Հանդիպման սկզբում արտայայտւեց Սպահանի պետական համալսարանի տնօրէն դոկտ. Թալեբին՝ լուսաբանելով այցելութեան նպատակը։ Նա իր խօսքերի ընթացքում շեշտեց հայ համայնքի եւ պետական համալսարանի միջեւ առկայ սերտ կապի ու համագործակցութեան մասին, վկայակոչելով Հայագիտական ամբիոնի ստեղծումը՝ կառուցւած հայ համայնքի նիւթական ջանքերով։ Նա իր խօսքերի շարունակութեան մէջ աւելացրեց. «Սպահանի պետական համալսարանի յառաջիկայ ծրագրերի մէջ նախատեսւել է հայագիտկան ճիւղի գերլիսանսի առաջացումը։ Յոյսով ենք ինչպէս անցեալում, այսօր եւս այս աշխատանքի իրագործման ուղղութեամբ վայելելու ենք առաջնորդարանի հովանաւորութիւնը։ Համոզւած ենք, որ համատեղ գործակցութեան առումով գոյութիւն ունի մեծ ներուժ, որը դեռեւս ամբողջութեամբ չի օգտագործւել, եւ յոյսով ենք դրա արգասիքը տեսնելու ենք ապագային»։ Դոկտ. Թալեբին խօսելով համալսարանի միջազգային յարաբերութիւնների մասին ասաց. «Դրանով հանդերձ, որ Երեւանի պետական համալսարանի հետ փոխանակել ենք ուսանողներ եւ դասախօսներ, այնուամենայնիւ այդ յարաբերութիւնները տակաւին ընդլայնման կարիք ունեն. վստահ ենք, որ Իրան-Հայաստան քաղաքական եւ տնտեսական լայն համագործակցութիւնների շրջագծում, ընդլայնւելու է նաեւ գիտական մակարդակի գործակցութիւնը եւ հայ համայնքը միջնորդ օղակ է հանդիսանալու այդ կարեւոր գործում»։ Նա աւելացրեց. «Բարեբախտաբար Հայագիտականի երկար տարիների աշխատանքի արդիւնքում դաստիարակւել են բազմաթիւ ուսանողներ, որոնցից մի մասն այժմ աշխատում են որպէս դասախօսներ: Լիայոյս ենք, որ Հայաստանից եւս կունենանք հրաւիրեալ դասախօսներ, որի համար անհրաժեշտ է ազգային իշխանութեան օժանդակութիւնը»։
Առաջնորդ Սրբազան Հայրը ողջունելով հիւրերի ներկայութիւնը, իր խօսքերում անդրադարձաւ Ազգային Առաջնորդարանի եւ Սպահանի պետական համալսարանի վաղեմութիւն ունեցող գործակցութեանը եւ իր պատրաստակամութիւնը յայտնեց այսուհետեւ եւս շարունակել նոյն ձեւով, յատկապէս Երեւանի եւ Սպահանի պետական համալսարանների միջեւ ստեղծւած կապը հզօրացնելու եւ զարգացնելու ուղղութեամբ, ինչը առիթ է երկու երկրների միջեւ բարեկամական յարաբերութիւնների զարգացմանն ու ընդլայնմանը։
Թեմակալ առաջնորդը բարձր գնահատելով ուսման ոլորտում համալսարանի գործունէութիւնը, աւելացրեց. «Ուսումը խիստ անհրաժեշտութիւն է, առանց որի հնարաւոր չէ որեւէ աչքառու ձեռքբերում արձանագրել: Ուրախ ենք, որ նոր սերունդը կարեւորում է ուսումը եւ մասնագիտանում թէ պետական եւ թէ ազատ համալսարաններում։ Մենք եւս մեր երիտասարդների թիկունքին ենք եւ նրանց խրախուսում ենք հետեւելու ուսմանը եւ մասնագիտացմանը, որպէսզի ունենաք առողջ ու գիտակից ապագայ ղեկավարներ եւ մարդուժ, դրա պատճառով եւ ամենամեայ կարգով գնահատում ենք համալսարան մուտք գործող մեր ուսանողներին։ Այսօր աշխարհում ականատես ենք ողբերգական դէպքերի, որոնք առողջ բանականութեան եւ գիտակցութեան պակասի արդիւնք են. առողջ գիտակցութիւնը բոլորի մօտ զարգացնելու իմաստով համալսարանները կարեւոր անելիքներ ունեն»։
Գերշ. Տ. Բաբգէն եպս. Չարեանն անդրադառնալով Հայոց ցեղասպանութեան 100-ամեակին, նշեց. «Յաջորդ տարի հայ ժողովրդի համար նշանակալից թւական է: 2015-ին լրանալով Հայոց ցեղասպանութեան 100-ամեակը, մեզ կարեւոր դերակատարութիւն է վերապահւած Հայ դատը ծանօթացնելու ամբողջ աշխարհին։ Այս առումով Ցեղասպանութեան հարցը գիտական մակարդակում ներկայացնելու համար կարիք ունենք համալսարանների համագործակցութեանը։ Համոզւած ենք, որ այնքան ժամանակ, քանի դեռ աշխարհն ամբողջութեամբ չի ճանաչել եւ չի դատապարտել Հայոց ցեղասպանութիւնը՝ շարունակւելու են անարդարութիւններն ու պատերազմները»։ Առաջնորդ Սրբազան Հայրն իր արտայայտութիւնների աւարտին դատապարտելով Իսրայէլի պետութեան ոճրագործութիւնները Գազայում եւ Պաղեստինի անմեղ ժողովրդի կոտորածները, այն որակեց ցեղասպանութիւն։
Հանդիպման ընթացքում արտայայտւեցին նաեւ Օտար լեզուների եւ Միջազգային յարաբերութիւնների կապի գրասենեակի տնօրէնները, ովքեր շեշտեցին Սպահանի պետական համալսարանի եւ Առաջնորդարանի փոխհամագործակցութեան կարեւորութիւնը։
