Աղբիւր՝ www.armenian.irib.ir
Այս տարին վախի եւ յուսահատութեան տարի է եղել միլիոնաւոր երեխաների համար, ովքեր աշխարհի տարբեր անկիւններում տեղի ունեցող հակամարտութիւնների արդիւնքում ենթարկուել են բռնութեան եւ ականատես եղել դրանց կործանարար հետեւանքներին: Ասուած է ԻՒ.Ն.Ի.Ս.Ե.Ֆ.-ի դեկտեմբերի 8-ի զեկոյցում:
2014 թուականը Կործանարար էր միլիոնաւոր երեխաների համար: Երեխաներին սպանել են դպրոցում դասերի եւ իրենց անկողիններում քնած ժամանակ, հակամարտութիւնների արդիւնքում երեխաները որբացել են, առեւանգուել, խոշտանգուել, հաւաքագրուել, բռնաբարութեան ենթարկուել եւ վաճառուել ստրուկների պէս: Երբեք վերջին տարիների ընթացքում այդքան մեծ թուով երեխաներ չեն ենթարկուել նման դաժանութեան, յայտարարել է ԻՒ.Ն.Ի.Ս.Ե.Ֆ.-ի գործադիր տնօրէն Էնթօնի Լէյքը:
Այս տարի շուրջ 15 միլիոն երեխաներ են առեւանգուել դաժան հակամարտութիւնների արդիւնքում Կենտրոնական Աֆրիկայի հանրապետութիւնում, Իրաքում, Հարաւային Սուդանում, Պաղեստինում, Սիրիայում եւ Ուկրաինայում, ներառեալ ներքին տեղահանուածները կամ փախստականի կարգավիճակով ապրող անձինք: Ամբողջ աշխարհում շուրջ 230 միլիոն երեխայ ներկայումս ապրում են զինուած հակամարտութիւններից տուժած երկրներում եւ տարածքներում:
2014 թուականին հարիւրաւոր երեխաներ առեւանգուել են դպրոցներից կամ դպրոց գնալու ճանապարհին: Տասնեակ հազարաւորներ հաւաքագրուել կամ օգտագործուել են զինուած ուժերի կամ խմբերի կողմից: Յարձակումները կրթական եւ բուժհիմնարկների վրայ եւ դպրոցների տարածքների օգտագործումը զինուած նպատակներով աճել է շատ վայրերում:
Երեխայի իրաւունքների հռչակագրի 25-ամեակի տարեդարձին, երբ արձանագրուել էր զգալի առաջընթաց ամբողջ աշխարհում ապրող երեխաների իրաւունքների բնագաւառում, միեւնոյն ժամանակ դաժանօրէն խախտուել են միլիոնաւոր երեխաների իրաւունքները, նշել է Լէյքը` աւելացնելով, որ աշխարհը կարող է եւ պէտք է աւելին անի 2015 թուականն առաւել նպաստաւոր տարի դարձնելու իւրաքանչիւր երեխայի համար: