Օգոստոսի 14-ին, ժամը 13:23-ին, Ճգնաժամային կառավարման ազգային կենտրոն ահազանգ է ստացւել, որ «Սուրմալու» առեւտրի կենտրոնում տեղի է ունեցել պայթիւն: Ըստ ԱԻՆ-ի, այս մասին տեղեկացնում է yerkir.am-ը:

Հրդեհի բարդութեան «Թիւ 2» կանչով դէպքի վայր են մեկնել ԱԻՆ ՓԾ Երեւան քաղաքի փրկարարական վարչութեան հրշէջ-փրկարարական ջոկատներից վեց մարտական հաշւարկ, աւտօսանդուղք, Ճգնաժամային կառավարման ազգային կենտրոնի օպերատիւ, Փրկարարական ուժերի վարչութեան յատուկ նշանակութեան փրկարարական աշխատանքների իրականացման կենտրոնի փրկարարական, Հրդեհաշիջման եւ փրկարարական աշխատանքների կազմակերպման բաժնի հերթապահ խմբերը եւ Հոգեբանական աջակցութեան բաժնի հերթապահ հոգեբանը:

14 Օգոստոսի 2022-ի, ժամը 17:36-ի դրութեամբ կայ 1 զոհ. տարբեր բժշկական կենտրոններ տեղափոխւած քաղաքացիների թիւը հասել է 51-ի: Այս մասին յայտնում են ՀՀ Առողջապահութեան նախարարութիւնից:

28 Ապրիլի 2022 հինգշաբթի

Հայաստանում կորոնավիրուսային հիւանդութեան (COVID-19) համաճարակային կայուն իրավիճակով եւ դէպքերի նւազմամբ պայմանաւորւած, ինչպէս նաեւ հաշւի առնելով միջազգային փորձը եւ այն հանգամանքը, որ մի շարք երկրներ արդէն իսկ մեղմացրել են երկիր մուտք գործելու սահմանափակումները, ուժը կորցրած են ճանաչւում ՀՀ տարածք մուտք գործելու սահմանափակումները: Տեղեկացնում է Հայաստանի Հանրապետութեան առողջապահութեան նախարարութիւնը:

Մասնաւորապէս` պետական սահմանի ցամաքային, ինչպէս նաեւ օդանաւակայաններում տեղակայւած անցման կէտերով Հայաստանի Հանրապետութիւն մուտք գործելիս այլեւս չի պահանջւի ներկայացնել ՊՇՌ կամ արագ ախտորոշիչ թեստով հետազօտութեան սերտիֆիկատ կամ պատւաստման սերտիֆիկատ` ներառեալ գնացքների անձնակազմի, վարորդների, օդաչուների համար:

Նշւած փոփոխութիւններն ուժի մէջ են մտնում մայիսի 1-ից:

ՀՀ Ազգային ժողովն ընտրեց Հայաստանի Հանրապետութեան 5-րդ նախագահին: Իշխանութեան թեկնածու Վահագն Խաչատուրեանը ընտրւեց ՀՀ նախագահ: Ըստ Tert.am-ի հաղորդում է alikonline.ir-ը:

Նշենք, որ Վահագն Խաչատուրեանը երէկ չէր ընտրւել ՀՀ նախագահ, որովհետեւ խորհրդարանը չէր կարողացել ապահովել կողմ ձայների բաւարար քանակը՝ 81 ձայն: Վահագն Խաչատուրեանն ստացել է 69 կողմ, 0 դէմ ձայներ:

Ըստ Սահմանադրութեան՝ երկրորդ փուլով նախագահ ընտրելու դէպքում անհրաժեշտ է  պատգամաւորների կողմ ձայների 3/5-ը:

Այսպիսով, ՀԱԿ կուսակցութեան վարչութեան նախկին անդամ, Երեւանի նախկին քաղաքապետ, Նիկոլ Փաշինեանի իշխանութեան օրօք Բարձր տեխնոլոգիական արդիւնաբերութեան նախարար Վահագն Խաչատուրեանը ՀՀ 5-րդ նախագահն է:

Որոշել եմ մօտ չորս տարի ակտիւ աշխատելուց յետոյ հրաժարական տալ Հանրապետութեան նախագահի պաշտօնից՝ այս բովանդակութեամբ յայտարարութիւն է տարածել ՀՀ նախագահ Արմէն Սարգսեանը։

Յայտարարութեան մէջ ասւում է․ 

1990-ականների սկզբին աշխարհաքաղաքական մեծ փոփոխութիւնների հետեւանքով մեր ժողովրդին մեծագոյն հնարաւորութիւն ընձեռւեց ստեղծել իր անկախ պետութիւնը: Մեր առաքելութիւնը ոչ թէ մի դրօշը մէկ ուրիշով փոխարինելն էր, այլ՝ կառուցել երկիր, որը դարեր անց վերստին կապահովի հայերի անվտանգութիւնը, առաջընթացը եւ բարգաւաճումը:

Ընդգծում եմ՝ անկախ պետութեան գոյութեան հիմնական իմաստը պատասխանատւութիւն ստանձնելու ու կրելու կարողութիւնն է, երբ ինքներս ենք գիտակցում, որ միայն մենք ենք, որպէս մէկ միասնական մարմին, սեփական յաղթանակներ կերտողը եւ սեփական պարտութիւնների մեղաւորը:

Նման պատմական հնարաւորութեամբ ոգեւորւած՝ ես, ինչպէս եւ իմ շատ հայրենակիցներ, նւիրւեցի այդ առաքելութեանը: Տարբեր պատճառներով այս կամ այն փուլերում իմ մասնակցութեան ակտիւութիւնը փոխւում էր, բայց ես չէի դադարում հաւատալ մեր վերջնական համազգային յաջողութեանը: Եւ հէնց դա էր Հայաստանի նախագահի պաշտօնը զբաղեցնելու առաջարկութեանը համաձայնելու իմ գլխաւոր շարժառիթը:

Ընդունելով այդ կարեւոր որոշումը՝ ես ելնում էի ինձ արւած առաջարկութիւնից, ըստ որի՝ նախագահական նոր ինստիտուտը ունենալու է գործիքներ եւ հնարաւորութիւններ՝ ազդելու արտաքին քաղաքական եւ տնտեսական, ներդրումային քաղաքականութեան վրայ, Սփիւռքի հետ յարաբերութիւնների վրայ, ինչպէս նաեւ միջազգային ասպարէզում համազգային շահերն առաջ մղելու եւ նոր գիտակրթական ու բարձր տեխնոլոգիական միջավայր ձևաւորելու համար:

Որոշ ժամանակ անց տեղի ունեցան 2018թ. ապրիլ-մայիսեան իրադարձութիւնները...

Կարող է հարց ծագել՝ ինչու՞ ես հրաժարական չտւեցի այդ պահին: Պատասխանն ակնյայտ է՝ այն պատասխանատւութեան պատճառով, որը ես վերցրել էի ինձ վրայ՝ ստանձնելով Հանրապետութեան նախագահի պաշտօնը: Ես պարտաւոր էի անել ինձնից կախւած ամէն ինչ՝ բացառելու ներքին պառակտման յետագայ խորացումը, հնարաւոր բախումները, որոնք կարող էին յանգեցնել չափազանց բացասական հետեւանքների: Ես նաեւ ձգտում էի իմ երկարամեայ աշխատանքի շնորհիւ ձեռք բերած հեղինակութիւնը, կապերը եւ իմ միջազգային քաղաքական ու տնտեսական ներուժը ծառայեցնել ուժեղ եւ կայուն պետականութեան կառուցմանը:

Կրկին կարող է հարց առաջանալ, թէ ինչու՞ Նախագահը չկարողացաւ ազդել այն քաղաքական իրադարձութիւնների վրայ, որոնք մեզ հասցրել են ներկայիս համազգային ճգնաժամի: Պատճառը կրկին ակնյայտ է՝ համապատասխան գործիքների պակասը, գործիքներ, որոնցով ցանկացած պետական պաշտօնեայի օժտում է բացառապէս մէկ փաստաթուղթ՝ Սահմանադրութիւնը: Հէնց գործող հիմնական օրէնքի մէջ են թաքնւած մեր որոշ կարեւոր խնդիրների արմատները:

Մենք ունենք պարադոքսալ իրավիճակ, երբ Նախագահը ստիպւած է պետականութեան երաշխաւոր լինել՝ փաստացի չունենալով որեւէ իրական գործիք: Սահմանադրութիւնը նաեւ ենթադրում է մէկ ինստիտուտի գերակայութիւն միւսի նկատմամբ, Սփիւռքի յայտնի մասնագէտների համար ստեղծում է խոչընդոտներ՝ պատմական Հայրենիքի պետական ինստիտուտների կառավարմանը մասնակցելու համար, եւ այլն:

Մենք խորհրդարանական հանրապետութիւն ենք ձեւով, բայց ոչ բովանդակութեամբ: Իմ առաջարկութեան իմաստը եւ նպատակը եղել է ոչ թէ կառավարման մի ձեւից միւսին (խորհրդարանականից կիսանախագահականի կամ նախագահականի) անցնելը, այլ՝ զսպումների եւ հակակշիռների վրայ հիմնւած պետական համակարգ ստեղծելը: Առանց դրա դժւար է խօսել նշանակալից ձեռքբերումների մասին, քանի որ առաջընթացի եւ յաջողութեան հնարաւոր է հասնել միայն կանխատեսելի եւ ներդաշնակ համակարգի պայմաններում:
Ուրախ եմ, որ ստեղծւել է սահմանադրական փոփոխութիւնների յանձնաժողով, ինչի համար շնորհակալութիւն եմ յայտնում կառավարութեանը: Ես յույս ունեմ, որ, ի վերջոյ, սահմանադրական փոփոխութիւնները տեղի կունենան, եւ յաջորդ նախագահն ու նախագահական ինստիտուտը կը կարողանան աշխատել աւելի հաւասարակշռւած եւ համակարգւած միջավայրում:

Մենք ապրում ենք իւրատեսակ իրականութեան մէջ, իրականութիւն, որտեղ Նախագահը չի կարող ազդել պատերազմին եւ խաղաղութեանը վերաբերող հարցերի վրայ:

Իրականութիւն, երբ նա չի կարող վետօ կիրառել այն օրէնքների վրայ, որոնք համարում է պետութեան եւ ժողովրդի համար ոչ նպատակայարմար:

Իրականութիւն, երբ Նախագահի հնարաւորութիւններն ընկալւում են ոչ թէ որպէս առաւելութիւն պետութեան համար, այլ՝ տարբեր քաղաքական խմբերի կողմից դիտարկւում են որպէս իրենց սպառնացող վտանգ:

Իրականութիւն, որտեղ Նախագահն իր ներուժի գերակշիռ մասը չի կարողանում օգտագործել ի նպաստ համակարգային ներքին եւ արտաքին քաղաքական խնդիրների լուծման:

Իրականութիւն, որտեղ աշխարհը գտնւում է մշտական տուրբուլենտութեան գօտում, սակայն Նախագահը սահմանադրական գործիք չունի՝ օգնելու իր երկրին:

Իրականութիւն, որտեղ պետութեան գլուխը եւ երբեմն նաեւ նրա ընտանիքը թիրախաւորւում են տարբեր քաղաքական խմբաւորումների կողմից: Վերջիններս այնքան էլ հետաքրքրւած չեն նախագահական ինստիտուտի կողմից ի շահ երկրի իրականացված ձեռքբերումներով, որքան իմ անցեալով, դաւադրութեան զանազան տեսութիւններով ու միֆերով: Իմ անձի հանդէպ այդ «մտահոգւածութիւնը» դուրս է գալիս նաեւ բարոյականութեան սահմաններից՝ վերջնական արդիւնքում ուղղակիօրէն բացասաբար ազդելով առողջութեան վրայ:

Ես շատ երկար եմ մտածել եւ որոշել եմ մօտ չորս տարի ակտիւ աշխատելուց յետոյ հրաժարական տալ Հանրապետութեան նախագահի պաշտօնից:

Այդ որոշումը բացարձակապէս էմոցիոնալ չէ եւ բխում է որոշակի տրամաբանութիւնից:

Նախագահը չունի անհրաժեշտ գործիքներ՝ երկրի եւ ազգի համար ներկայիս բարդ ժամանակներում ազդելու ներքին եւ արտաքին քաղաքականութեան արմատական գործընթացների վրայ:

Մեր պետութեան համար այս բարդ փուլում, երբ անհրաժեշտ է համազգային միասնութիւն, նախագահական ինստիտուտը չպէտք է դառնայ բամբասանքների ու դաւադրութեան տեսութիւնների թիրախ՝ դրանով իսկ շեղելով հասարակութեան ուշադրութիւնը կարեւորագոյն խնդիրներից:

Այսօր, ինչպէս երբեք, անհրաժեշտ են իմաստալից, խորը մտածւած, կշռադատւած եւ բովանդակալից գործողութիւններ: Այլապէս մենք՝ ողջ աշխարհի հայութիւնը, չենք հասնի մեր առաքելութեան նպատակին եւ կը յայտնւենք պատմութեան լուսանցքում:

Մենք այլեւս սխալւելու իրաւունք չունենք:

Վերջում ցանկանում եմ առանձնակի երախտագիտութիւն յայտնել մեր քաղաքացիներին եւ Սփիւռքի մեր հայրենակիցներին՝ երկրի համար այս բարդ ժամանակներում հաստատակամութիւն, տոկունութիւն, համբերատարութիւն եւ արիութիւն ցուցաբերելու համար:

Առանձնայատուկ շնորհակալութիւն մեր քաջարի բանակի զինւորներին եւ սպաներին, խոնարհումս մեր Հայրենիքի համար իրենց կեանքը զոհաբերած հերոսների ընտանիքներին:

Շնորհակալ եմ նաեւ Հանրապետութեան նախագահի աշխատակազմի բոլոր աշխատակիցներին եւ պետական կառոյցների իմ գործընկերներին՝ համատեղ արդիւնաւէտ աշխատանքի համար:

Նոյեմբերի 16-ին, ժամը 13:00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արեւելեան սահմանագօտու ուղղութեամբ` գնդակոծութեան ենթարկելով հայկական դիրքերը: ՀՀ ԶՈՒ ստորաբաժանումները դիմել են պատասխան գործողութիւնների` հակառակորդի առաջխաղացումը կանխելու նպատակով: Հաղորդում է ՀՀ պաշտպանութեան նախարարութիւնը:

 Ռուսական կողմի միջնորդութեամբ ձեռք բերւած պայմանաւորւածութեան համաձայն` ժամը 18:30-ից ՀՀ արեւելեան սահմանագօտում կրակը դադարեցւել է, իրադրութիւնը յարաբերականօրէն կայունացել է:

 Հակառակորդը կիրառել է հրետանային միջոցներ, զրահատեխնիկայ եւ տարբեր տրամաչափի հրաձգային զինատեսակներ: Հայկական կողմի պատասխան գործողութիւնների արդիւնքում հակառակորդն ունի անձնակազմի մեծաթիւ կորուստներ, զրահատեխնիկայի շուրջ մէկ տասնեակ միաւոր ոչնչացւել կամ շարքից դուրս է բերւել: Հայկական կողմը նոյնպէս կորուստներ ունի: Համաձայն ճշտւած տւեալների հայկական կողմն ունի մէկ զոհ: Վիրաւորների թիւը նոյնպէս ճշտւում է: ՀՀ ԶՈՒ 12 զինծառայող` 7 պայմանագրային եւ 5 ժամկէտային գերեվարւել են, ինչպէս նաեւ յայտնի է երկու մարտական դիրքի կորստեան մասին:

Նոր տեղեկութիւնների դէպքում պաշտպանութեան նախարարութիւնը հանդէս կը գայ համապատասխան հաղորդագրութեամբ:

Այսօր (10 նոյեմբեր 2021) ադրբեջանական կողմը հայկական կողմին տեղեկացրել է, որ այսօրւանից` ժամը 24:00-ից սկսած` Գորիս-Կապան ճանապարհի հատւածում կիրականացնի սահմանային եւ մաքսային հսկողութեան գործառոյթ, այսինքն` մաքսակէտեր կը տեղադրի: Հայաստանի Հանրային հեռուստաընկերութեան եթերում յայտարարեց ԱԽ քարտուղար Արմէն Գրիգորեանը: Հաղորդում է Yerkir.am-ը:

«Հայկական կողմը եւս համապատասխան քայլեր կը ձեռնարկի: Այսինքն` ճանապարհի այդ հատւածում եւս կը տեղադրի մաքսային եւ սահմանային հսկողութեան գործառոյթներ իրականացնող կէտեր, եւ այդ աշխատանքները մենք նախապէս արդէն սկսել ենք, որպէսզի այդ ուղղութեամբ աշխատենք, բայց քանի որ, ինչպէս յայտարարւեց արդէն, պատրաստ է Կապան-Տաթեւ ճանապարհը, այնտեղից էլ կամ Գորիս կամ Երեւան, կարելի է ասել, անվտանգ շահագործւող ճանապարհ ունենք, այլընտրանքային ճանապարհն այլեւս պատրաստ է` ինչպէս ապրանքներ տեղափոխելու, այնպէս էլ այլ տեսակի ցանկացած աւտոմեքենայի համար ճանապարհն օգտագործելի է: Շատ կարեւոր է, որ նոր կառուցւած ճանապարհ է»,-ասաց Գրիգորեանը:

«Շուռնուխ Որոտան Ճակատան համայնքների համար, որոնք գտնւում են Գորիս-Կապան ճանապարհին, այս պահին եւս ճանապարհային աշխատանքներ են կատարւում: Դէպի համայնքներ տանող ճանապարհները այս պահին ասֆալտապատ չեն, բայց մօտ ապագայում կը լուծւեն խնդիրները»,- յաւելել է Արմէն Գրիգորեանը:

Օգոստոսի 3-ին ՀՀ-ում Իրանի Իսլամական Հանրապետութեան արտակարգ եւ լիազօր դեսպան Աբբաս Բադախշան Զոհուրին եւ ՀՀ-ում ԻԻՀ դեսպանութեան ռազմական կցորդ, գնդապետ Բահման Սադեղինը ՀՀ ՊՆ ներկայացուցիչների ուղեկցութեամբ այցելել են Գեղարքունիքի մարզ: Հաղորդում է ՀՀ Պաշտպանութեան նախարարութիւնը:

Զօրամիաւորման հրամանատար, գեներալ-մայոր Արայիկ Յարութիւնեանը դեսպանին ներկայացրել է հայ-ադրբեջանական սահմանին տիրող իրավիճակը, որից յետոյ կազմակերպւել է այց Վերին Շորժայի հատւածի սահմանագիծ:

Հայաստանի Հանրապետութիւնում ԻԻՀ արտակարգ եւ լիազօր դեսպանը, մտահոգութիւն յայտնելով երկու երկրների սահմանային վէճերի շարունակութեան կապակցութեամբ ընդգծել է երկու կողմերի զսպւածութեան եւ երկու երկրների միջեւ վէճերի խաղաղ կարգաւորման անհրաժեշտութիւնը: Նա իր ցաւակցութիւնն է յայտնել վերջին ընդհարումների ընթացքում զոհւած զինծառայողների ընտանիքներին:

Պարզաբանելով բոլոր կողմերի` միջազգայնօրէն ճանաչւած սահմանները յարգելու անհրաժեշտութիւնը, դեսպան Զոհուրին նշել է, որ Հարաւային Կովկասում տեւական խաղաղութեան ապահովումը բխում է տարածաշրջանի ժողովուրդների շահերից եւ յայտնել Իրանի Իսլամական Հանրապետութեան պատրաստակամութիւնը` աջակցելու տարածաշրջանում տեւական խաղաղութեան հաստատման հարցում:

ՌԴ խաղաղապահ զօրքերի հրամանատարութեան միջնորդութեամբ ձեռք է բերւել պայմանաւորւածութիւն հիւսիս-արեւելեան ուղղութեամբ հայ-ադրբեջանական զօրքերի շփման գծում հրադադարի ռեժիմը վերականգնելու վերաբերեալ։ Այս մասին յայտնում են ՀՀ Պաշտպանութեան նախարարութիւնից։

«Այս պահին, նշւած պայմանաւորւածութիւնը հիմնականում կատարւում է»։

Յաւելենք, որ ՀՀ ԱԳՆ-ից եւս յայտնում են, որ հրադադարը պէտք է հաստատւեր տեղական ժամանակով ժամը 10։00-ից՝ տեղեկացնելով, որ այժմ հրադադարը հարաբերական պահպանւում է։ Չնայած պայմանաւորւածութեանը, հայկական կողմից յայտնում են, որ տարբեր ուղղութիւններում կրակոցները շարունակւում են։

Օրինակ՝ Մարդու իրաւունքների պաշտպանն յայտնում է, որ 10:30-ի դրութեամբ հակառակորդը կրակում է Գեղարքունիքի 6 գիւղերի ուղղութեամբ։ Սոթքի բնակիչներից մէկն էլ տեղեկացրել է, որ Վերին Շորժայում ինտենսիւ մարտերը գիշերւանից շարունակւում են։

Հիշեցնենք, որ յուլիսի 28-ին՝ ժամը 03:40-ի սահմաններում, ադրբեջանական ԶՈւ ստորաբաժանումները հերթական անգամ դիմել են սադրանքի եւ խախտել հրադադարը հայ-ադրբեջանական սահմանի հիւսիս-արեւելեան հատւածում: Ժամը 08։30-ի դրութեամբ, հայկական կողմն ունի երեք զօհ, եւս երկու զինծառայող վիրաւոր է:

Յուլիսի 28-ին, ժամը 03։40-ի սահմաններում, ադրբեջանական ԶՈՒ ստորաբաժանումները յարձակում են ձեռնարկել հայ-ադրբեջանական սահմանի հիւսիս-արևելեան ուղղութեամբ տեղակայւած հայկական դիրքերի ուղղութեամբ։

Ծաւալւել են տեղային մարտեր, որոնք, ժամը 07։00-ի դրութեամբ, շարունակւում են։ Նախնական տեղեկութիւններով, մարտական գործողութիւնների արդիւնքում երկու կողմից էլ կան կորուստներ։ Տւեալները ճշտւում են։

Մահացել է նշանաւոր հայազգի դուդուկահար եւ կոմպոզիտոր, ՀԽՍՀ ժողովրդական արտիստ Ջիւան Գասպարեանը: Այս մասին իր ֆէյսբուքեան էջում յայտնել է կոմպոզիտորի թոռնիկը` Ջիւան Գասպարեան կրտսերը: Այս մասին հաղորդում է yerkirmedia.am–ը:

«Այս գիշեր աշխարհը ունեցաւ աներեւակայելի կորուստ: Թող նա հանգչի խաղաղութեամբ»,- գրել է թոռնիկը անգլերէն լեզուով, ապա շարունակել հայերէն.

«Շատ մեծ ցաւով եմ գրում իմ մեծ կորստի մասին: Աստւած հոգիդ լուսաւոր երկնքում պահի»:

Ջիւան Գասպարեանը ծնւել է Կոտայքի մարզի Սօլագ գիւղում 1928 թւականին:

Դուդուկ սկսել է նւագել վեց տարեկանից` առանց դասաւանդումի: 1947 թւականին մեկնել է Մոսկւա ազգային սիրողական համոյթի հետ, որտեղ համերգից յետոյ Ստալինից ստացել է Պոբեդա ժամացոյց: 1949 թւականին միանում է Թաթուլ Ալթունեանի անւան Հայկական ժողովրդական երգի-պարի պետական անսամբլի Ազգային երգ ու պարի համոյթին, եւ իր առաջին մասնագիտական հանդիսումը որպէս մենակատար նշանադրութիւնն լինում է Երեւանեան երաժշտասիրական նւագախմբի հետ, քանի դեռ նոտաները կարդալ չգիտէր:

1956 թւականին ստանում է առաջին մրցանակը, 1959 թւականին` առաջին ոսկէ մեդալը Չորրորդ Միջազգային փառատօնում` ՄԱԿԳՄԻ հովանաւորութեան տակ: Նոյն մրցոյթին մասնակցելով, 1962 թւականին ստացել է արծաթէ մեդալ, 1973 թւականին` բրոնզէ, 1973 թւականին արժանացել է ՀՀ Ազգային արւեստագէտ պատւաւոր կոչմանը:

Ջիւան Գասպարեանը մասնակցել է համաշխարհային ճանաչում վայելած ֆիլմերի երաժշտութիւնների ստեղծմանը` «Քրիստոսի վերջին չարչարանքները» (1988 թ., ԱՄՆ), «Ռոնին» (1998 թ., ԱՄՆ), «Օնեգին» (1999 թ., ԱՄՆ), «Գլադիատոր» (2000 թ., ԱՄՆ), «Սիրանա» (2005 թ., ԱՄՆ), «Արիւնոտ ադամանդ» (2006 թ., ԱՄՆ), «Ձիւն եւ մոխիր» (2015 թ., Ռուսաստան) եւ այլն:

Թողարկել է աւելի քան 20 ձայնասկաւառակ, ունի աւելի քան 1000 ձայնագրութիւններ, նւագել է շուրջ 20 հազար համերգներում:

Ամերիկեան Նիւ Ջերսի նահանգը որոշում է ընդունել ճանաչել Արցախի անկախութիւնը: Ինչպէս յայտնում է Ամերիկայի Հայ Դատի գրասենեակը` 40 պատգամաւորից ներկայ է եղել 38-ը, 36-ը կողմ է քւէարկել, 2-ը` ձեռնպահ: Այս մասին յայտնում է yerkir.am-ը: 

Յիշեցնենք, որ, ըստ Հայ Դատի Արեւելեան Ամերիկայի յանձնախմբի, սենատոր Ջոզեֆ Լագանան նահանգային սենատի քննարկմանն էր ներկայացրել համապատասխան բանաձեւի նախագիծը:

Փաստաթղթում, որտեղ անդրադարձ կայ նաեւ արցախեան վերջին պատերազմին, դատապարտւում է Արցախի ու Հայաստանի խաղաղ բնակչութեան դէմ Ադրբեջանի ու Թուրքիայի իրականացրած ագրեսիան: Նիւ Ջերսիի կողմից Արցախի ճանաչումը կարեւոր քայլ կը լինի Արցախի Հանրապետութեան միջազգային` ապակենտրոն ճանաչման գործընթացում: ՀՅԴ Հայ Դատի կենտրոնական խորհրդում յատուկ ծրագրերի պատասխանատու Գէորգ Ղուկասեանը գրել էր.

«Գիտեմ` ստեղծւած իրավիճակում նման լուրերը նախկինի պէս չեն ընդունւում, բայց յատկապէս հիմա մենք իրաւունք չունենք որեւէ ուղղութիւնով թուլացնել պայքարը․․․ Հայ Դատի յանձնախումբը ձեռնարկում է անհրաժեշտ միջոցներ` բանաձեւի ընդունումն ապահովելու նպատակով»:

Նիւ Ջերսին դարձաւ ամերիկեան 10-րդ նահանգը, որը պաշտօնապէս ճանաչեց Արցախի Հանրապետութեան անկախութիւնը:

Կենտրոնական ընտրական յանձնաժողովը հրապարակել է բոլոր 2008 ընտրական տեղամասերում ամփոփւած նախնական արդիւնքները, համաձայն որի՝ առաջատարը Նիկոլ Փաշինեանի գլխաւորած «Քաղաքացիական պայմանագիր» կուսակցութիւնն է՝ քւէների մօտ 53,92 տոկոսով: Ըստ «Tert.am»-ի հաղորդման տեղեկացնում է «Ալիք»-ը:

ՀՀ Ազգային ժողովի արտահերթ ընտրութիւնների արդիւնքներով նոր խորհրդարանում կը լինեն երեք քաղաքական ուժ՝ «Քաղաքացիական պայմանագիր»-ը, «Հայաստան» դաշինքը եւ «Պատիւ ունեմ» դաշինքը: «Պատիւ ունեմ» դաշինքը չի յաղթահարել անցողիկ շեմը, եւ խորհրդարանում կը լինի իրաւունքի ուժով:

Մանդատները կը բաշխւեն հետեւեալ կերպ՝

«Քաղաքացիական պայմանագիր»՝ 71 մանդատ,

«Հայաստան» դաշինք՝ 29 մանդատ,

«Պատիւ ունեմ» դաշինք՝ 7 մանդատ:

4 ամենամեծ ազգային փոքրամասնութիւնների 4 մանդատներից երեքը բաժին են հասնում «Քաղաքացիական պայմանագրին», մէկը՝ «Հայաստան» դաշինքին: Ըստ այդմ՝ «Հայաստան» դաշիքնի մանդատները դառնում են 27:

Բացի այդ, «Հայաստան» դաշինքը ստանում է լրացուցիչ 2 մանդատ, որպէսզի խորհրդարանում ապահովի սահմանադրութեան պահանջը. Ընդդիմութեան կազմը խորհրդարանում պէտք է 1/3-ից պակաս չլինի:

Կենտրոնական Ընտրական Յանձնաժողովն այսօրւայ նիստում հաստատեց Ազգային ժողովի ընտրութիւնների քւէարկութեան նախնական արդիւնքները: Յանձնաժողովի բոլոր անդամները ստորագրեցին արձանագրութիւնը: Գրում է yerkirmedia.am-ը:

ԿԸՀ նախագահ Տիգրան Մուկուչեանը յայտնեց, որ ընտրողների ցուցակում ընդգրկւած ընտրողների թիւն 2 միլիոն 591 հազար 316 է, քւէարկութեան օրը ընտրական տեղամասում կազմւած ընտրողների լրացուցիչ ցուցակում ընտրողների թիւը` 1067, շրջիկ արկղով քւէարկող ընտրողների ընդհանուր թիւը` 2451, ընտրողների ընդհանուր թիւը` 2 միլիոն 595 հազար 334, քւէարկութեան մասնակիցների ընդհանուր թիւը  1 միլիոն 282 հազար 411 կամ 49, 4 տոկոս:

Անվաւեր քւէաթերթիկները թիւը կազմել է 4682:

Անճշտութիւնների չափը` 1110:

Ընտրութիւններին մասնակցած քաղաքական ուժերի ստացած ձայներն ու տոկոսները.

1. «Արդար Հայաստան» կուսակցութիւն - 0.31% (3922)

2. «Հայ ազգային  կոնգրես» կուսակցութիւն - 1,54% (19690)

3. «Քաղաքացիական պայմանագիր» կուսակցութիւն 53,92 % (687 414)

4. «Զարթօնք» ազգային քրիստոնէական կուսակցութիւն – 0,36% (4623)

5. «Ազատութիւն» կուսակցութիւն – 0,14 % (1844)

6. «Պատիւ ունեմ» դաշինք – 5,23 % (66647)

7. «Միասնական Հայրենիք» կուսակցութիւն – 0,08 % (957)

8. Համահայկական ազգային պետական (ՀԱՊ) կուսակցութիւն – 0,06 % (803)

9. «Լուսաւոր Հայաստան» կուսակցութիւն – 1,22 % (15571)

10. «Մեր տունը Հայաստանն է» կուսակցութիւն – 0,95 % (12164)

11. «Հանրապետութիւն» կուսակցութիւն – 3,04 % (38730)

12. «Հայոց Հայրենիք» կուսակցութիւն – 1,03 % (13119)

13. «Ազատ Հայրենիք» կուսակցութիւն – 0,32 % (4136)

14. «Բարգաւաճ Հայաստան» կուսակցութիւն – 3,95 % (50419)

15. Հայաստանի դեմոկրատական կուսակցութիւն – 0,39 % (5021)

16. «5165է» ազգային պահպանողական շարժում կուսակցութիւն – 1,22 % (15546)

17. «Քաղաքացու որոշում» սոցիալ-դեմոկրատական կուսակցութիւն – 0,3 % (3773)

18. «Շիրինեան-Բաբաջանեան» ժողովրդավարների դաշինք –1,5 % (19145)

19. «Ազգային օրակարգ» կուսակցութիւն – 0,06 % (721)

20. «Վերելք» կուսակցութիւն - 0,1 % (1259)

21. Ազատական կուսակցութիւն – 1,17 % (14935)

22. Հայաստանի եւրոպական կուսակցութիւն – 0,22 % (2786)

23. «Հայաստան» դաշինք – 21,04 % (268300)

24. Ազգային-ժողովրդավարական բեւեռ կուսակցութիւն – 1,47 % (18773)

25. «Ինքնիշխան Հայաստան» կուսակցութիւն – 0,28 % (3561)

Կենտրոնական ընտրական յանձնաժողովը ներկայացրել է բոլոր` 2008 ընտրատեղամասերից ստացւած քւէարկութեան արդիւնքների մասին նախնական տեղեկատւութիւնը: Տեղեկացնում է yerkirmedia.am–ը:

Կենտրոնական ընտրական յանձնաժողովի նախնական տւեալով` վարչապետի պաշտօնակատար Նիկոլ Փաշինեանի «Քաղաքացիական պայմանագիր» կուսակցութիւնը ստացել է ընտրողների ձայների 53,92 տոկոսը:

ՀՀ երկրորդ նախագահ Ռոբերտ Քոչարեանի գլխաւորած «Հայաստան» դաշինքը ստացել է 21,04 տոկոս ձայն:

Որեւէ այլ կուսակցութիւն կամ դաշինք չի կարողացել յաղթահարել սահմանւած 7 եւ 5 տոկոս շեմերը:

Սակայն, ըստ օրէնքի, եթէ անցողիկ շեմը յաղթահարում են միայն երկու քաղաքական ուժ, ապա մանդատներ է ստանում նաեւ առաւելագոյն թւով ձայներ հաւաքած երրորդ ուժը:

Այդ ուժը Արթուր Վանեցեանի գլխաւորած «Պատիւ ունեմ» դաշինքն է, որը ստացել է ընտրողների ձայների 5,23 տոկոսը:

«Բարգաւաճ Հայաստան» եւ «Լուսաւոր Հայաստան» կուսակցութիւնները նոր խորհրդարանում չեն լինի:

Մոսկւան ողջունում է ադրբեջանական կողմից 15 հայ զինծառայողի փոխանցումը Երեւանին` ականապատւած դաշտերի քարտէզի դիմաց: Այս մասին տելեգրամեան իր ալիքում այսօր գրել է ՌԴ ԱԳՆ պաշտօնական ներկայացուցիչ Մարիա Զախարովան: Տեղեկացնում է Yerkir.am-ն:

«Երկար սպասւած եւ հիանալի նորութիւն: Մենք Ողջունում ենք կողմերի նման քայլերը»,-ասել է դիւանագէտը:

Երէկ՝ յունիսի 12-ին, Ադրբեջանը Հայաստանին է վերադարձրել 15 ռազմագերու` Հայաստանի կողմից դրա դիմաց ստանալով Ակնայի (Աղդամի) ականապատ դաշտերի քարտէզները: Փոխանակումը տեղի է ունեցել ադրբեջանա-վրացական սահմանին` Վրաստանի ներկայացուցիչների մասնակցութեամբ:

Թշնամին Սիւնիքի Իշխանասարի Սեւ լճի տարածքից կիլոմետրերով առաջ է եկել եւ կանգնել` ըստ Yerkir.am-ի հաստատել է Գորիս համայնքի ղեկավարի տեղակալ Իրինա Եօլեանը:

Նա նշել է, որ Իշխանասարի հատւածում թշնամին պետական սահմանը անցել է եւ եւս երեք կիլոմետր առաջ եկել դէպի Վերիշէն բնակավայր․ հարիւրներով շարւած են:

«Եթէ GPS-ով Սեւ լճի 30 տոկոսն էր թշնամունը, սրանք էնքան են իրենց արտօնեալ համարում, որ որոշել են հասնել մինչեւ բնակավայր ու Շուռնուխի օրինակով առաջ գալ: Ժողովուրդ չգիտեմ` էլի ով ինչ կը հերքի, բայց լսէք սիւնեցիների ահազանգը, բոլորիս վերջը գալու է, եթէ շարունակենք այս վտանգաւոր անտարբերութիւնը»,- ահազանգել է Իրինա Եօլեանը:

Գորիսի փոխքաղաքապետ Մենուա Յովսէփեանը փաստել է, որ թշնամին Սեւ լճի տարածքում առաջ գալով` փորձ է կատարում տեղակայւելու:

«Ի դէպ, ասեմ, որ Սեւ լճի մեծ մասը մեզ է պատկանում նոյնիսկ ալիեւանիկոլական քարտէզներով»,- նշել է նա:

Սեւ լճի տարածքում գտնւող արհեստական ջրամբարից է իրականացւում համայնքի ոռոգման ջրի ջրամատակարարումը․նշւած քարտէզներով ադրբեջանցիներին է անցնում ջրամբարի պլատինան:

«Փոխարէն ԱԺ ամբիոնից ամպագոռգոռ եւ սուտ յայտարարութիւններ տարածելուն լաւ կը լինէր ամիսներ շարունակ մեր կողմից բարձրացւող խնդիրներին ականջ դնէիք, ամօթի զգացում ունեցէք...է»-ասել է Գորիսի փոխքաղաքապետը:

Սիւնեցիները նշում են, որ օրեր առաջ Հայաստանի եւ Ադրբեջանի զինւած ուժերի միջեւ դիրքային մարտեր են ընթացել Սիսիան քաղաքի արեւելքում գտնւող Իշխանասար եւ Ուխտասար սարերի միջնատարածքում: Իշխանասարի հատւածում այսօրւայ` զինւած բախումների մասին տեղեկութիւնները զուգակցւում են տարածքում ակտիւացած ռազմական ուղղաթիռների թռիչքներով:

ՀՀ պաշտպանութեան նախարարութիւնը հաստատել է, որ այսօր վաղ առաւօտեան, «սահմանների ճշգրտման» հիմնաւորմամբ, ադրբեջանցիները փորձել են որոշակի աշխատանքներ իրականացնել Սիւնիքի սահմանային հատւածներից մէկում, բայց հայկական ստորաբաժանումների ձեռնարկած միջոցառումներից յետոյ ադրբեջանական զինւորականները դադարեցրել են այդ աշխատանքները:

ՊՆ-ն, սակայն, հերքել է, որ այս պահին մարտեր են ընթանում Իշխանասարի ուղղութեամբ, ասել է` այս պահին ընթանում են բանակցութիւններ` ստեղծւած իրավիճակը հարթելու ուղղութեամբ:

Հայկական կողմից վիրաւորներ լինելու մասին լուրերը առայժմ պաշտօնապէս չեն մեկնաբանում:

Սիւնիքի նախկին մարզպետ Վահէ Յակոբեանի տեղեկութիւններով` այս գիշեր ադրբեջանցիները մեծ զօրքով բարձրացել են Իշխանասարի Սեւ լճի հատւած եւ հայկական այնտեղի յենակէտը ընկել է շրջափակման մէջ:

«Որքան տեղեակ եմ` ռուսները մօտենում են այնտեղ, որ բանակցութիւններ տանեն: Որքան տեղեակ եմ` վիրաւորներ կան այնտեղ, բայց դա ստոյգ չէ: Ըստ երեւոյթին, երբ իրենց ոչ ոք չի դիմադրում, առաջ են գալիս, որ հասնեն Երեւան, դա է իրենց ուզածը»,-ասել է նախկին մարզպետը:

Սիւնիքի գործող մարզպետի մեկնաբանութիւնը, ըստ լրատւամիջոցների, հետեւեալն է․ «նման տեղեկութիւն ես չեմ իմանում»:

Աւելի վաղ Yerkir.am-ը ներկայացրել էր Մենուա Յովսէփեանի հարցազրոյցը:

Նշենք, որ Իշխանասար գիւղը Սիսիան համայնքի կազմում է, Իշխանասարի փէշերին: Բայց միջադէպը այդտեղ չի եղել, այլ Սեւ լճի շրջանում` Իշխանասարի փէշին: Սեւ լճի մեծ մասը անգամ Խորհրդային քարտէզներով` Հայաստանի տարածքում է: