Շաբաթ՝ 5 սեպտեմբեր 2020 թւականի առաւօտեան, ընթացիկ ուսումնական տարեշրջանի առաջին զանգը հնչեց Նոր Ջուղայի հայոց ագզ. դպրոցներում, ձեռամբ Սպահանի հայոց թեմի առաջնորդ գերշ. Տ. Սիփան եպս. Քէչէճեանի եւ ներկայութեամբ ազգային մարմինների ներկայացուցիչների ու դպրոցների անձնակազմերի։

Աշակերտները, ծնողներն ու առհասարակ համայնքի անդամները սոյն իրադարձութեան ականատեսը եղան Սպահանի հայոց թեմի Ազգ. առաջնորդարանի Isfahan Prelacy ինստագրամի էջով հեռարձակւող ուղիղ միացմամբ։

Սկզբում ազգային կրթահամալիրի շրջափակում, ուր համախմբւել էին հիւրերն ու «Արմէն» տարրական կրթահամալիրի եւ «Քանանեան-Կատարինեան» միջնակարգ դպրոցի տնօրէնութիւնները, ուսուցչական կազմերն ու Ծնողական խորհուրդները, ողջոյնի եւ տարեմուտի առթիւ շնորհաւորանքի խօսքով հանդէս եկաւ անցնող տարեշրջանի աւարտին հանգստի կոչւած «Արմէն» տարրական կրթահամալիրի տնօրէն Վրէժ Շիրւանեանը։ Նա իր խօսքում նշելով, որ այսօրւայ պայմաններում առաջնահերթ խնդիրը աշակերտների եւ համայնքի առողջութեան պահպանումն է, ընդգծեց, թէ հայոց դպրոցներն իրենց բոլոր հնարաւորութիւններն ու կարողականութիւնը ի գործ են դնելու՝ ուսուցման գործընթացի շարունակականութեան պահպանման ուղղութեամբ։ Պրն. Շիրւանեանը շարունակեց նաեւ, որ եթէ ստեղծւած պայմանների պատճառով որոշակիօրէն տուժի ուսուցման աշխատանքը, դա կարելի է փոխարինել ժամանակի ընթացքում, ինչը չի կարելի ասել առողջական իմաստով բացթողումների կապակցութեամբ, քանի որ դրանք կարող են անդառնալի հետեւանքներ ունենալ։ Նա վերջում անդրադառնալով իր հանգստի կոչւելու պարագային, շնորհակալական խօսքեր ուղղեց իր հետ համագործակցութիւն ցուցաբերած մարմիններին ու անհատներին։

Այնուհետեւ արտայայտւեց նաեւ միջնակարգ դպրոցի տնօրէն պրն. Մոհսենփուռը, ով նշելով ընթացիկ ուսումնական տարեշրջանի աշխատանքային ձեւաչափը եւ վստահեցնելով, որ հայոց դպրոցները պատրաստ են ցանկացած ձեւաչափով աշխատելու, բացատրութեամբ հանդէս եկաւ տարեմուտի նախօրէին կատարւած մի շարք նախապատրաստական աշխատանքների շուրջ։

Շնորհաւորանքի խօսքով եւ յաջողութեան մաղթանքներով հանդէս եկաւ Սպահանի հայոց թեմի Թեմական խորհրդի ատենապետ Վարուժ Մինասեանը։ Նա շեշտելով, որ համաճարակի պատճառով ուսուցման գործընթացի առջեւ ծառացած դժւարութիւնները յաղթահարելու միակ գրաւականը ազգային մարմիններ-դպրոց-ծնող փոխ-համագործակցութիւնն է, ցանկացաւ, որ դպրոցների պատասխանատուներն ու ծնողական խորհուրդները առաւել չափով ուշադրութիւն ցուցաբերեն աշակերտների կրթութեան եւ դաստիարակութեան նկատմամբ, յատկապէս հեռակայ ուսուցման ձեւաչափ կիրառելու պարագային։

Կրթական խորհրդի անունից հանդէս եկաւ Սաթենիկ Աւետումեանը։

Ահա մի հատւածի մէջբերում սոյն խօսքից.

