Աղբիւր՝ www.yerkirmedia.am

«Մայր Աթոռ Սուրբ Էջմիածնից Հայրապետական Մեր օրհնութիւնն ու շնորհաւորանքներն ենք յղում համայն մեր ժողովրդին` Մայիսի 9-ի` Յաղթանակի եւ խաղաղութեան պանծալի տօնի, Շուշիի ազատագրման եւ Արցախի Պաշտպանութեան բանակի հիմնադրման ցնծաբեր օրերի առիթով:

Մայիսեան այս եռատօն խորհուրդն ու տօնակատարութիւնները կրկին բերկրանքով են լցնում մեր հոգիները: Այսօր անդրադառնում եւ վերարժեւորում ենք մեր ժողովրդի ներդրած այն շօշափելի ջանքերը, որոնք նպաստեցին Մեծ Հայրենական պատերազմում յաղթանակի կերտմանը եւ աշխարհում խաղաղութեան հաստատմանը: Արցախեան ազատագրական պայքարում այս յաղթական օրը մեր հերոս զաւակները անկոտրում կամքով ու քաջարի ոգով ազատագրեցին ռազմավարական կարեւոր նշանակութիւն ունեցող եւ ազգային մեր մշակոյթի նշանաւոր կենտրոն Շուշի քաղաքը: Այդ որոշիչ օրերին կազմաւորւեց նաեւ Արցախի ապահովութեան եւ խաղաղութեան երաշխիք հանդիսացող Պաշտպանութեան բանակը:

Այսօր, հակառակ մեր ժողովրդի խաղաղասէր ոգու, շարունակում է առաջնային մնալ յարձակումներից մեր երկրի սահմանների պաշտպանութիւնը: Պատերազմական այս մարտահրաւէրների առջեւ մենք պարտաւորւած ենք ազգային համախմբւածութեան, մեզ համար հրամայական է հայրենիքի շէնացումը ու մեր անվտանգութեան գրաւական հանդիսացող հայոց բանակի զօրացումը:

Մեր աղօթքն ու հայցն է առ Աստւած, որպէսզի Բարձրեալ Տէրը լուսեղէն երկնային յարկերում հանգստութիւն շնորհի հայրենիքի համար զոհւած մեր հերոս զաւակների հոգիներին, խաղաղութիւն պարգեւի համայն աշխարհին, զօրացնի եւ ապահովութեան մէջ պահի հայրենի մեր պետականութիւնը եւ մեր ժողովրդին այժմ եւ յաւիտեանս. ամէն»: