Աղբիւր՝ www.yerakouyn.com

Համացանցի վրայ է Հայաստանի եւ Արցախի մասին պատմող CNN-ի հաղորդավար Էնթընի Պուրտենի կողմէ նկարահանուած ֆիլմին ամբողջական տեսագրութիւնը: Ֆիլմը ցուցադրուած է Մայիս 20-ին, «Անծանօթ վայրեր. Հայաստան» հաղորդման ծիրէն ներս:

Ըստ Armenpress.am-ի՝ ֆիլմը պատրաստուած է ՀՀ տնտեսական զարգացման եւ ներդրումներու նախարարութեան զբօսաշրջութեան պետական կոմիտէի եւ Արցախի Հանրապետութեան մշակոյթի, երիտասարդութեան հարցերու եւ զբօսաշրջութեան նախարարութեան աջակցութեամբ:

Ֆիլմի նկարահանման ողջ ընթացքին անոր ուղեկցած է յայտնի հայ երաժիշտ, System of a Down խումբի մենակատար Սերժ Թանկեան, որ կը կիսուի Հայաստանի, հայոց պատմութեան ու հայկական խոհանոցի մասին իր գիտելիքներով: Ֆիլմին մէջ, հեղինակ Պուրտեն կ՝անդրադառնայ Հայոց Ցեղասպանութեան, 1988 թուականի երկրաշարժին, արցախեան պատերազմին, Հայաստանի՝ հարեւաններու հետ ունեցած յարաբերութիւններուն, կ՝այցելէ Հայաստանի ու Արցախի գեղատեսիլ վայրեր: Ան կը համտեսէ հայկական խոհանոցի տարբեր աւանդական կերակրատեսակներ: