Նոյեմբերի 7-ին եւ լոյս 8-ի գիշերը փոփոխական ինտենսիւութեամբ մարտերը շարունակւել են ճակատային գծի բոլոր ուղղութիւններում: Այս մասին իր ֆէյսբուքեան էջում գրել է ՊՆ մամուլի խօսնակ Շուշան Ստեփանեանը։

Առաւել յամառ գործողութիւններ են ծաւալւել Շուշիի մերձակայքում եւ հարաւարեւելեան հատւածում: ՊԲ ստորաբաժանումները թշնամուն հասցրել են թիրախային հարւածներ` յետ մղելով առաջխաղացման բազմակի փորձերը:

Տարբեր ուղղութիւններում ծաւալւած մարտերի ընթացքում ոչնչացւել է թշնամու մեծաթիւ կենդանի ուժ, 4 տանկ, 20 միաւոր այլ զրահատեխնիկա, 11 միաւոր աւտոտեխնիկա, 2 ԱԹՍ:

Մարտական գործողութիւններին զուգահեռ հակառակորդը հրթիռահրետանային համակարգերով թիրախաւորել է նաեւ մայրաքաղաք Ստեփանակերտը եւ Շուշին: Վնասւել են քաղաքացիական ենթակառուցւածքներ:

Լուսադէմին դիտարկւել են հակառակորդի տեխնիկայի եւ անձնակազմի կուտակումներ ճակատային գծի հարաւարեւելեան եւ հիւսիսարեւելեան հատւածներում:

Բանակային ստորաբաժանումները վերահսկում են օպերատիւ-մարտավարական իրադրութիւնը եւ քայլեր են ձեռնարկում կրակային խոցման ուղղութեամբ:

 

Աղբիւր՝ www.yerkir.am 

 

Ֆրանսիայի Ազգային ժողովի 39 պատգամաւոր դիմել են նախագահ Էմանուէլ Մակրոնին` կոչ անելով Արցախի հարցում չէզոքութիւն չցուցաբերել եւ ճանաչել Արցախի անկախութիւնը: Այս մասին «Թւիթեր»-ի իր միկրոբլոգում գրել է Ֆրանսիայի ԱԹ պատգամաւոր Գի Տեսիենը:

Պատգամաւորները նախագահին ուղղւած իրենց կոչում ընդգծել են, որ միայն միջազգային ճանաչումը, ինչպէս Կոսովոյի դէպքում, թոյլ կը տայ Արցախին դուրս գալ այն գօտուց, որը թոյլ չի տալիս ստանալ միջազգային, հումանիտար աջակցութիւն:

 

Աղբիւր՝ www.yerkir.am 

 

Իրանն անհանգստանում է Լեռնային Ղարաբաղի հակամարտութեան գօտում մարդկային կորուստների եւ քաղաքացիական անձանց հասցւող վնասների առնչութեամբ: Ինչպէս փոխանցում է Isna գործակալութիւնը, այդ մասին Իրանի արտգործնախարար Մոհամմադ Ջաւադ Զարիֆը յայտարարել է լրագրողների հետ զրոյցում:

«Մենք անհանգստանում ենք նաեւ ծայրայեղական խմբաւորումների` հակամարտութեան գօտի մուտք գործելու առնչութեամբ, եւ դա սպառնալիք է ոչ միայն Իրանի, այլեւ ամբողջ տարածաշրջանի խաղաղութեան ու կայունութեան համար: Այդ պատճառով մենք հաւատացած ենք, որ այս պատերազմը պէտք է աւարտւի»,- ասել է Զարիֆը:

Անդրադառնալով ԼՂ հակամարտութեան կարգաւորման Իրանի ծրագրին` Զարիֆը նշել է, որ հակամարտող կողմերը, Ռուսաստանն ու Թուրքիան ուսումնասիրում են ծրագիրը, եւ Իրանը պատասխանի է սպասում:

 

Աղբիւր՝ www.yerkir.am 

 

Իտալիայի Տրենտոյ շրջանի եւս մէկ համայնք` Նոգարէդոն, ճանաչել է Արցախի Հանրապետութեան անկախութիւնը: Այս մասին տեղեկացնում է Իտալիայում ՀՀ դեսպանութիւնը:

 

Աղբիւր՝ www.yerkir.am 

 

Պատերազմական գործողութիւններին զուգահեռ թշնամական կողմը շարունակում է հեռահար հրթիռներով աւերել խաղաղ բնակավայրերը: Այս մասին յայտնում են Արցախի ԱԻՊԾ-ը:

Ստեփանակերտում վերջին մէկ ժամւայ ընթացքում երեք անգամ միացել է տագնապի ազդանշանը:

Թշնամին ոչ թիրախային հարւածներ է հասցնում բնակելի թաղամասերի ու հանրային նշանակութեան օբյէկտների վրայ:

Տուժածներ չկան: Աւերածութիւնները շատ են:

 

Աղբիւր՝ www.nkrmil.am 

Նոյեմբերի 6-ին եւ լոյս 7-ի գիշերը ճակատային գծի բոլոր հիմնական ուղղութիւններում մարտական գործողութիւնները շարունակւել են: Առաւել յամառ ու ինտենսիւ մարտեր են ընթացել Շուշի-Քարին տակ հատւածում: Բանակային ստորաբաժանումները յաջողութեամբ կասեցրել են թշնամական ուժերի յարձակման բազմակի փորձերը` ոչնչացնելով մեծ քանակութեամբ մարդկային ուժ: Նշւած ժամանակահատւածում առանձնայատուկ արդիւնաւէտութեամբ աչքի են ընկել յատկապէս ՊԲ հրետանային ստորաբաժանումները: Օպերատիւ-մարտավարական իրադրութիւնը ճակատային գծի բոլոր ուղղութիւններում մնացել է անփոփոխ: Անփոփոխ է մնացել նաեւ մարտական գործողութիւններին զուգահեռ հանրապետութեան խաղաղ բնակավայրերը հրթիռահրետանային կրակով թիրախաւորելու` թշնամական ուժերի մարտավարութիւնը: Հարաւ-արեւելեան եւ հարաւային ուղղութիւններում իւրային ուժերի կողմից խոցւել է նաեւ թշնամական ուժերի անձնակազմ տեղափոխող 2 միաւոր աւտոտեխնիկայ եւ 4 ԱԹՍ:

Թշնամական ուժերի կողմից յարձակման փորձերը հիմնական ուղղութիւններում շարունակւում են: ՊԲ ստորաբաժանումները անհրաժեշտ միջոցառումներ են իրականացնում դրանք կասեցնելու, հակառակորդի խմբաւորումների յայտնաբերման եւ կրակային խոցման ուղղութեամբ:

 

ԱՀ ՊՆ մամուլի ծառայութիւն

 

 

Աղբիւր՝ www.yerkir.am 

 

Ուրուգւայի ամենամեծ նահանգներից Փայսանդու նահանգի խորհրդարանը 28 կողմ ձայներով միաձայն ընդունել է Արցախի անկախութիւնը:

Այս մասին տեղեկանում ենք Արցախի Հանրապետութեան Ազգային ժողովի ֆէյսբուքեան էջից:

 

Աղբիւր՝ www.yerkir.am 

 

Կատալոնական Բերգա քաղաքը ճանաչել է Արցախի Հանրապետութեան անկախութիւնը: Այս մասին յայտնում է Բարսելոնայի մշակութային «Հայաստան» ասոցիացիան, որն իր ֆէյսբուքեան էջում տեղադրել է Aqui Bergueda թերթի` այդ մասին հրապարակումը:

«Քաղաքային խորհրդի լիագումար նիստը` Բարսելոնայի Հայկական Մշակութային Միութեան առաջարկով` ձայների մեծամասնութեամբ ընդունել եւ ճանաչել է Արցախի Հանրապետութեան անկախութիւնը, ազգերի ինքնորոշման իրաւունքը եւ տարածքային ինքնիշխանութիւնը»,- ասւում է հաղորդագրութեան մէջ:

Ընդունւած բանաձեւը նաեւ դատապարտում է Ադրբեջանի ագրեսիան ընդդէմ Արցախի Հանրապետութեան, խօսւում է այն մասին, որ Ադրբեջանը ռազմական յանցագործութիւններ է կատարել` մասնաւորապէս, խաղաղ բնակչութեան դէմ կիրառելով կասետային ռումբեր, ռմբակոծել ու հրթիռակոծել է քաղաքներ, յուշարձաններ, եկեղեցիներ, ինչպէս նաեւ գնդակահարել գերիների:

 

Աղբիւր՝ www.yerkir.am 

Վարչապետ Նիկոլ Փաշինեանը հարցազրոյց է տւել The Jerusalem Post պարբերականին: Հարցազրոյցի ամբողջական տարբերակը ներկայացւում է ստորեւ:

The Jerusalem Post – Պարոն վարչապետ, շնորհակալ եմ հարցազրոյցի հնարաւորութեան համար: Երկու կողմից էլ հարիւրաւոր, հազարաւոր զոհեր կան: Ինչպէ՞ս է այս ամէնն աւարտւելու:

Վարչապետ Նիկոլ Փաշինեան – Ըստ էութեան, Ադրբեջանը պէտք է հրաժարվի Ղարաբաղի հարցը ռազմական ճանապարհով լուծելու իր տրամաբանութիւնից: Որովհետեւ խնդիրն առաջացել է հենց այն բանից, որ Ադրբեջանը շարունակաբար զարգացնում էր հարցը ռազմական ճանապարհով լուծելու տրամաբանութիւնը: Եւ երբ Ադրբեջանի համար պարզ դարձաւ, որ սեփական միջոցներով չի կարողանալու այդ տրամաբանութիւնն առաջ մղել, ի՞նչ տեղի ունեցաւ: Նա դիմեց Թուրքիայի օգնութեանը, որն իր հերթին Սիրիայի՝ իր հսկողութեան տակ գտնւող տարածքներից Ադրբեջան է տեղափոխել հազարաւոր վարձկանների: Որից յետոյ Թուրքիան, Ադրբեջանը, վարձկանները, ահաբեկիչները համատեղ յարձակում են սկսել Լեռնային Ղարաբաղի վրայ:

Սա նկարագրում եմ՝ արձանագրելու համար իրավիճակի բարդութիւնը: Որովհետեւ, ինչպէս տեսնում ենք, այստեղ մէկ սուբյեկտ չէ, որ ներգրաւված է պրոցեսի մէջ: Եւ սրանով արդէն իրավիճակը շատ աւելի բարդանում է: Որովհետեւ հարցը այս ամէնի պատճառով, իմ կարծիքով, դուրս է եկել զուտ Լեռնային Ղարաբաղի խնդրի տրամաբանութիւնից: Որովհետեւ, էլի եմ ասում, այստեղ ներգրաւված են վարձկաններ, ում ներկայութիւնը տարածաշրջանում սպառնալիք է ոչ միայն Լեռնային Ղարաբաղի, Հայաստանի համար, այլեւ Իրանն է յայտարարում, որ դա ընկալում է որպէս սպառնալիք, Ռուսաստանն է յայտարարում, որ դա ընկալում է որպէս սպառնալիք: Եւ թոյլ տւէք ասել, իմ կարծիքով, Եւրոպայում եւ աշխարհում տեղի ունեցող վերջին շրջանի մի շարք իրադարձութիւնները, թեկուզ անուղղակիօրէն, կապ ունեն այն զարգացումների հետ, որ տեղի են ունենում Լեռնային Ղարաբաղում եւ Թուրքիայի ապակառուցողական դիրքորոշումների հետ:

Իսկ Ձեր հարցի պատասխանը կարճ հետեւեալն է. Ադրբեջանը պէտք է հրաժարվի իր մաքսիմալիստական նկրտումներից եւ պէտք է հրաժարվի Լեռնային Ղարաբաղի հայութեանը ցեղասպանութեան ենթարկելու իր յայտարարած քաղաքականութիւնից:

The Jerusalem Post – Հակամարտութիւնը շարունակվում է արդէն մի քանի տասնամեակ: Ո՞վ քաշեց ձգանը այս պահին: Թուրքիա՞ն, ո՞վ:

Վարչապետ Նիկոլ Փաշինեան – Ես արդէն, ըստ էութեան, ասացի նախորդ հարցին ի պատասխան, որ, այո, դա Թուրքիայի միջամտութիւնն է: Որի պատճառը դարձաւ այն, որ Ադրբեջանը հասկացաւ, որ ինքն ի վիճակի չէ ռազմական ճանապարհով սեփական ուժերով լուծել Ղարաբաղի հարցը: Եւ նա դիմեց Թուրքիայի օգնութեանը: Թուրքիան էլ իր հերթին վարձկանների հաւաքագրեց եւ տեղափոխեց Ադրբեջան՝ ունենալով սեփական քաղաքական շահը եւ նպատակները:

The Jerusalem Post – Կը խնդրէի պարզաբանէք՝ դա Թուրքիայի՞, թէ՞ Ադրբեջանի նախաձեռնութիւնն էր:

Վարչապետ Նիկոլ Փաշինեան – Գիտէք, կարծում եմ, դա համատեղ նախաձեռնութիւն է: Ցանկանում եմ արձանագրել, որ մենք նախկինում ունէինք անուղղակի ապացոյցներ վարձկանների ներգրաւվածութեան վերաբերեալ, հիմա ունենք կոնկրետ ապացոյցներ: Եւ այդ ապացոյցները հետեւեալն են՝ Լեռնային Ղարաբաղի Պաշտպանութեան բանակը 2 վարձկան գերի է վերցրել: Նրանցից մէկն արդէն համապարփակ ցուցմունք է տւել՝ որ ինքն ապրելիս է եղել Թուրքիայի հսկողութեան տակ գտնւող սիրիական տարածքներում, փախստականների ճամբարում: Պատմել է, թե ինչպէս են իրեն հաւաքագրել, պատմել է, թէ որտեղ են իրենց ներգրաւվել պրոցեսի մէջ, պատմել է, թէ ինչպէս են իրենք անցել Թուրքիայի սահմանը պաշտօնական անցակէտով, բայց առանց որեւէ հարցուփորձի: Դեռ մինչեւ սահմանն անցնելը նրանց անձնագրերը եւ բոլոր փաստաթղթերը հաւաքել են: յետոյ Թուրքիայի տարածքում տեղափոխել են ինչ-որ մի օդանաւակայան, այդ օդանաւակայանից թուրքական ինքնաթիռով տեղափոխել են մէկ այլ օդանաւակայան, որտեղից էլ ադրբեջանական ինքնաթիռով տեղափոխվել են Ադրբեջան՝ ընդ որում, այս ընթացքում չունենալով ոչ մի փաստաթուղթ: Նրանց ոչ ոք որեւէ հարց չի տւել, թէ ովքեր եք, ուր եք գնում եւ այդպէս շարունակ: Նրանք, տեղափոխվելով Ադրբեջան, ամսական 2000 դոլար վճարի դիմաց ներգրաւվել են որպէս վարձկան: Այսպիսի հազարաւոր վարձկաններ են մասնակցում Լեռնային Ղարաբաղի դէմ պատերազմին: Եւ ես կարծում եմ, որ այս իրավիճակը պէտք է դառնայ միջազգային հետաքննութեան առարկայ:

The Jerusalem Post – Ովքե՞ր են այդ մարդիկ, նրանք իսլամիստնե՞ր են, ովքե՞ր են նրանք:

Վարչապետ Նիկոլ Փաշինեան – Ենթադրաբար մի մասը ծայրահեղական խմբավորումների ներկայացուցիչներ են, միւս մասը՝ Թուրքիայի հսկողութեան տակ գտնւող Սիրիայի տարածքի բնակիչներ, ովքեր գումարի դիմաց ներգրաւվել են այս գործընթացում:

The Jerusalem Post – Կը խնդրէի ասէք՝ որքանո՞վ էք մտահոգված այն առումով, որ սա կարող է վերաճել տարածաշրջանային լայնածաւալ առճակատման՝ ներառելով Ռուսաստանը, Թուրքիան, կամ միգուցէ Իրանը: Կա՞ հաւանականութիւն, որ այն կպայթի հէնց հիմա:

Վարչապետ Նիկոլ Փաշինեան – Գիտէք, ես չեմ կարող ճշգրիտ կանխատեսում անել: Բայց արդէն ասացի, որ եւ՛ Իրանի Իսլամական Հանրապետութիւնը, եւ՛ Ռուսաստանը յայտարարել են, որ վարձկանների ներկայութիւնը տարածաշրջանում սպառնալիք է իրենց անվտանգութեանը: Տեսէք, թէ ինչ է տեղի ունենում. Ղարաբաղի պատերազմը մեկնարկելուց յետոյ մենք Հիւսիսային Կովկասից՝ Ռուսաստանի հիւսիսկովկասեան հանրապետութիւններից, լսեցինք ահազանգեր, որ ռուսաստանցի իրաւապահ մարմինները չեզոքացրել են ահաբեկիչների խմբերի, որոնք ներթափանցել են արտերկրից, որոնք ներթափանցել են Սիրիայից: Եւ այդտեղ թափանցիկ ակնարկ կար, որ դրանք հէնց այս վարձկանների խմբերն են, խմբերի ներկայացուցիչներն են, որոնք ներթափանցել են Ռուսաստանի տարածք: Իրանն այս իրավիճակի շուրջ չափազանց մտահոգված է:

Գործնականում պատերազմը միշտ էլ անկանխատեսելիութեան որոշակի տարր պարունակում է: Եւ որեւէ մէկը չի կարող ասել, թէ մենք 100 տոկոսով կարող ենք կանխատեսել, թէ ինչպիսի շրջանակներում կմնայ սա: Բայց մեծ հաշւով այստեղ աւելի կարեւոր է հետեւեալը՝ այս մեխանիզմը, որի մասին ես խօսեցի, եւ որն արդէն իսկ հիմնաւորւում է կոնկրետ փաստերով, որպէս մեխանիզմ այլեւս կոնկրետ գործող մեխանիզմ է, որը կարող է գործել աշխարհի ամենատարբեր մասերում:

Եւ ես պատահական չասացի: Սա Թուրքիայի վարած քաղաքականութիւնն է եւ այն քաղաքականութեան շարունակութիւնը, որ նա վարում է Միջերկրականում՝ Հունաստանի, Կիպրոսի հետ հարաբերութիւններում, Լիբիայում, Սիրիայում, Իրաքում: Հասկանո՞ւմ էք՝ բոլորովին նոր մեխանիզմ է սկսել աշխատել: Եւ թէ այդ մեխանիզմը որտեղ ինչ դրսեւորում կունենայ, արդէն շատ դժւար է ասել: Ես կարծում եմ, որ այդ իմաստով մենք անկանխատեսելիութեան որոշակի դաշտ ենք մտել՝ այնքան ժամանակ, քանի դեռ միջազգային հանրութիւնը Թուրքիայի այս գործողութիւններին շատ կոնկրետ արձագանք եւ պատասխան չի տւել:

The Jerusalem Post – Իսկ աւելի կոնկրետ՝ ո՞րն է Թուրքիայի նպատակն այս հակամարտութեան մէջ:

Վարչապետ Նիկոլ Փաշինեան – Օսմանեան կայսրութեան վերականգնում, ինչքան էլ դա տարօրինակ է հնչում:

The Jerusalem Post – Դուք դիմել էք Ռուսաստանի նախագահ Վլադիմիր Պուտինին՝ Մոսկւայի հետ Հայաստանի անվտանգութեան պայմանագրի շրջանակում աջակցելու խնդրանքով: Ի՞նչ աջակցութիւն էք ակնկալում:

Վարչապետ Նիկոլ Փաշինեան – Գիտէք, մենք ունենք դաշնակցային հարաբերութիւններ Ռուսաստանի Դաշնութեան հետ եւ ունենք պայմանագիր համագործակցութեան վերաբերեալ: Այդ պայմանագիրը նախատեսում է անվտանգութեան ընդհանուր մարտահրաւերներին ընդհանուր դիմակայում: Ես այս ընթացքում մշտական կապի մէջ եմ եղել Ռուսաստանի Դաշնութեան նախագահ Վլադիմիր Պուտինի հետ: Մենք անընդհատ խորհրդակցութիւնների մէջ ենք եղել եւ հետեւել ենք զարգացումներին: Եւ քանի որ ռազմական գործողութիւնները մօտեցել են Հայաստանի սահմանին, եւ կայ սպառնալիք, որ այդ գործողութիւնները կարող են անմիջական վտանգ ներկայացնել Հայաստանի տարածքի համար, մենք պայմանագրով նախատեսված ընթացակարգեր ենք մեկնարկել, որպէսզի շարունակենք մեր խորհրդակցութիւնները՝ իրավիճակի հետագայ կառավարման վերաբերեալ:

Իսկ ընդհանուր առմամբ կարող եմ ասել, որ Ռուսաստանը, այս իրավիճակում Հայաստանին աջակցելու համար, անում է այն ամէնը, ինչ հնարաւոր է այս պահին: Եւ Հայաստանն ընդհանուր առմամբ գոհ է Հայաստանի նկատմամբ Ռուսաստանի դաշնակցային պարտաւորութիւնների կատարման որակից:

The Jerusalem Post – Ձեր հիշատակած անվտանգութեան մեխանիզմի շրջանակում հաւանական համարո՞ւմ էք, որ Ռուսաստանը զօրք կուղարկի Հայաստանի սահման:

Վարչապետ Նիկոլ Փաշինեան- Ռուսաստանի զօրքերն արդէն գտնւում են Հայաստանի սահմաններին, եւ դա նորութիւն չէ: Նրանք միշտ էլ այստեղ են եղել, եւ Հայաստանի տարածքում Ռուսաստանն ունի 102-րդ ռազմաբազան: Բացի 102-րդ ռազմաբազայից, արդէն ասացի, որ Հայաստանի սահմանները՝ մասնաւորապէս, Թուրքիայի եւ Իրանի հետ սահմանները պահպանվում են ռուսական սահմանապահ զօրքերի կողմից: Եւ այժմ ռուսական սահմանապահները ներկայացուցիչներ ունեն նաեւ մեր սահմանի այլ հատւածներում:

The Jerusalem Post – Ասացէք, խնդրեմ, ո՞վ է հիմա լավագոյնս համապատասխանում միջնորդի դերին: ԵԱՀԿ Մինսկի խումբը տարիների ընթացքում շատ յաջողութիւններ չի արձանագրել: Ո՞ւմ պէտք է ներգրաւվել՝ իրավիճակը հանգստացնելու համար:

Վարչապետ Նիկոլ Փաշինեան – Իհարկէ, ԵԱՀԿ Մինսկի խումբը շարունակում է մնալ Ղարաբաղի հարցի կարգաւորման միակ միջազգային ձեւաչափը: Բայց պէտք է նաեւ արձանագրել, որ գործնականում Ռուսաստանը հիմա ամենաակտիւ միջնորդական ջանքեր գործադրող պետութիւնն է: Եւ սա ինչ-որ տեղ հասկանալի է, որովհետեւ Ռուսաստանն անմիջապէս տարածաշրջանում ներկայ է, Ռուսաստանն ինքը մեր տարածաշրջանի երկիր է:

The Jerusalem Post – Կարո՞ղ է արդեօք Իսրայէլը, Ձեր կարծիքով, որեւէ դեր խաղալ կարգաւորման միջնորդութեան հարցում՝ հաշւի առնելով լաւ կապերը..

Վարչապետ Նիկոլ Փաշինեան – Գիտէք, Իսրայէլը հիմա շատ ակտիւօրէն ներգրաւված է կոնֆլիկտի մէջ: Որովհետեւ իսրայէլական անօդաչու թռչող սարքերն են ակտիւօրէն ներգրաւված Լեռնային Ղարաբաղի դէմ պայքարում: Եւ, կարծում եմ, Իսրայէլը մտածելու հետեւեալն ունի, որ փաստօրէն վարձկանները, ահաբեկիչները եւ Իսրայէլը, ըստ էութեան, գտնւում են նոյն կողմում: Իսրայէլն ինքը պէտք է մտածի, թէ սա որքանով հարմար դիրք է իր համար:

The Jerusalem Post – Պարոն վարչապետ, դուք հետ էք կանչել ձեր դեսպանին՝ Իսրայէլի կողմից զէնքի վաճառքի պատճառով: Արդեօք Իսրայէլի հետ համատեղ ձեռնարկվո՞ւմ են քայլեր՝ լարւածութիւնը հարթելու ուղղութեամբ:

Վարչապետ Նիկոլ Փաշինեան – Ես կարող եմ ասել հետեւեալը. այդ խորհրդակցութիւնները շարունակվում են, եւ արդէն ասացի՝ հարցը, որ ըստ էութեան, մեր կողմից ձեւակերպված է, ես արդէն բարձրաձայնեցի: Եւ ուզում եմ ընդգծել, որ ոչ միայն Իսրայէլի, այլեւ միջազգային հանրութեան տեսակէտից մենք պէտք է արձանագրենք հետեւեալը, որ հիմա Ղարաբաղում՝ Արցախում, տեղի է ունենում միջազգային գործունէութեան մի նոր տեսակի փորձարկում:

Ըստ էութեան, Թուրքիան այսօր Սիրիայում ունի վարձկաններ ներգրաւելու բաւական ընդարձակ հնարաւորութիւն: Այդ փորձը մէկ անգամ կիրառւել է Լիբիայում, յաջորդը կիրառւում է Լեռնային Ղարաբաղում: Եւ ո՞վ գիտի, թէ որտեղ է կիրառւելու յաջորդը: Իսկ ո՞վ է երաշխաւորված, որ յաջորդը չի լինելու տարածաշրջանի կամ աշխարհի այս կամ այն մասում: Եւ ես շատ ուրախ եմ, որ, օրինակ, Մերձաւոր Արեւելքի շատ երկրներ, այդ թւում՝ արաբական շատ երկրներ, պատշաճ գնահատական են տալիս այս երեւոյթին եւ հասկանում են, թէ այս իրավիճակն ինչպիսի սպառնալիք է պարունակում ընդհանրապէս միջազգային խաղաղութեան եւ կայունութեան համար:

Սա հարց է, որն ուղղված չէ առանձին վերցրած մի պետութեան: Սա հարց է, որն ուղղված է ընդհանրապէս միջազգային հանրութեանը: Որովհետեւ մենք տեսնում ենք, որ միջազգային անվտանգութեան համակարգում տեղի են ունենում որոշակի փոփոխութիւններ, եւ այդ փոփոխութիւնները հիբրիդային պատերազմի տարրեր են պարունակում: Այդ հիբրիդային պատերազմի մէջ ներգրաւվում են վարձկաններ, եւ այդ հիբրիդային պատերազմն ունի ամենատարբեր դրսեւորում: Դա կարող է ունենալ այնպիսի դրսեւորում, ինչպիսին մենք տեսնում ենք Լեռնային Ղարաբաղում: Դա կարող է ունենալ այնպիսի դրսեւորում, ինչպիսին մենք տեսնում են Վիեննայում: Դա կարող է ունենալ այնպիսի դրսեւորում, ինչպիսին տեսնում ենք Նիցցայում՝ Ֆրանսիայում կամ Կանադայում: Սա հարց է, որն արդէն գոյութիւն ունի, եւ այդ հարցին պէտք է տրվի կոնկրետ պատասխան:

The Jerusalem Post – Գաղտնիք չէ, որ Իսրայէլը Թուրքիայի հետ շատ լարված, բարդ հարաբերութիւններ ունի: Դուք նշեցիք, որ Իսրայէլը պէտք է մտածի այն մասին, թէ ինչու է զէնք մատակարարում Ադրբեջանին եւ դրանով իսկ գտնվում է Թուրքիայի հետ նոյն կողմում: Արդեօք ձեր ներկայացուցիչները Իսրայէլի ուշադրութիւնը հրաւիրե՞լ են այս փաստի վրայ: Եւ ինչպէ՞ս են նրանք արձագանքել:

Վարչապետ Նիկոլ Փաշինեան – Ես կարող եմ ասել, որ չեմ կարծում, թէ ես հիմա դիւանագիտական հարցուպատասխանի բովանդակութիւն պէտք է բացայայտեմ: Իսկ հանրային հարցը ես արդէն ձեւակերպեցի: Դուք տւէք այդ հարցը այս հարցազրոյցի միջոցով Իսրայէլին, եւ Իսրայէլը թող հրապարակային պատասխանի:

The Jerusalem Post – Ի՞նչը կդրդի Հայաստանին՝ իր դեսպանին վերադարձնել Իսրայէլ:

Վարչապետ Նիկոլ Փաշինեան – Դա դիւանագիտական պրակտիկայ է, մենք կը տեսնենք: Մենք ուզում ենք ճիշտ հարաբերութիւններ կառուցել բոլոր երկրների հետ: Այդ հարցի պատասխանը մենք կը ձեւակերպենք պատշաճ ձեւով և պատշաճ ժամանակում:

The Jerusalem Post – Նախագահ Ռիւվեն Ռիւլինը հոկտեմբերի սկզբին՝ Հայաստանի դեսպանին հետ կանչելուց յետոյ, զանգահարել էր իր հայաստանցի գործընկերոջը եւ առաջարկել մարդասիրական օգնութիւն: Կա՞յ որեւէ բան, որ կցանկանայիք Իսրայէլից ստանալ:

Վարչապետ Նիկոլ Փաշինեան – Ես արդէն ասացի: Գիտէք, այն, ինչ որ ասացի, ես կարծում եմ, որ սա հարց է, որին Իսրայէլը ոչ թէ մեզ համար պէտք է պատասխանի, այլ ինքն իր համար պէտք է պատասխանի, եւ բոլոր երկրները: Որովհետեւ, օրինակ, Եւրամիութեան լրագրողների հետ զրոյցում ինձ հարց են տալիս, թէ ինչ պիտի անի Եւրամիութիւնը: Ես ուզում եմ ասել եւ ասում էի՝ այն, ինչ որ պիտի անի Եւրամիութիւնը, պէտք է անի ինքն իր համար, ոչ թէ Հայաստանի համար: Ուղղակի հարց է հնչում իրավիճակի գնահատականի վերաբերեալ, ես հնչեցնում եմ այդ գնահատականը:

Ես ընդամէնը 10-15 օր առաջ հարցազրոյցներում ասում էի, որ եթէ Եւրամիութիւնը պատշաճ գնահատականի չարժանացնի Թուրքիայի պահվածքը տարածաշրջանում եւ Լեռնային Ղարաբաղում, դրա հետեւանքները կտեսնեն հէնց Եւրոպայում: Եւ մենք այսօր տեսնում ենք, թէ Եւրոպայում ինչ է կատարվում: Եւ նոյնը ես ասում եմ Իսրայէլի վերաբերեալ: Նույնը ես ասում եմ, որ Իսրայէլը պէտք է ինքն իրեն հարց տա՝ այսօր ինքը վարձկանների հետ կողք կողքի փաստացի կռւում է Լեռնային Ղարաբաղի դէմ: Իսրայէլն ինքը պիտի պատասխանի այդ հարցին՝ սա հարմա՞ր դիրք է իր համար, թէ՞ հարմար դիրք չէ: Եթէ հարմար դիրք է, Աստւած իր հետ:

Բայց ես կարծում եմ, որ այդտեղ էլ են լինելու կոնկրետ հետեւանքներ, եւ դուք առերեսվելու էք այդ հետեւանքների հետ: Եւրոպայի պարագայում իմ այս ասածն իրականութիւն դարձաւ 15 օրւայ ընթացքում: Իսրայէլի պարագայում, չգիտեմ, գուցէ 15 օրւայ, 15 շաբաթւայ, 15 տարւայ ընթացքում: Բայց ես ուրիշ բան եմ ասում՝ գործում է արտաքին քաղաքականութեան բոլորովին նոր մեխանիզմ Թուրքիայի կողմից: Եւ պարզ է, որ այդ մեխանիզմը դրսեւորվելու է տարբեր տեղեր, եթէ իրեն դրսեւորվելու հնարաւորութիւն տրվեց: Այսօր փաստացի դրսեւորվելու այդ հնարաւորութիւնը տրվում է Լեռնային Ղարաբաղում: Եւ դրա դրսեւորումները մենք սկսում ենք արդէն տեսնել Եւրոպայում, սկսում ենք տեսնել Ամերիկայում: Իսկ ո՞վ է ասել, որ դրա դրսեւորումները չենք տեսնելու Իսրայէլում: Ես կարծում եմ, որ տեսնելու ենք: Այնպէս որ, թող Իսրայէլը մտածի՝ իր համար հարմա՞ր դիրք է այսօր լինել վարձկանների հետ նոյն խրամատում, գծի նոյն կողմում եւ ունենալ միեւնւյն թիրախը:

The Jerusalem Post – Երբ ասում էք, որ հետեւանքներ են լինելու, ինչի՞ց էք զգուշանում:

Վարչապետ Նիկոլ Փաշինեան – Ասացի արդէն: Ես նկարագրեցի Թուրքիայի կողմից վարվող քաղաքականութեան նոր մեխանիզմը՝ երբ ինքը Սիրիայում գտնվող իր տարածքներից ունի վարձկաններ ներգրաւելու, ըստ էութեան, ես չեմ ուզում ասել՝ անսահմանափակ, բայց մեծ հնարաւորութիւն եւ ունի կայսերական ամբիցիաներ: Այդ կայսերական ամբիցիաները դէպի հիւսիս են, դէպի արեւելք են, դէպի հարաւ են եւ դէպի արեւմուտք են: Եւ այդ ուղղութիւններով այդ դրսեւորումները մենք տեսնելու ենք: Ինչո՞ւ կարող ենք այդ դրսեւորումները տեսնել Վիեննայում՝ Աւստրիայում, Ֆրանսիայում, Կանադայում եւ չենք կարող այդ դրսեւորումները տեսնել Իսրայէլում: Իմ կարծիքով՝ անպայման կը տեսնենք: Նկատի ունեմ, որ նպաստում է այդ պահի մօտենալուն:

The Jerusalem Post – Արդեօք ճի՞շտ եմ հասկանում՝ նկատի ունէք, որ մի օր Թուրքիան կարող է վարձկաններ ուղարկել Երուսաղէմ:

Վարչապետ Նիկոլ Փաշինեան – Ես որեւէ կոնկրետ բան նկատի չունեմ: Ես նկատի ունեմ քաղաքական միջավայրը, քաղաքական մթնոլորտը, եւ այն բացերը, որ գոյացել են միջազգային անվտանգութեան համակարգում: Եւ եթէ կան բացեր, եթէ կան միջանցքներ, այդ միջանցքներով հաստատ ինչ-որ անցուդարձ տեղի է ունենալու: Եւ դա տեղի չի ունենալու պարտադիր մէկ կամ երկու ուղղութեամբ: Այդ անցուդարձը տեղի է ունենալու բոլոր այն ուղղութիւններով, որտեղ հնարաւոր է:

The Jerusalem Post – Վերջին հարցը. հումանիտար օժանդակութեան շրջանակում կա՞յ որեւէ բան, որ Իսրայէլը կարող է անել Հայաստանի համար:

Վարչապետ Նիկոլ Փաշինեան- Ես Ձեզ ասացի: Ի՞նչ է նշանակում հումանիտար աջակցութիւն մի երկրի կողմից, որը վարձկաններին զէնք է վաճառում, որով վարձկանները հարւածի տակ են պահում խաղաղ քաղաքացիական բնակչութիւնը: Ես առաջարկում եմ, որ Իսրայէլն այդ օգնութիւնն ուղարկի վարձկաններին եւ ահաբեկիչներին՝ որպէս իր գործունեութեան տրամաբանական շարունակութիւն:

The Jerusalem Post – Պարոն վարչապետ, շնորհակալութիւն հարցազրոյցի համար:

Վարչապետ Նիկոլ Փաշինեան- Ես եմ շնորհակալ:

 

Աղբիւր՝ www.yerkir.am 

Եվրոպական խորհրդարանի իտալացի պատգամաւոր Մարկօ Դրեօստոն նախօրէին Վիեննայում տեղի ունեցած ահաբեկչութեան առնչութեամբ յիշեցրել է ՀՀ վարչապետ Նիկոլ Փաշինեանի խօսքը:

Պատգամաւորը «Թւիթերի» իր միկրոբլոգում նշել է, որ Փաշինեանը Եւրոպային զգուշացնում էր Թուրքիայի նախագահ Ռեջեփ Էրդողանին կանգնեցնելու մասին:

«Հայաստանի վարչապետը մի քանի օր առաջ նախազգուշացնում էր Եւրոպային․ «Եթէ Էրդողանի դէմը չառնէք, թուրքերին կը գտնթք Վիեննայի դարպասների մօտ»: Նոյնիսկ՝ ոչ դարպասների մօտ. այն, ինչ այսօր տեղի ունեցաւ, Վիեննայի կենտրոնում էր»,- գրել է պատգամաւորը:

Հոկտեմբերի 4-ին ՀՀ վարչապետ Նիկոլ Փաշինեանը գերմանական առաջատար «Բիլդ» պարբերականին տւած հարցազրոյցում նշել էր. «Եկէք տեսնենք Թուրքիայի գործունէութիւնը Միջերկրական ծովում, Լիբիայում, Մերձաւոր Արեւելքում, Իրաքում, Սիրիայում։ Եւ ես ցանկանում եմ ընդգծել, որ, իմ կարծիքով, Լեռնային Ղարաբաղը եւ Հայաստանն այսօր գտնւում են քաղաքակրթական առաջնագծում: Եւ եթէ միջազգային հանրութիւնն այս փաստը պատշաճ արձագանքի չարժանացնի, ուրեմն անհրաժեշտ է Թուրքիային սպասել Վիեննայի մօտակայքում»:

 

Աղբիւր՝ www.yerkir.am 

Արցախի ՄԻՊ Արտակ Բէգլարեանը թւիթերեան իր միկրոբլոգում գրել է, որ հակառակորդի կողմից վերջին հարւածները Ստեփանակերտին եղել են ուղղւած Մօր եւ մանկան առողջութեան կենտրոնին եւ կենտրոնական շուկայի յարակից բնակելի տարածքներին։

«Կրկին թիրախաւորւեց հիւանդանոցը։ Երկու քաղաքացիական անձ ծանր վիրաւոր է»,- իր գրառման մեջ նշել է Բէգլարեանը։

 

Աղբիւր՝ www.yerkir.am 

Իտալիայի Պալերմօ քաղաքի խորհուրդը միաձայն ճանաչել է Արցախի Հանրապետութեան անկախութիւնը, ինչպէս նաեւ դատապարտել է Ադրբեջանի ագրեսիան Արցախի խաղաղ բնակչութեան նկատմամբ եւ հասարակական օբյէկտները թիրախաւորելու բազմաթիւ դէպքերը: Այս մասին յայտնում են Արցախի տեղեկատւական շտաբից։

 

Աղբիւր՝ www.nkrmil.am 

Գիշերւայ ընթացքում յարաբերական կայուն լարւածութիւնը պահպանւել է ճակատային գծի բոլոր ուղղութիւններում: Թշնամին շարունակել է, բացի պաշտպանութեան բանակի դիրքերից, հրթիռահրետանային կրակի տակ պահել նաեւ խաղաղ բնակավայրերը: Քաղաքացիական բնակչութեան շրջանում կան տուժածներ:

Կէսգիշերից յետոյ թշնամական դիւերսիոն խումբը փորձել է յաջողութեան հասնել Շուշիի ուղղութեամբ սակայն, հանդիպելով բանակային ստորաբաժանումների եւ կամաւորականների կազմակերպւած դիմադրութեանը եւ կրելով մեծաթիւ կորուստներ, յետ է շպրտւել:

Ներկայ պահին յայտնաբերւած թշնամական խմբի շրջափակման ու ոչնչացման գործողութիւնները շարունակւում են:

Օպերատիւ-մարտավարական իրադրութիւնը ճակատային գծի ամբողջ երկայնքով վերահսկում են ՊԲ ստորաբաժանումները:

 

 

ԱՀ ՊՆ մամուլի ծառայութիւն

 

 

Աղբիւր՝ www.alikonline.ir 

«alikonline.ir»- ԱՄՆ Կոնգրեսի Ներկայացուցիչների պալատի անդամ Թեդ Լիուն յայտնել է, որ անհրաժեշտ է ընդունել արցախեան հակամարտութեան շուրջ խաղաղութեան բանաձեւը, որի համահեղինակն է ինքը: Գրում է «Tert.am»-ը:

«Ես միշտ եղել եմ Հայաստանի դաշնակիցը եւ կարծում եմ, որ հրամայական է Արցախի Հանրապետութեան հակամարտութեան շուրջ Հայաստանի եւ Ադրբեջանի միջեւ խաղաղութեան բանաձեւն առաջ տանելը: Վստահ եմ նաև, որ ինքնորոշումը մարդու հիմնարար իրաւունքներից է եւ կարևոր ժողովրդավարական արժէք: Այդ իսկ պատճառով հպարտ եմ լինելու կոնգրեսական Ֆրենկ Փալոունի՝ հոկտեմբերի 23-ին ներկայացրած H. Res.1203 բանաձեւի համահեղինակը: Այս բանաձեւ ճանաչում է Արցախի ինքնորոշման իրաւունքն ու դատապարտում Ադրբեջանի եւ Թուրքիայի ագրեսիան տարածաշրջանում»,- ասւում է կոնգրեսականի յայտարարութեան մէջ:

Վերջինս յաւելել է նաեւ, որ նաև Ներկայացուցիչների պալատում Ջեքի Սփիերի՝ հոկտեմբերի 1-ին ներկայացրած H. Res.1165 բանաձևի համահեղինակն է: Տւեալ բանաձեւը դատապարտում է Ադրբեջանի յարձակումներն Արցախի դէմ եւ հաստատում Կոնգրեսի հաւատարմութիւնը Թուրքիայի շարունակական միջամտութիւնը զսպելու հարցում:

Աղբիւր՝ www.yerkir.am 

Բաքւի կառավարութեանը մօտ կանգնած մարդիկ յայտնում են Լենքորան քաղաքում իսրայէլական դրօշ բարձրացնելու մասին. յայտնում է իրանական «Ազարիհա» Telegram ալիքը:

Կառավարութեանը մօտ կանգնած Ֆարիզ Իսմայիլզադէն այդ լուրն անւանել է «աշխարհաքաղաքական հաղթանակ»: Այս տեղեկութիւնը հաստատել է նաեւ Լենքորանի համալսարանի պրոֆեսոր Եադեգար Սադեգլին:

Նշենք, որ Լենքորանը Թալիշստանի մայրաքաղաքն է, որը գտնւում է Իրանի սահմանից 45 կմ հեռու:

 

Աղբիւր՝ www.yerkir.am 

Գիշերւայ ընթացքում արցախա-ադրբեջանական ճակատային գծում տարբեր ինտենսիւութեամբ ընթացել են մարտական գործողութիւններ:

Արցախի ՊԲ-ից յայտնում են, որ որոշ ուղղութիւններում ծաւալւող թշնամական շարասիւները յայտնաբերւել եւ ոչնչացւել են ՊԲ ստորաբաժանումների կողմից: Հակառակորդը շարունակել է նաեւ հրթիռահրետանային հարւածներ հասցնել խաղաղ բնակավայրերին:

Հարաւ-արեւելեան ուղղութեամբ հակառակորդը փորձել է առաջնագծին մօտեցնել զրահատեխնիկայ: ՊԲ ստորաբաժանումների ձեռնարկած գործողութիւնների արդիւնքում խոցւել է թշնամական 1 տանկ, իսկ մնացածները հետ են քաշւել:

Ներկայ պահին օպերատիւ-մարտավարական իրադրութիւնը գտնւում է ՊԲ վերահսկողութեան ներքոյ:

Աղբիւր՝ www.yerkir.am 

Րաֆֆի Քորթոշեանը գրում է.

«Արցախի պաշտպանութեան բանակի կողմից ձերբակալւած թուրքա-ադրբեջանա-ահաբեկչական բանակի անդամ Սիրիայի Իդլեբ նահանգի Ջսր Ալ-Շղուր շրջանի Ալ-Զիյադիէ գիւղի բնակիչ Իւսեֆ Ալ-Աբեդ Ալ-Հաջին ինչպէս պարզւում է (համացանցում կարճատեւ պրպտումներից) սերում է ահաբեկչական կարկառուն անցեալ ունեցող ընտանիքից: Վերջինիս համագիւղացի-ազգականներից (տոհմից) առնւազն 4-ը սպանւել են Սիրիական բանակի դէմ մղւած մարտերում.

 

  1. Սաբեթ Ալ-Հաջի. սպանւել է 2015 թ. յուլիսի 24-ին

 

  1. Օսման Ալ-Հաջի. սպանւել է 2016 թ. ապրիլի 14-ին

 

  1. Նիզար Ահմեդ Ալ-Հաջի. սպանւել է 2017 թ. օգոստոսի 25-ին

 

  1. Մահմուդ Ահմեդ Ալ-Հաջի. սպանւել է 2017 թ. օգոստոսի 25-ին»:

 

Աղբիւր՝ www.yerkir.am 

Օհայօ նահանգի ներկայացուցիչների պալատի անդամ Ջէյ Թոդ Սմիթը մտադիր է նահանգի օրէնսդիր ժողովում ներկայացնել Արցախի ինքնորոշումը ճանաչող, ինչպէս նաեւ Արցախի դէմ Թուրքիայի եւ Ադրբեջանի կողմից սանձազերծած ագրեսիան դատապարտող բանաձեւ: Ինչպէս տեղեկացնում է «Արմենպրես»-ը, վկայակոչելով ԱՄՆ Հայ դատի յանձնախմբի տարածած հաղորդագրութիւնը, այս բանաձեւի վերաբերեալ Օհայօ նահանգի Օրէնսդիր ժողովի քւէարկութիւնը կարող է կայանալ արդէն նոյեմբերի 14-ին:

Բանաձեւն ընդգծելու է նաեւ ԵԱՀԿ Մինսկի խմբի համանախագահների եւ Հայաստանի, Արցախի եւ Ադրբեջանի կառաւարութիւնների հետ ԱՄՆ վարչակազմի աշխատանքի անհրաժեշտութիւնը ՝ հակամարտութեան կայուն եւ խաղաղ կարգաւորմանը հասնելու համար:

«Օհայօում բնակւող եւ աշխատող հայազգի ամերիկացու համար պատիւ էր նահանգի ներկայացուցիչ Ջէյ Թոդ Սմիթի հետ աշխատել այդ օրէնսդրութեան վրայ։ Դա իսկապէս ոգեւորիչ է իմանալ, որ մեր համայնքն ունի Օհայօ նահանգի ներկայացուցիչներ, որոնք ոչ միայն պաշտպանում են մեր շահերը այստեղ` Օհայօում, այլեւ հասկանում են այն արժէքը` ազատութիւնը եւ ժողովրդավարութիւնը, որը կարեւոր դեր է խաղում ամբողջ աշխարհում», – ասել է Օհայօ նահանգի հայ դատի յանձնախմբի ներկայացուցիչ Դաւիթ Գրիգորեանը:

Բանաձեւի ընդունումից յետոյ Օհայօ նահանգի օրէնսդիր մարմինը կմիանայ ԱՄՆ ինը նահանգներին եւ անհամար քաղաքներին ու շրջաններին ՝ Արցախի Հանրապետութեան ինքնորոշման եւ անկախութեան ճանաչման հարցում:

 

Աղբիւր՝ www.yerkir.am 

Քիչ առաջ ՊԲ հակաօդային պաշտպանութեան ուժերի կողմից Ստեփանակերտի երկնքում ոչնչացւել է հակառակորդի հերթական հարւածային անօդաչուն: Այս մասին   հաղորդում է Արցախի պաշտպանութեան բանակի պաշտօնական կայքը։