Աղբիւր՝ www.yerakouyn.com
Ապրիլի 8-ի յետմիջoրէին, միջեկեղեցական կարեւոր մի հանդիպում տեղի ունեցաւ Անթիլիասի մայրավանքում նախագահութեամբ Վեհափառ Հայրապետի: Հանդիպմանը ներկայ գտնւեցին քաթոլիկ ասորիների պատրիարք Եուհանը, Բէյրութի մարոնիների Մաթար Արքեպիսկոպոսը, լեռնալիբանանի ուղղափառ ասորի մեթրոպոլիտ Ժորժ Սալիպան, Միջին արեւելքի եկեղեցիների խորհրդի Լիբանանի գործադիր վարչութեան անդամները եւ միջեկեղեցական շարժմանը նիւթապէս նպաստող հոլանդական ու շւեդական եկեղեցիների ներկայացուցիչները:
Յիշեալ հանդիպումից առաջ Հոլանդիայի եւ Շւէդի եկեղեցիների ներկայացուցիչները Միջին արեւելքի եկեղեցիների խորհրդի ընդհանուր քարտուղարի հետ միասին առանձին հանդիպում ունեցան Վեհափառ Հայրապետի հետ: Խորհրդակցութեան առանցքը կազմեց Միջին արեւելքի եկեղեցիներին կատարւած աջակցութիւնն աւելի կազմակերպելու հրամայականը:
Ընդլայնւած ժողովում լայնօրէն քննարկւեցին Միջին արեւելքի եկեղեցիների խորհրդի գործունէութեան տնտեսական ու վարչական մարզերին առնչւած մի շարք հարցեր: Արամ Ա Կաթողիկոսը կարեւորութեամբ ընդգծեց Միջին արեւելքի եկեղեցիների խորհրդի ներկայ կառոյցը վերատեսութեան ենթարկելու եւ խորհրդի աշխատանքներին նոր մղում տալու անհրաժեշտութիւնը՝ նկատի ունենալով Միջին արեւելքում քրիստոնեաների դիմագրաւած մարտահրաւէրները: