Սպահանի հայոց թեմի Թեմական խորհրդի միջոցով, վերջին տարիներում Ն.Ջ. Հայ Մ.Մ. «Արարատ» միութիւնում, բացի շինարարական աշխատանքներից իրագործւել են մի շարք նորոգութիւններ, որոնցից մէկը հանդիսութիւնների սրահի եւ յարակից բաժինների նորոգութիւնն ու արդի հնարաւորութիւններով եւ սարքաւորումներով օժտելն է:
Վերանորոգւած սրահի բացման արարողութիւնը տեղի ունեցաւ երեքշաբթի՝ յուլիսի 8-ի երեկոյեան, գլխաւորութեամբ թեմակալ առաջնորդ գերշ. Տ. Բաբգէն եպս. Չարեանի եւ ներկայութեամբ ազգային մարմինների, միութեան Կենտրոնական վարչութեան ու միաւորների վարչութիւնների ներկայացուցիչների եւ համայնքիս անդամների: Նախ Սրբազան Հայրը պահպանիչ աղօթքով օրհնեց սրահը, ապա ժապաւէնի հատումով կատարեց սրահի բացումը, որից յետոյ Թեմական խորհրդի անունից արտայայտւեց Խորհրդի ատենապետ՝ Նոէլ Մինասեանը: Նա իր ուրախութիւնը յայտնելով «Արարատ» միութեան հնարաւորութիւնները բարելաւելու կապակցութեամբ, շեշտեց համայնքում ապրող ժողովրդի համար արդիական կենտրոնատեղի ունենալու կարեւորութիւնը եւ յայտնեց, որ նման աշխատանքները գալիս են ապացուցելու, որ հակառակ բոլոր դժւարութիւնների, մեր համայնքն աշխոյժ է ու կենսունակ: Նա իր գնահատանքի խօսքն ուղղեց շինարարական յանձնախմբի անդամներ՝ Վազգէն Թահմազեանին, Վարուժ Մինասեանին եւ Սիփան Ղազարեանին, ինչպէս նաեւ շինարարական աշխատանքների պատասխանատու՝ Փաւէլ Օսիփոֆին, որոնք բծախնդրօրէն եւ ճշտապահութեամբ, նախատեսւած ժամկէտին իր աւարտին հասցիրն գործը: Պրն. Մինասեանը նաեւ ողջունելի համարեց ազգային մարմինների ու միութեան Կենտրոնական վարչութեան անդամների համագործակցութեան ոգին, որի շնորհիւ հնարաւոր դարձաւ իրականացնել այս նախագիծը:
Գերշ. Սրբազանն Հայրն եւս իր հերթին իր շնորհաւորանքներն ու գնահատանքի խօսքը փոխանցեց պատասխանատու մարմիններին եւ անձանց սրահի վերանորոգման գործը լաւագոյնս կատարելու առթիւ: Գերշ. Սրբազան հայրը համայնքային հարստութիւնը արժեւորելու կոչ անելով ներկաներին, անհրաժեշտ նկատեց միասնաբար հզօրացնել ու բարգաւաճեցնել համայնքը. նա յոյս յայտնեց, որ այս սրահում լինելու են հարսանիքներ, մկրտութեան հանդիսութիւններ ու մշակութային զանազան միջոցառումներ: Գերշ. Սրբազան Հայրն օրհնանքի խօսքերով աւարտեց իր ելոյթը, ապա ներկաները այցելեցին նորոգւած բաժինները:
Վերջում միութեան Երէցների միաւորի միջոցով տեղի ունեցաւ համեստ հիւրասիրութիւն:
