Աղբիւր՝ www.yerkir.am 

Հայաստանում Իրանի նորանշանակ դեսպան Աբբաս Զոհուրին Իրանի ազատ տնտեսական «Արաս» գօտի կատարած այցի շրջանակներում, այցելել է Հայաստանի սահմանային Նորդուզի անցակէտ։ Այս մասին յայտնել է «Արաս» ազատ առեւտրի գօտու հանրային եւ միջազգային կապերի բաժինը։

«Նորդուզի սահմանը, որպէս դէպի Եւրասիական շուկայ Իրանի դարպաս, երկրի արտահանման եւ արտարժոյթի ներգրաւման մէջ կարեւոր դերակատարում ունի եւ պայմաններ է ստեղծում Եւրասիական ու ԱՊՀ շուկաներում իրանական ապրանքների օրէցօր աւելացող ներկայութեան համար»,-ասել է դեսպան Զոհուրին` Ջուղայի շրջանի ղեկավարի, Նորդուզի կենտրոնի տնօրէնի եւ սահմանային անցակէտում տեղակայւած գրասենեակների եւ կենտրոնների տնօրէնների հետ համատեղ նիստում։

Դեսպանը սահմանային անցակէտի գոյութիւնը նպաստաւոր պայման է համարել Ջուղայի շրջանի եւ «Արաս» ազատ տնտեսական գօտու համար, հաստատել է ներդրումների ներգրաւման, համագործակցութեան զարգացման եւ ծրագրման կարեւորութիւնը։

Մեղրի-Նորդուզ սահմանային անցակէտը Հայաստանի եւ Իրանի Իսլամական Հանրապետութեան միակ ցամաքային սահմանն է։ Երկու կողմերում գործում են ազատ տնտեսական գօտիներ, կողմերի քննարկումների օրակարգում է այդ գօտիներում եւ անցակէտում համագործակցութեան զարգացումն ու խորացումը։

Աղբիւր՝ www.yerkir.am 

ԻԻՀ-ում ՀՀ դեսպան Արտաշէս Թումանեանն օգոստոսի 12-ին այցելել է ԻԻՀ Իսլամական խորհրդի մեջլիս, որտեղ հանդիպում ունեցաւ Արտաքին քաղաքականութեան եւ ազգային անվտանգութեան յանձնաժողովի նախագահ Մոջթաբա Զոլնուրի հետ: Այս մասին տեղեկատւութիւնը դեսպանութիւնը հրապարակել է «Ֆէյսբուք» սոցիալական ցանցի իր էջում: Զրուցակիցները քննարկել են երկկողմ յարաբերութիւններին առնչւող հարցերի լայն շրջանակ:

Անդրադարձ է եղել Ղարաբաղեան հակամարտութեան կարգաւորման խնդիրներին եւ այս համատեքստում Արտաշէս Թումանեանը տեղեկութիւններ է ներկայացրել ընթացիկ տարւայ յուլիսին հայ-ադրբեջանական սահմանին տեղի ունեցած ռազմական բախման մասին:

Քննարկւել են կորոնավիրուսային համավարակին, Իրանի նկատմամբ շարունակւող ամերիկեան պատժամիջոցների պայմաններում առեւտրատնտեսական յարաբերութիւնների ներկայ վիճակին եւ զարգացման հնարաւորութիւններին վերաբերող մի շարք հարցեր:

Յատուկ անդրադարձ է եղել ԵԱՏՄ-Իրան համագործակցութեան ամրապնդմանը եւ այս առումով Հայաստան-Իրան յարաբերութիւնների առանձնայատուկ նշանակութեանը: Քննարկւել են երկկողմ եւ տարածաշրջանային յարաբերութիւններին առնչւող մի շարք այլ հարցեր:

Արտաշէս Թումանեանը եւ Մոջթաբա Զոլնուրը նշել են միջխորհրդարանական համագործակցութեան խորացման անհրաժեշտութիւնը եւ այս իմաստով կարեւորել են խորհրդարանների ղեկավարների, մշտական յանձնաժողովների եւ բարեկամութեան խմբերի միջեւ փոխգործակցութեան ակտիւացումը:

Աղբիւր՝ www.yerkir.am 

Օգոստոսի 5-ին ՀՀ ԱԺ գիտութեան, կրթութեան, մշակոյթի, սպորտի եւ երիտասարդութեան հարցերի մշտական յանձնաժողովի նախագահ, Հայաստան-Իրան բարեկամական խմբի ղեկավար Մխիթար Հայրապետեանը հանդիպել է ՀՀ-ում Իրանի Իսլամական Հանրապետութեան արտակարգ եւ լիազօր դեսպան Աբբաս Բադախշան ԶոՀուրիի հետ:

«Հայաստան-Իրան միջխորհրդարանական յարաբերութիւնների զարգացման տեսանկիւնից, ըստ իս, հարկաւոր է շեշտը դնել ՀՀ եւ ԻԻՀ խորՀրդարանների ղեկավարների մշտական երկխօսութեան իրականացման, խորհրդարանական մշտական յանձնաժողովների միջեւ կապերի խորացման, միջխորհրդարանական բարեկամական խմբերի համագործակցութեան, միջխորհրդարանական միութիւնների եւ միջազգային հարթակների շրջանակներում կապերի հաստատման վրայ»,-նշել է Մխիթար Հայրապետեանը:

Հանդիպման ընթացքում քննարկւել են նաեւ հայ-իրանական օրակարգի մի շարք հարցեր, ինչպէս նաեւ տարբեր ոլորտներում փոխգործակցութիւնն առաւել ընդլայնելու հնարաւորութիւնները:

Հանդիպումը կայացել է խորհրդանշական վայրում` Պատմական յուշարձանների պահպանման հայկական դաշնութեան շէնքում, որը 1873-1920թթ. եղել է պարսիկ հիւպատոսի նստավայրը:

ՀՀ պաշտպանութեան նախարար Դաւիթ Տօնոյեանը յուլիսի 29-ին ընդունել է Հայաստանի Հանրապետութիւնում Իրանի Իսլամական Հանրապետութեան նորանշանակ արտակարգ եւ լիազօր դեսպան Աբբաս Բադախշան Զոհուրիին: Հանդիպմանը մասնակցել է նաեւ ՀՀ-ում ԻԻՀ դեսպանութեան ռազմական կցորդ, գնդապետ Մեհդի Հէյաթ Վեջդանին: Այս մասին Yerkir.am-ին յայտնում են ՀՀ ՊՆ տեղեկատւութեան եւ հասարակայնութեան հետ կապերի վարչութիւնից: Այս մասին հաղորդում է «Yerkir.am»-ը:

Անդրադարձ է կատարւել ՀՀ հիւսիսարեւելեան հատւածում վերջին օրերին տեղի ունեցած գործողութիւնների ընթացքում մեծ քանակութեամբ արդիական ԱԹՍ-ների կիրառման փաստին եւ դրանց դէմ պայքարի արդիւնաւէտութեանը:

Հաշւի առնելով տարածաշրջանային անվտանգային խնդիրները, զրուցակիցները կարծիքներ են փոխանակել թուրք-ադրբեջանական համատեղ զօրավարժութիւնների բնոյթի վերաբերեալ, գնահատւել է դրանց հնարաւոր ազդեցութիւնը տարածաշրջանում կայունութեան ապահովման տեսանկիւնից:

 Աղբիւր՝ www.alikonline.ir

«ԱԼԻՔ» - Յուլիսի 27-ին ԻԻՀ-ում ՀՀ դեսպան Արտաշէս Թումանեանը հանդիպել է Թ. Հ. Թ. Թեմական խորհրդի ատենապետ Նորայր Արամեանի եւ Պատգմաւորական ժողովի Բ ատենապետ Վահիկ Աղաքեանի հետ: Այս մասին տեղեկացնում է Իրանում ՀՀ դեսպանութեան «ֆէյսբուք»-եան էջը:

Զրուցակիցները քննարկել են կորոնավիրուսային համավարակի պայմաններում մշակութային եւ գիտակրթական ոլորտներում Հայաստան-Իրան համագործակցութեան ծրագրերի իրականացման եւ այդ համատեքստում ՀՀ դեսպանութեան եւ համայնքային կառոյցների ներուժի արդիւնաւէտ օգտագործման հնարաւորութիւնները:

 Աղբիւր՝ www.yerkir.am

Իրանի ԱԳՆ պաշտօնական ներկայացուցիչ Աբբաս Մուսաւին երէկ Արդեբիլ քաղաքում մամուլի ասուլիսի ժամանակ կրկնել է, որ Իրանը պատրաստ է միջնորդական դեր ստանձնել Հայաստանի ու Ադրբեջանի միջեւ սահմանային զինւած հակամարտութիւնը կարգաւորելու համար. ըստ yerkir.am-ի` յայտնում է Mehr լրատւական գործակալութիւնը:

Նա ընդգծել է, որ Հայաստանի եւ Ադրբեջանի սահմանին իրավիճակի սրման հէնց սկզբից Իրանը վէճը խաղաղ կարգաւորելու կոչ է արել անմիջապէս, եւ Թեհրանը պատրաստ է նաեւ Ղարաբաղի շուրջ հակամարտութեան կարգաւորման գործում միջնորդ լինել:

«Իսլամական Հանրապետութեան դիրքորոշումը Ղարաբաղեան հակամարտութեան հարցում պարզորոշ է: Իրանն աջակցում է տնտեսական շահերի եւ տարածաշրջանում անվտանգութեան շահերի կիրառմանը: Մենք ցանկանում ենք, որ լարւածութիւնը վերահսկւի, եւ համոզւած ենք, որ, լարւածութիւնը վերահսկելով, շարունակւող հակամարտութիւնները պատերազմի չեն վերաճի»,- ընդգծել է Մուսաւին:

Յիշեցնենք, որ յուլիսի 14-ին Իրանի արտգործնախարար Մոհամմադ Ջաւադ Զարիֆը հեռախօսով զրուցել է Հայաստանի ԱԳ նախարար Զոհրաբ Մնացականեանի եւ Ադրբեջանի ԱԳ նախարար Էլմար Մամեդեարովի հետ (յուլիսի 16-ին պաշտօնանկ է արւել) եւ առաջարկել սահմանին զինւած հակամարտութեան կարգաւորման գործում իր երկրի աջակցութիւնը:

Նաեւ` Իրանի նախագահի աշխատակազմն է գնահատական տւել հայ-ադրբեջանական սահմանին իրավիճակի սրմանը` այն որակելով որպէս սպառնալիք տարածաշրջանի անվտանգութեան համար, որն անհանգստացնում է Թեհրանին: «Հարցի քաղաքական լուծումը, նկատի առնելով երկու երկրների շահերն ու տարածքային ամբողջականութիւնը, ճգնաժամի միակ լուծումն է: Իրանի Իսլամական Հանրապետութիւնը, առանց վարանման, այդ ուղղութեամբ ցանկացած ծառայութիւն կը մատուցի` հաշւի առնելով նախկինում միջնորդութիւնը եւ բարիդրացիական յարաբերութիւնները Հայաստանի եւ Ադրբեջանի հետ»,- ասել է Իրանի նախագահի աշխատակազմի ղեկավար Մահմուդ Վայեզին:

 Աղբիւր՝ www.yerkir.am

Հայաստանում Իրանի դեսպան Աբբաս Բադախշան Զոհուրին մեկնաբանել է Լեռնային Ղարաբաղի հակամարտութեան կարգաւորման հարցում Ադրբեջանում Իրանի դեսպանի հակասական յայտարարութիւնները։ Հանրային հեռուստաընկերութեանը տւած հարցազրոյցում Զոհուրին նշել է, որ Լեռնային Ղարաբաղի հակամարտութեան կարգաւորման հարցում Իրանի հաւասարակշռւած դիրքորոշումը չի փոխւել։

Հաղորդավարի հարցին՝ Ադրբեջանում Իրանի դեսպանը երբեմն այնպիսի յայտարարութիւններ է անում, որոնք տարբերւում են Իրանի պաշտօնական դիրքորոշումից, ո՞րն է Իրանի պաշտօնական դիրքորոշումը, դեսպան Զոհուրին մասնաւորապէս պատասխանել է.

«Լեռնային Ղարաբաղի հակամարտութեան հարցում Իրանի Իսլամական Հանրապետութեան դիրքորոշումը միշտ յայտնել ենք, մեր դիրքորոշման մէջ չի եղել որեւիցէ փոփոխութիւն։ Եթէ կան մարդիկ, որ այլ կարծիքներ են յայտնում՝ դրանք պաշտօնական տեսակէտներ չեն, եւ հաւասարակշռւած դիրքորոշումը, որը որդեգրել է Իրանը, անփոփոխ է մնացել: Եւ ցանկացած փոփոխութիւն Իրանի ԱԳՆ մամուլի քարտուղարի միջոցով կը ներկայացւէր, որը չի արւել»:

 Աղբիւր՝ www.alikonline.ir

«ԱԼԻՔ» - Վերջերս Թել Աւիւում դեսպանութիւն բացելու կապակցութեամբ Հայաստանի Հանրապետութեան կառավարութեան որոշումը իրանական, ինչպէս նաեւ հայաստանեան ԶԼՄ-ների լայն քննարկման առիթ դարձաւ:

Նոյն գծով իրանական խոշոր լրատւամիջոցներից մէկը առիթ դարձնելով Իրանի համար խիստ զգայուն այս իրավիճակը, առանց աղբիւրի մասին նշելու կամ յղում կատարելու, անդրադարձ կատարեց հայաստանեան լրատւամիջոցներից մէկի հետ իրանահայ պատգամաւորի՝ Ռոբերտ Բեգլարեանի ունեցած զրոյցին, միաժամանակ յիշեցնելով, որ չի կարելի լեգիտիմացնել Իսրայէլի էութիւնը տարածաշրջանում:

Յատկանշական է, որ նշւած զրոյցը, պատգամաւորի ասութեամբ, տեղի է ունեցել հայաստանեան «Թերթ.էյ էմ»-ի հետ, որտեղ Իրանի Իսլ. խորհրդարանում Սպահանի եւ հարաւային իրանահայութեան պատգամաւոր՝ Ռոբերտ Բեգլարեանը մասնաւորապէս նշել է. «Այլ երկրներին մենք (ԻԻՀ-ն) զգուշացրել ենք սիոնիստական ռեժիմի օկուպանտ էութեան ու այդ ռեժիմի անօրինականութեան մասին, եւ մտահոգութիւն ենք յայտնել սիոնիստների համար ամենաչնչին օրինականութիւնն ստեղծող քայլերի կապակցութեամբ»:

Այս կապակցութեամբ պատգամաւոր Ռոբերտ Բեգլարեանը պատասխանելով «Ալիք»-ի դիտարկմանը թէ՝ շօշափւած թեման ինչո՞վ է անհանգստացրել իրանական լրատւամիջոցին, նշեց. «Նախ ասեմ, որ տւեալ լրատւամիջոցը չի նշել իր տեղեկութեան աղբիւրը: Իսկ իմ իմացածով, ես միայն պատասխանել եմ «Թերթ.էյ էմ»-ի հարցերին, որտեղ պարզ նշել եմ թէ, որն է Իրանի դիրքորոշումը, միեւնոյն ժամանակ պարզաբանել Իրանի կարեւորութիւնը տարածաշրջանում անվտանգութիւն հաստատելու փաստի շուրջ: Իսկ իրանական նման մեծ լրատւամիջոցը, գոնէ ինձ պէս անձանց հանդիպելու լայն ձեռնահասութիւն ունի, ինչի անտեսումը ինձ զարմանք պատճառեց:

Այնուամենայնիւ նշեմ, որ, որպէս Իրանի քաղաքացի, ինչպէս նաեւ խորհրդարանում պատգամաւոր, լաւագոյնս գիտակցում եմ Իրանի ազգային շահերը, յատկապէս քաղաքականութեան ուղղւածութիւնն ու համակարգի սկզբունքները: Միաժամանակ գիտակցում Իրան-Հայաաստան յարաբերութիւնների ծաւալն ու սերտացումը, ինչը խօսում է այն մասին, որ երկու երկրները ԱԳ-ների մակարդակով կարող են եւ շարունակում են անմիջական կապերի միջոցով նման հարցեր շօշափել եւ փոխըմբռնման եզրեր գտնել: Նաեւ լաւագոյնս գիտակցում ենք տարածաշրջանի կայունութեան գործում Իրանի կարեւոր դերակատարութիւնը, ինչպէս նաեւ Հայաստանի Հանրապետութեան համար Իրանի կարեւորութեան փաստը: Այսպիսով միայն կարող եմ իմ զարմանքս յայտնել, նման կարեւոր ու զգայնութիւն արթնացնող թեման պարսկալեզու լրատւամիջոցի կողմից իրանական լսարանին այդպէս հրամցւելու համար: Գիտենք նաեւ, որ վերջին շրջանում լայն քննարկումների առիթ էր այդ լուրը, նոյնիսկ մէկ-մէկ միակողմանի դրսեւորումներով, սակայն մէկ է, արձանագրել է պէտք, որ լաւագոյնս գիտակցում ենք Իրանի եւ իրանահայ համայնքի շահերը»:

Յիշեցնենք, որ «Ֆարս» լրատւական գործակալութեան կողմից հրապարակւած նիւթում, առանց զրոյցից մէջբերումներ անելու, նշւած էր իրանահայ պատգամաւորի անունը, որտեղ յօդւածագիրը քննադատական հայեացք նետելով Հայաստան-Իսրայէլ յարաբերութիւնների ներկայ փուլին, դժգոհանք էր յայտնել Իսրայէլի էութիւնը լեգիտիմացնող իւրաքանչիւր մօտեցման համար:

Յատկանշական է, որ «Ֆարս»-ի յօդւածագիրը հայկական կողմին է յիշեցրել 105 տարի առաջ իր բնութագրմամբ «Մեծ ջարդերի» փաստը, եւ նշել, որ Իսրայէլը նոյնպէս սպանդ իրականացրած պետութիւն է, ում հետ յարաբերութիւնները չեն կարող ունենալ տրամաբանական ելք հայ ժողովրդի համար:

 Աղբիւր՝ www.mfa.am

2020թ․ մայիսի 31-ին աւարտւել է 2016թ. յունիսի 5-ին ստորագրւած «Հայաստանի Հանրապետութեան Կառավարութեան եւ Իրանի Իսլամական Հանրապետութեան Կառավարութեան միջեւ քաղաքացիների առանց մուտքի արտօնագրի այցելութիւնների մասին» փոխըմբռնման յուշագրի ժամանակաւոր կասեցման ժամկէտը, եւ 2020թ․ յունիսի 1-ից սովորական անձնագրեր կրող ԻԻՀ քաղաքացիները իրաւունք ունեն առանց արտօնագրերի ձեւակերպման մուտք գործել Հայաստանի Հանրապետութիւն:

Միաժամանակ ՀՀ ԱԳՆ յիշեցնում է, որ ՀՀ-ում արտակարգ դրութեան ռեժիմը սահմանւած է մինչեւ 2020թ․ յունիսի 13-ը, հետեւաբար դրանով պայմանաւորւած անձանց ՀՀ տարածք մուտքի եւ ՀՀ տարածքից ելքի սահմանափակումները կը պահպանւեն մինչեւ արտակարգ դրութեան ռեժիմի աւարտը:

ԱԳՆ-ն յորդորում է ՀՀ քաղաքացիներին Իրանի Իսլամական Հանրապետութիւն այցելութիւն ծրագրել միայն խիստ անյետաձգելի դէպքերում:

 Աղբիւր՝ www.yerkir.am

Երեւանում Իրանի դեսպան Աբբաս Զոհուրին յայտարարել է, որ Իրանի համար Հայաստանը դիտարկւում է որպէս միջանցք դէպի այլ երկրներ՝ մասնաւորապէս եւրոպական. յայտնում է IRNA գործակալութիւնը։

Զոհուրին տեսակոնֆերանսի ընթացքում յայտարարել է, որ Հայաստանը հսկայական եզակի ներուժ ունի, այն դէպքում, երբ համարւում է Իսլամական հանրապետութեան հարեւան եւ բարեկամ: Նա նշեց, որ տնտեսական եւ քաղաքական տեսանկիւնից Իրանի հարեւանները համագործակցութեան առաջնային ոլորտներ են:

Նա յաւելել է, որ Հայաստանը տնտեսական հսկայական հնարաւորութիւններ ունի ՝ հաշւի առնելով իւղային մշակոյթի, անասունների եւ թռչնաբուծութեան առկայութիւնը, ինչպէս նաեւ «Արաքսի» ազատ առեւտրի գօտու ակտիւ գործունէութիւնը: Զոհուրին նշեց, որ չնայած կորոնավիրուսի բռնկմանը եւ անորոշ ժամանակով սահմանային կէտերի փակմանը, երկու երկրների միջեւ առեւտուրը չի տուժել:

 Աղբիւր՝ www.yerkir.am

Մայիսի 17-ին ԻԻՀ-ում ՀՀ արտակարգ եւ լիազօր դեսպան Արտաշէս Թումանեանը հանդիպել է ԻԻՀ ԱԳ Եւրասիայի գլխաւոր վարչութեան պետ Ալի Ռեզա Հաղիղիանի հետ: Այս մասին Yerkir.am-ը տեղեկանում է Իրանում ՀՀ դեսպանութեան ֆէյսբուքեան էջից:

Դեսպան Թումանեանը ներկայացրել է երկկողմ յարաբերութիւնների օրակարգային հարցերի լուծման ընթացքը: Մասնաւորապէս, խօսւել է գազի եւ էներգետիկայի ոլորտի ծրագրերի, երկկողմ առեւտրաշրջանառութեան եւ մի շարք այլ հարցերի մասին:

Զրուցակիցներն անդրադարձել են կորոնավիրուսային համավարակի դէմ պայքարի գործում միմեանց հետ արդիւնաւէտ համագործակցութեանը: Կարեւորւել է առողջապահական անհրաժեշտ պարագաների մատակարարման ուղղութեամբ աշխատանքների ակտիւացումը:

 Աղբիւր՝ www.alikonline.ir

Իրանի նորընտիր խորհրդարանի հայազգի պատգամաւոր Ռոբերտ Բեգլարեանի խօսքով՝ Թել Աւիւում Երեւանի դեսպանատուն բացելու Հայաստանի որոշման մասին Իրանում տարբեր վերլուծութիւններ են եղել, հիմա էլ թեմայի վերաբերեալ գնահատականներ են հնչում տարբեր վերլուծաբանների, քաղաքական հոսանքների ներկայացուցիչների կողմից:

Նա Tert.am-ի հետ զրոյցում նշեց, որ Իսրայէլի դերակատարութիւնը տարածաշրջանում, ազդեցութիւնը Ադրբեջանում եւ իրենց հարեւան այլ երկրներում, մշտապէս Իրանի ուշադրութեան կենտրոնում է:

«Հայաստանի պետական այրերն էլ գիտեն այդ մասին: Դա զգայուն թեմա է: Նաեւ Իրանում գիտեն, որ Հայաստանի կողմից որեւէ սպառնալիք չի եղել եւ չի լինելու Իրանի հասցէին»,- ասաց նա՝ նշելով, որ երկու երկրների պետական այրերի՝ արտգործնախարարութիւնների աշխատանքի արդիւնքում կարող է պարզաբանւել, թէ Հայաստանը ինչ շահեր ունենալով է, ինչ սկզբունքով է եկել այդ որոշմանը եւ նման քաղաքական ակտ է ցանկանում կատարել:

Նշենք, որ Իրանի ԱԳ նախարարութիւնն արձագանքել էր Թել Աւիւում դեսպանատուն բացելու Հայաստանի որոշմանը: Մտահոգութիւն յայտնելով Թել Աւիւում դեսպանատուն բացելու Հայաստանի որոշման կապակցութեամբ` Իրանի ԱԳ նախարարութեան խօսնակ Սէյէդ Աբբաս Մուսաւին յոյս էր յայտնել, որ Երեւանը կը վերանայի իր որոշումը:

«Այլ երկրներին մենք շարունակ զգուշացրել ենք Սիոնիստական ռեժիմի օկուպանտ էութեան ու ռեժիմի անօրինականութեան մասին եւ մտահոգութիւն ենք յայտնել սիոնիստներին համար ամենաչնչին օրինականութիւնն ստեղծող քայլերի կապակցութեամբ»,- ասել էր նա՝ յաւելելով, որ իրենց մտահոգութիւնը յայտնել են ՀՀ կառավարութեանը: Ռոբերտ Բեգլարեանը նշեց, որ որքանով ինքն է տեղեակ, Իրանում ՀՀ դեսպան Արտաշէս Թումանեանը համապատասխան շփումներ ունեցել է, տեղեկութիւններ փոխանցելով, որոշակի վերաբերմունք մեղմելով՝ փոխանցել է ՀՀ կառավարութեան դիրքորոշումն այս հարցի վերաբերեալ:

«Շատ կարեւոր է երկու երկրների յարաբերութիւնների պահպանումը: Թել Աւիւում դեսպանութիւն ունենալու հարցը Իրանի համար շատ զգայուն է: Մենք՝ իրանահայերս եւ Իրանի քաղաքական կեանքին մօտ մարդիկ, գիտենք, թէ ինչ կարեւորութիւն ունեն Իրանն ու Հայաստանը միմեանց համար: Հաւանաբար, Հայաստանը պէտք է գտնի մի ձեւաչափ, որով պարզ դառնայ, թէ Իսրայէլի հետ յարաբերութիւններն ինչ մակարդակում պէտք է լինեն: Երկու երկրները, ելնելով իրենց անվտանգային շահերից, իրենց համար գերակայ խնդիրներից գուցէ պէտք է մի այլ համագործակցութիւն էլ ունենան: Դա արդէն իրենք պէտք է ճշտեն: Խնդիրն այն է, որ Իրանը պէտք է վստահ լինի, որ Հայաստանի կողմից Իսրայէլի հետ յարաբերութիւնների զարգացումը որեւիցէ սպառնալիք չի ստեղծի իր համար, ի մասնաւորի՝ հետախուզութեան, տեղեկատւական տեխնոլոգիաների տեսակէտից»,- ասաց նա:

Դիտարկմանը, թէ ինչ կարող է լինել, եթէ ՀՀ կառավարութիւնը ընդառաջ չգնայ Իրանի յորդորին՝ վերանայել որոշումը, Ռոբերտ Բեգլարեանը դժւարացաւ պատասխանել: «Դժւար է ասել, գուցէ նման յայտարարութիւն արւել է ներքաղաքական իրավիճակից ելնելով: Ամէն դէպքում, պէտք է ընկալենք, որ Իսրայէլի ներկայութիւնը որեւէ տարածաշրջանում, կամ որեւէ երկրի հետ Իսրայէլի յարաբերութիւնները, որը կարող է առնչւել իր շահերի հետ, մշտապէս եղել է եւ կը մնայ Իրանի ուշադրութեան կենտրոնում: Այս հարցում Հայաստանը պէտք է կողմնորոշւի: Գիտեմ, որ Իրանն էլ միշտ փոխըմբռնումով է մօտեցել Հայաստանի տարածաշրջանային խնդիրներին, բայց այս թեման ունի իւրայատուկ զգայունութիւն. երկուստեք անկեղծ փոխյարաբերութիւնների մեկնաբանման դէպքում կարելի է ճիշտ հուն գտնել»,- ասաց նա:

Ռոբերտ Բեգլարեանը նաեւ նշեց, որ Իրան-Հայաստան յարաբերութիւնները չեն սահմանափակւում միայն մի քանի գործօններով. երկու երկրները գտնւում ենք բաւականին լուրջ տարածաշրջանների խաչմերուկում՝ Կովկաս եւ Միջին Արեւելք.

«Ես անձամբ երկու երկրների քաղաքական յարաբերութիւններից մինչ հիմա գոհ եմ եղել, բայց տնտեսականը փոքրիշատէ ազդեցութիւն է կրել քաղաքական որոշակի պայմաններից եւ վերապահումներ է ունեցել: Բացի էներգետիկ ոլորտից, տնտեսական շատ ճիւղերում երկու երկրների փոխյարաբերութիւնները կարիք ունեն շատ լուրջ վերադասաւորումների, վերակազմակերպման, նոր ռազմավարութեան: Ես յոյս ունեմ, որ Թել Աւիւում Երեւանի դեսպանութիւն ունենալու Հայաստանի որոշումը չի խանգարի այդ գործընթացին,- ասաց նա՝ յաւելելով,- չեմ կարող ասել՝ կամքի պակա՞ս է, թէ երկու երկրները սպասում են ինչ-որ այլ հարցեր լուծւեն, նոր անցնեն քայլերի: Դա մշտապէս եղել է: Հիմա կարծում եմ՝ ինչքան շուտ փարատւեն կասկածները, այնքան արագ կը զարգանան երկու երկրների միջեւ տնտեսական յարաբերութիւնները»:

 
Հռիփսիմէ Յովհաննիսեան

 Աղբիւր՝ www.yerkirmedia.am

ԻԻՀ-ում ՀՀ արտակարգ եւ լիազօր դեսպան Արտաշէս Թումանեանը եւ ԻԻՀ առողջապահութեան նախարարի տեղակալ Ասադի Լարին մայիսի 14-ին հանդիպել են միմեան հետ։

Այս մասին տեղեկացնում են Իրանում ՀՀ դեսպանութիւնից։

«Հանդիպման ընթացքում քննարկւել են իրանական կողմից բժշկական պարագաների եւ նիւթերի` Հայաստան առաքման եւ մի շարք այլ երկկողմ հետաքրքրութիւն ներկայացնող հարցեր:

Դեսպան Թումանեանն առաջարկել է ըստ անհրաժեշտութեան կազմակերպել երկու երկրների առողջապահութեան նախարարութիւնների պատասխանատուների եւ մասնագէտների միջեւ տեսակոնֆերանսներ, որի կապակցութեամբ փոխնախարար Ասադի Լարին յայտնել է իր պատրաստակամութիւնը»,- յայտնում են դեսպանութիւնից:

 Աղբիւր՝ www.iran.mfa.am

Մայիսի 13-ին ՀՀ Պետական եկամուտների կոմիտէի նախագահ Դաւիթ Անանեանը տեսակոնֆերանսի միջոցով ԻԻՀ մաքսային ծառայութեան ղեկավար Մեհդի Միրաշրաֆի հետ քննարկել է երկկողմ համագործակցութեանը, այդ թւում՝ Մեղրի-Նորդուզ սահմանային անցակէտին վերաբերող մի շարք հարցեր:

Կողմերը պայմանաւորւածութիւն են ձեռք բերել, պահպանելով առողջապահական բոլոր նորմերը, վերացնել սահմանային անցակէտի աշխատանքներում առկայ խոչընդոտները եւ հնարաւորինս կարճ ժամկէտում վերականգնել երկկողմ առեւտրաշրջանառութեան ծաւալների՝ նախահամաճարակային շրջանի մակարդակը:

Հաշւի առնելով կորոնավիրուս համաճարակի հետեւանքով զբօսաշրջութեան ոլորտում ստեղծւած սահմանափակումները, Սպահանի քաղաքապետարանը ծրագրել է վիրտուալ շրջագայութեան միջոցով ներկայացնել ստորագրւած համաձայնագրով Սպահանի հետ քոյր քաղաքների՝ այդ թւում Երեւանի զբօսաշրջութեան վայրերը:

Այս շրջագծում, 2020 թւականի ապրիլ ամսին, որը զուգադիպում է նաեւ Սպահանի եւ Երեւանի քոյր քաղաքներ հռչակւելու 20-ամեակին, Սպահանի հայոց թեմի Թեմական խորհրդի եւ Սպահանի քաղաքապետարանի մշակութային, հասարակական եւ մարզական կազմակերպութեան համատեղ ծրագրի արդիւնքում, Իրանի զբօսաշրջութեան բնագաւառին առնչւող Telegram եւ Instagram սոցցանցերի միջոցով պարբերաբար ներկայացւում են Երեւանի հարուստ պատմա-մշակութային ժառանգութիւնը արտացոլող ֆոտոշարք եւ տեղեկանք, որին արդէն իսկ հետեւում են մեծ թւով իրանցի օգտատէրեր եւ օրէցօր աւելանում է այդ թիւը:

Յիշեցնենք, որ Երեւանի քաղխորհրդի եւ Սպահանի քաղաքապետարանի միջեւ 1995թ. մայիսի 5-ին ստորագրւել է համագործակցութեան համաձայնագիր: Այն ներառում է մշակոյթի, կրթութեան, տնտեսութեան, սպորտի եւ քաղաքների կառավարման, բազմաբնոյթ ցուցահանդէսների անցկացման բնագաւառները: Իսկ 2000թ. ապրիլի 27-ին Սպահանում ստորագրւել է Սպահանը եւ Երեւանը քոյր քաղաքներ հռչակելու համաձայնագիրը եւ շարունակւում է մշտական փոխգործակցութիւնը:

 Աղբիւր՝ www.yerkir.am

Վարչապետ Նիկոլ Փաշինեանը հեռախօսազրոյց է ունեցել Իրանի Իսլամական Հանրապետութեան նախագահ Հասան Ռոհանիի հետ: Այս մասին Yerkir.am-ին տեղեկացնում են վարչապետի աշխատակազմի տեղեկատւութեան եւ հասարակայնութեան հետ կապերի վարչութիւնից:  

Նիկոլ Փաշինեանը զրոյցի սկզբում Իրանի նախագահին եւ ողջ ժողովրդին շնորհաւորել է Ռամադանի սուրբ տօնի կապակցութեամբ:

Զրուցակիցները տեղեկատւութիւն են փոխանակել կորոնավիրուսի համաճարակի վերաբերեալ իրենց երկրներում տիրող իրավիճակի եւ դրա դէմ պայքարի առումով ձեռնարկւող քայլերի մասին: Նրանք երկուստեք ցաւակցութիւն են յայտնել համաճարակի պատճառով մահացածների համար: Նշւել է մարդկութեանը պատուհասած այս վտանգին դիմակայելու համար միջազգային հանրութեան միասնական ջանքերի գործադրման եւ երկկողմ համագործակցութեան կարեւորութիւնը:

Կողմերը գոհունակութիւն են յայտնել, որ չնայած հաղորդակցութեան ոլորտում ժամանակաւոր սահմանափակումներին, երկու երկրները շարունակում են առեւտրատնտեսական համագործակցութիւնը: Երկուստեք կարեւորւել է այդ ուղղութեամբ յետագայ քայլերի ձեռնարկումը:

Նիկոլ Փաշինեանը եւ Հասան Ռոհանին, մասնաւորապէս, ընդգծել են առեւտրատնտեսական համագործակցութեան նախաճգնաժամային ծաւալների վերականգնման նպատակով համապատասխան միջոցների ձեռնարկման պատրաստակամութիւնը՝ պահպանելով ստեղծւած իրավիճակով պարտադրւած սահմանափակումները:

Աւելին - Ն. Ջ. ՀԱՅ Մ. Մ. «ԱՐԱՐԱՏ» ՄԻՈՒԹԵԱՆ ՄՇԱԿՈՒԹԱՅԻՆ ՄԻԱՒՈՐԻ «ԿՌՈՒՆԿ» ԱՍՄՈՒՆՔԻ ԽՈՒՄԲԸ ՆՒԻՐՈՒՄ Է ՄԱՅՐԵՐԻ...

 Աղբիւր՝ www.alikonline.ir

Անհրաժեշտութիւն է առաջացել վերանայել Իրանի Իսլամական Հանրապետութեան հետ հաղորդակցութիւնը ժամանակաւորապէս սահմանափակելու մասին որոշում։

Այս մասին ֆէյսբուքեան ուղիղ եթերում ասաց առողջապահութեան նախարար Արսէն Թորոսեանը։ Գրում է Tert.am-ը:

Նա նշեց, որ Իրանի հետ սահմանին գործող երկշաբաթեայ սահմանափակումը կերկարաձգւի մինչեւ 2020 թւականի մարտի 24-ը ներառեալ։

«Սահմանափակումը կը տարածւի նաեւ Իրանից Հայաստան եւ Հայաստանից Իրան բեռնափոխադրումներ իրականացնող տրանսպորտային միջոցների նկատմամբ»,-ասաց նա։

Նախարարը նաեւ նշեց, որ կորոնավիրուսով վարակւած մէկ հոգու վիճակը լաւ է, գանգատներ չունեն նաեւ «Գոլդեն Փելիս» հիւրանոցում մեկուսացւած քաղաքացիները։

 Աղբիւր՝ www.alikonline.ir

Պարզաբանում է ԻԻՀ-ում ՀՀ արտակարգ եւ լիազօր դեսպան Արտաշէս Թումանեանը՝ «Ալիք»-ի հարցերին պատասխանելով:

Հ.- Ի՞նչ քայլեր են կատարւում ՀՀ դեսպանութեան կողմից կորոնավիրուսի հետ կապւած վերջին իրադարձութիւններից յետոյ:

Պ.- Նախ ասեմ, որ Հայաստանում անհանգստացած են բարեկամ երկրում ստեղծւած վիճակով եւ բոլորիս ցանկութիւնն է օր առաջ տեսնել այս համաճարակի յաղթահարումը, իսկ Իրանի բարեկամ ժողովրդին՝ առողջ եւ երջանիկ:

Ինչ վերաբերում է ՀՀ դեսպանութեանը, վերջին օրերին մշտական կապի մէջ ենք եղել ՀՀ եւ ԻԻՀ արտաքին գործերի, Առողջապահութեան նախարարութիւնների եւ այլ պետական մարմինների հետ՝ անհրաժեշտութեան դէպքում ապահովելով երկու կողմերի միջեւ ուղիղ հաղորդակցութիւն: Դեսպանութիւնում սահմանւած է մշտական հերթապահութիւն: Հրապարակւած են դեսպանութեան հետ կապ հաստատելու տւեալները: Մեզ դիմողներն ստանում են անհրաժեշտ տեղեկատւութիւն եւ գործնական աջակցութիւն: Ստեղծւած է Իրանում գտնւող ՀՀ քաղաքացիների տեղեկատւական բազա, եւ վերջիններիս հետ հաստատւած է մշտական կապ: Անհրաժեշտութեան դէպքում աջակցութիւն է ցուցաբերւում նաեւ դեսպանութիւն դիմած ԻԻՀ քաղաքացիներին:

Այսպիսով, բարձրացւած բոլոր հարցերն արձանագրւում են եւ խնդիրներին տրւում են իրավիճակից բխող լուծումներ:

Հ.- Ի՞նչ կասէք ՀՀ կառավարութեան կողմից կորոնավիրուսի տարածման դէմ կանխարգելիչ քայլերի եւ կառավարութեան՝ «Իրանի Իսլամական Հանրապետութեան հետ հաղորդակցութիւնը ժամանակաւորապէս սահմանափակելու մասին» որոշման վերաբերեալ:

Պ.- Ինչպէս գիտէք, կորոնավիրուսի տարածման վտանգը կանխարգելելու եւ այդ ուղղութեամբ մեր բարեկամ Իրանի հետ փոխգործակցութեան համակարգման նպատակով ժամանակաւոր՝ երկշաբաթեայ սահմանափակումներ են մտցւել Հայաստան-Իրան օդային եւ ցամաքային սահմանով հաղորդակցութեան վրայ:

Համաձայն կառավարութեան որոշման՝ Իրանում գտնւող ՀՀ քաղաքացիները եւ Հայաստանում գտնւող ԻԻՀ քաղաքացիներն անարգել կերպով կարող են վերադառնալ իրենց երկրներ:

ՀՀ քաղաքացիներին Իրանից Հայաստան փոխադրելու համար առաջիկայում կիրականացւի երկու թռիչք, իսկ ցամաքային սահմանով շարունակւում է ՀՀ քաղաքացիների վերադարձը Հայաստան, ինչպէս նաեւ ԻԻՀ քաղաքացիների վերադարձը՝ Իրան:

Ըստ կառավարութեան որոշման՝ իրականացւում են Իրանից Հայաստան աւտոտրանսպորտային բեռնափոխադրումները՝ համապատասխան սանիտարական վերահսկողութեան պայմաններում:

Հաղորդակցութեան սահմանափակումները չեն վերաբերում ՀՀ եւ ԻԻՀ պաշտօնական պատւիրակութիւններին, դիւանագէտներին եւ նրանց ընտանիքի անդամներին:

Հ.- Ինչպէ՞ս էք գնահատում Հայաստանում եւ Իրանում տւեալ հիւանդութեան տարածման դէմ իրականացւող պայքարը:

Պ.- Հայաստանում այս խնդրով զբաղւող կառավարական յանձնաժողովն ստեղծւել էր Չինաստանում սկիզբ առած համաճարակից յետոյ, որը յաջողութեամբ շարունակում է գործել:

Ինչ վերաբերում է Իրանին, ես կարծում եմ՝ այս ուղղութեամբ մեծ աշխատանք է իրականացւում եւ դրա արդիւնաւէտութիւնը երաշխաւորւում է ոչ միայն այս օրերին իրականացւող կանխարգելիչ եւ բուժական մեծ ծաւալի գործունէութեամբ, այլեւ Իրանի առողջապահական համակարգի մասնագիտական, կազմակերպական եւ տեխնիկական բարձր մակարդակով:

Շատ յուսադրող է նաեւ փետրւարի 25-ին ԻԻՀ նախագահ Հ. Ռոհանիի հնչեցրած յայտարարութիւնն ԻԻՀ Առողջապահութեան նախարարութեան համաճարակային դրական զեկոյցի մասին:

Հ.- Ի՞նչ դժւարութիւնների էք հանդիպում Ձեր աշխատանքներում:

Պ.- Թէեւ ստեղծւած վիճակը չափազանց անհանգստացնող է, սակայն ե´ւ պետական մարմինների, ե´ւ քաղաքացիների հետ յարաբերութիւններում առկայ է ՀՀ դեսպանութեան հետ համագործակցութեան մեծ պատրաստակամութիւն:

Իհարկէ կան նաեւ խոչընդոտներ: Որպէս խանգարող գործօն՝ կարող եմ նշել հասարակութեան մէջ տարածւող տարատեսակ լուրերը հիւանդութեան տարածման մասշտաբների մասին, մի բան, որ համոզւած եմ աւելի շատ կապւած է ապատեղեկատւութեան եւ երբեմն էլ ասեկոսէների հետ: Իմ կարծիքով այսպիսի դէպքերում ամենավնասակար ազդեցութիւնը կարող է ունենալ խուճապը, որը պէտք է հիմնովին բացառել:

Ի դէպ, տեղին է նշել, որ այս պայմաններում ՀՀ պետական մարմիններն առաջին հերթին իրենց աշխատանքի հիմքում դնում են ԻԻՀ-ից ստացւող պաշտօնական տեղեկատւութիւնը ու միաժամանակ համագործակցում միջազգային համապատասխան կառոյցների հետ:

Հ.- Ո՞րն է Ձեր ուղերձը մեր ընթերցողներին:

Պ.- Չլինելով այս ոլորտի մասնագէտ՝ կարծում եմ, որ ամենակարեւորը կազմակերպւածութիւնն է, ընտանիքում, աշխատանքի մէջ եւ հանրային վայրերում անձնական հիգիենայի կանոնների պահպանութիւնը, մասնագէտների խորհուրդներին հետեւելը:

Անձամբ ես եւ դեսպանութեան անձնակազմը լաւատես ենք եւ վստահ, որ բոլորիս համատեղ ջանքերով այս փորձութիւնը յաջողութեամբ կը յաղթահարւի:

 Աղբիւր՝ www.yerkirmedia.am

Վարչապետ Նիկոլ Փաշինեանն իր ֆէյսբուքեան էջում գրառում է կատարել, որում մասնաւորապէս ասւում է, որ կառավարութիւնը արտահերթ հեռակայ որոշում կընդունի Իրանի Իսլամական Հանրապետութեան հետ հաղորդակցութիւնը 2 շաբաթով դադարեցնելու մասին:

«Սիրելի հայրենակիցներ,

Հիմնւելով ՀՀ Պետական սահմանի մասին օրէնքի 16-րդ յօդւածի վրայ, որը վերաբերում է վարակիչ հիւանդութիւնների տարածման սպառնալիքի դէպքում պետական սահմանով հաղորդակցութեան ժամանակաւոր դադարեցմանը, կառավարութեանը արտահերթ հեռակայ որոշում կընդունի Իրանի Իսլամական Հանրապետութեան հետ հաղորդակցութիւնը 2 շաբաթով դադարեցնելու մասին։

Մասնաւորապէս, կը դադարեցւի Իրան-Հայաստան օդային հաղորդակցութիւնը ու Մեղրիի սահմանային անցակէտով անձանց մուտքը Հայաստան։

Տեղեկացնում եմ նաև, որ վաղը առաւօտեան տեղի կունենա Կորոնավիրուսի տարածումը կանխարգելող յանձնաժողովի նիստը, որի ընթացքում կը քննարկենք մեր հետագայ քայլերը, հաւանական սցենարները ու դրանցից բխող միջոցառումները։ Այս յանձնաժողովը, ի դէպ, գործում է յունւարի 31-ից։

Ամէն դէպքում՝ յարկ եմ համարում ընդգծել, որ խուճապային տրամադրութիւններ տարածելու ոչ մի հիմք չկայ: Նման գործողութիւնները բոլոր դէպքերում վնասակար են»,- գրել է վարչապետը։