«Դժբախտաբար այսօր, համաճարակի պատճառով առաջացած արտակարգ պայմաններում է մեկնարկում նոր ուսումնական տարեշրջանը, սակայն այս կացութիւնը, ոչ թէ յուսահատեցնող է, այլ առաւել չափով գօտեպնդող, քանի որ մեր զաւակների կրթութիւնն ու հայեցի դաստիարակութիւնը չպէտք է տուժի ստեղծւած իրավիճակից։ Այս պայմաններում յաջողութեան կարեւորագոյն գրաւականը, ոչ միայն առաւել չափով աշխատելն է, այլեւ աշակերտ-դպրոց-ծնող կապի աւելի սերտացումն ու համագործակցութեան մակարդակի բարձրացումը։»

Տկն. Աւետումեանն իր խօսքի աւարտին յատուկ շնորհակալութիւն յայտնելով «Արմէն» կրթահամալիրի տնօրէն պրն. Շիրւանեանին՝ մատաղ սերնդի կրթութեան եւ հայեցի դաստիարակութեան ուղղութեամբ 35 տարիներ անխոնջ աշխատելու կապակցութեամբ, ներկայացրեց դպրոցի նորանշանակ տնօրէն Գեղարդ Մանսուրեանին եւ յաջողութիւն մաղթեց նրան։

Թեմակալ առաջնորդ Սրբազան Հայրն իր հայրական օրհնանքը փոխանցեց բոլորին, որտեղ նախ շնորհակալական խօսք հնչեց ուղղւած Իրանի Ուսումնադաստիարակչութեան նախարարութեանը՝ հայկական դպրոցների հետ ցուցաբերած համագործակցութեան եւ տրւած բոլոր արտօնութիւնների համար։

Սրբազան Հայրն իր խօսքի շարունակութեան մէջ գնահատելով թեմի Կրթական խորհրդին եւ դպրոցների անձնակազմերին՝ ի մասնաւորի հանգստի կոչւած տնօրէն Վրէժ Շիրւանեանին՝ բծախնդիր եւ անձնւիրաբար աշխատելու կապակցութեամբ, բարի գալստեան խօսք ուղղեց աշակերտներին ու ծնողներին եւ ուժ-կարողութիւն մաղթեց բոլորին։

Վերջում ներկաները միասնաբար արտասանեցին «Տէրունական» եւ «Զգործս ձեռաց Մերոց…» աղօթքները, ապա Սրբազան Հայրը հնչեցրեց ուսումնական տարեշրջանի առաջին զանգը։

Այնուհետեւ թեմակալ առաջնորդը եւ նրան ընկերակցող ազգայիններն այցելեցին կրթահամալիրին կից դպրոց՝ Նոր Ջուղայի հայոց ազգ. մանկապարտէզ-նախակրթարան՝ նոր ուսումնական տարւայ պաշտօնական բացումը կատարելու։

Հիւրերին դիմաւորեց դպրոցի անձնակազմը։ Տնօրէնուհի Քառոլին Դիլանչեանը շնորհաւորելով նոր ուսումնական տարեմուտի առթիւ՝ յոյս յայտնեց, որ շուտով կեանքը եւ ուսումնական աշխատանքներն իրենց բնականոն ընթացքին են վերադառնալու։ Նա նշելով, որ դպրոցի գերխնդիրը առաջին հերթին սաների առողջութեան պահպանումն է, ապա ուսումնա-դաստիարակչական ծրագրերի ճիշտ կազմակերպումը, շեշտեց, որ մանկապարտէզ-նախակրթարանի անձնակազմը համաճարակի հետեւանքով առաջացած այս պայմաններում փորձելու է իր ծրագրերը լաւագոյնս գործադրելու։

Այնուհետեւ Սրբազան Հայրը նշելով, որ տխուր երեւոյթ է երբ կանաչազարդ պարտէզից բացակայում են ծաղիկները՝ մանուկները, ասաց. «Թէեւ այսօր զրկւեցինք մանուկների խանդավառ աղմուկներից, սակայն մեր հաւատը չենք կորցնելու եւ հաւատալու ենք, որ շուտով մեր սաների հաճելի ներկայութիւնն ենք վայելելու դպրոցների յարկի ներքոյ»։ Սրբազան Հօր խօսքն աւարտւեց ուսուցիչներին ու աշակերտներին ուղղւած յաջողութեան մաղթանքներով եւ «Տէրունական» աղօթքով, ապա հնչեց առաջին զանգը։

Թղթակից (Նոր Ջուղա)