Աղբիւր՝ www.yerakouyn.com

Վարդենիս-Մարտակերտ ճանապարհի վերակառուցման աշխատանքները կը մօտենան իրենց աւարտին: Ծրագրի իրականացման նպատակաուղղուած են Հեռուստամարաթոն 2013 եւ 2014-ի հանգանակութիւնները: Խոշորածաւալ ձեռնարկը աւարտին հասցնելու նպատակով միջոցներ յատկացուած են նաեւ Հայաստանի եւ Լեռնային Ղարաբաղի կառավարութիւններուն կողմէ: Ճանապարհի շինարարութիւնը կը շարունակուի Հիմնադրամի ռազմավարական եւ նպատակային ծրագիրներուն զուգահեռ: Այս մասին կը հաղորդէ «Հայաստան» համահայկական հիմնադրամի պաշտօնական կայքը։

Առաջ դժուարանցանելի այս ճանապարն ունի 10 եւ աւելի մեթր լայնութիւն, որմէ 7 մեթրը կը կազմէ ասֆալտապատ երթեւեկելի հատուածը: Նախորդ տարուայ ընթացքին շինուած են արհեստական կառուցուածքներ, որոնց շարքին` ջրահեռացման խողովակներ, ափապաշտպան կառոյցներ, յենապատեր ու եզրաքարեր, ինչպէս նաեւ վերանորոգուած են մէկ տասնեակ մեծ ու փոքր կամուրջները: Բնակավայրերով անցնող հատուածներուն մէջ, մասնաւորապէս՝ Գետաւանի եւ Եղէգնուտի, կառուցուած են մայթեր:

Ասֆալտի որակի ստուգման եւ վերահսկման նպատակով տարբեր տեղամասերէ վերցուած հանքային նիւթերը, հանուկները եւ արտադրուած ասֆալտի նմուշները պարբերաբար ուղարկուած են տարրալուծական ստուգման:

Հոկտեմբեր 24-ի դրութեամբ ճանապարհի 110 քմ․-ը ասֆալտապատ է, որմէ 88քմ․-ը` երկշերտ ծածկոյթով: Սոթքին յաջորդող ոլորապտոյտներու 4քմ․-ի վրայ կը շարունակուին հողային աշխատանքները: Շինարարութեան ամբողջ ընթացքին ճանապարհը երթեւեկելի եղած է բոլոր տեսակի մեքենաներու համար:

Ուղիղ կապ ապահովելով Հայաստանի եւ Արցախի հիւսիսային շրջաններու միջեւ, նոր մայրուղիի գործարկումը ոչ միայն զգալիօրէն պիտի կրճատէ այն ժամանակահատուածը, որ այսօր անհրաժեշտ է Գորիս-Ստեփանակերտ ճանապարհով մէկ հանրապետութենէն միւսը ուղեւորուելու համար, այլ պիտի ամրապնդէ միջհամայնքային կապերը, պիտի նպաստէ յարակից համայնքներու տնտեսական զարգացման, պիտի խթանի զբօսաշրջութիւնը` աշխուժացնելով մեր երկու հանրապետութիւններու ընկերա-տնտեսական կեանքը: Ճանապարհը հնարաւորութիւն պիտի տայ նաեւ ծանօթանալու մեր պատմամշակութային յուշարձաններուն ու վայելելու հայրենի բնաշխարհի գեղեցկութիւնը:

Նախորդ տարիներուն ճանապարհի մերձակայ համայնքներուն մէջ իրականացուած են շարք մը ենթակառուցուածքներ. Քարվաճառն ու Գետաւանը ունին կանոնաւոր ջրամատակարարում, Չափարը, Վերին Յոռաթաղն ու Վաղուհասը` նորակառոյց դպրոցներ: Ներկայիս համայնքային կեդրոններ կը կառուցուին Գետաւան եւ Կոճողուտ գիւղերուն մէջ:

Բարեկարգ մայրուղիի առկայութիւնը հնարաւորութիւն կու տայ ոչ միայն կեանքի կոչելու շրջակայ համայնքներուն կեանքն ու կենցաղը բարելաւող ընկերա-տնտեսական ենթակառուցուածքներ, այլեւ զարկ կու տայ գործար եւ զարգացման ծրագրերուն` գիւղացիին ապահովելով կայուն եկամուտով եւ փոխելով անոր կեանքի որակը: