Աղբիւր՝ www.yerkirmedia.am

 

Երեքշաբթի 18 Մարտ 2014-ի երեկոյեան ժամը 8-ին, Հ.Մ.Ա. Կազմակերպութեան Թաւրիզի մասնաճիւղի կենտրոնատեղիում, Միութեան մարզական յանձնախմբի հրաւէրով տեղի ունեցաւ մտերմիկ հաւաք, նախապատրաստական խորհրդատւութիւն իբրեւ, ամբողջական մասնակցութիւն բերելու Նոր Ջուղայում 20-25 Մարտին տեղի ունենալիք Իրանահայ Գարնանային 26-րդ խաղերին:

Մարզիչների եւ Վարչութեան կողմից ուղղութիւններ ու թելադրանքներ լսե-լուց յետոյ, խաղերին իրենց մասնակցութիւնը բերելու համար նախատեսւած անդամներին իր օրհնանքի խօսքը ասաց Ատրպատականի Հայոց Թեմի Առաջնորդ՝ Գերպ. Տ. Գրիգոր Ծ. Վրդ. Չիֆթճեանը:

Թեմակալ Առաջնորդը հայրական սիրով ողջունելով ներկայ պատանիներին ու պարմանուհիներին, մարզական ոգու ու մրցակցութեան դրական մթնոլորտի մասին արտայայտւելով, նաեւ խօսեց կարգապահութեան եւ Թեմի վարկը բարձր պահելու կեցւածքի մասին:

Նշենք, թէ այս առիթով Թեմակալ Առաջնորդը իր շնորհաւորանքի ու օրհնանքի խօսքն էր ուղղել Նոր Ջուղայի «Արարատ» Կազմակերպութեան Վարչութեանը, վերոյիշեալ խաղերի կազմակերպման 26-րդ տարւայ առիթով, որտեղ մասնաւորաբար ասւում էր. «Իրանահայ կեանքում նոր սերնդի դաստիարակութեան երախտարժան գործում իր կարեւոր ներդրումը ունեցող «Արարատ» Միութիւնը, իր բոլոր մասնաճիւղերով, հայ դպրոցի կողքում այն ամուր միջնաբերդն է, որը հայու ոգին պատսպարում, աճեցնում ու արդիւնաւորում է գաղութային մեր կեանքում:

«Արարատ»ի հարազատ այս տան մէջ, Իրանահայ երեք Թեմերից ժամանած մեր պատանիները, պարմանուհիները, երիտասարդներն ու երիտասարդուհիները ազգային հնոցի բովից են անցնում, թրծելով իրենց հայու դիմագիծը ու կռանելով ցեղի կամքը:

 

 

Մրցութիւնների դրական ոգին այս յարկից մի օր պիտի տեղափոխւի մեր ազգային կեանքի բեմահարթակ, որտեղ մեր եկեղեցու, ազգի ու հայրենիքի յառաջդիմութեան վազքի պիտի վերածւի: Վերջապէս, մրցութիւնները յառաջ են բե-րում շարժում, որը պէտք է հունաւորել եւ դարձնել արդիւնաշատ գործունէութիւն»:

Հանդիպումը նաեւ առիթ հանդիսացաւ Վարչական կազմի հետ առանձին զրուցելու յառաջիկայ ծրագրերի մասին, որոնք ընդհանրապէս «Արարատ»ի Թաւրիզի մասնաճիւղի բոլոր յանձնախմբերի աշխատանքները աշխուժացնելու նպատակ ունէին:

 

Ատրպատական, Ազգային Առաջնորդարան