«Կաքաւիկ» մանկական հանդէսի տնօրինութեան նախաձեռնութեամբ եւ Սպահանի հայոց թեմի Կրօնական խորհրդի հովանաւորութեամբ, 13 յունիս 2014 թւականին Հայ Դատի կենտրոնատեղիի սրահում տեղի ունեցաւ «Օրօր ու Նանի» եւ «Մանկական տօնախաղ» տեսա-լսողական սկաւառակների շնորհանդէսը:

Միջոցառմանը ներկայ էին թեմի բարեջան առաջնորդ՝ գերշ. Տ. Բաբգէն եպս. Չարեանը, ազգային մարմինների, միութիւնների, դպրոցների ներկայացուցիչները եւ հրաւիրեալները:

Ծրագիրը մեկնարկեց օրւայ հաղորդավար՝ Թովմա սրկ. Գալստանեանը, որը ներկաներին ողջոյնի խօսքեր ուղղելուց յետոյ նշեց, որ քրիստոնէական դաստիարակութեան վերաբերեալ այս կարեւոր գաղափարի ներկայացնողն եղել է «Կաքաւիկ» մանկական հանդէսի տնօրէն՝  օրդ. Ժուլիետ Դաւթեանը, հովանաւորութեամբ Սրբազան Հօր, Կրօնական խորհրդի եւ համագործակցութեամբ Քրիստոնէական դաստիարակութեան խորհրդի: Նա աւելացրեց, որ մեր համայնքում իր տեսակի մէջ առաջինը համարւող ազգային եւ հոգեւոր բնոյթ կրող այս աշխատանքը, ծառայելու է մանուկ-պատանիներին, որպէսզի իրենց գիտակցութեան ձեւաւորման առաջին իսկ պահերից, ստանան քրիստոնէական հայեցի դաստիարակութիւն: 

Բացման խօսքից յետոյ բեմ հրաւիրւեց «Կաքաւիկ» մանկական հանդէսի տնօրէն՝ օրդ. Ժուլիետ Դաւթեանը, ով հակիրճ կերպով ներկայացրեց «Կաքաւիկ» մանկական հանդէսի պատմական անցեալը, նշելով, որ այն մանկական աշխարհ է մուտք գործել 2010 թւականից Լոս Անջելեսում եւ ունեցել է բազմատեսակ ներկայացումներ ու հրատարակութիւններ: Սոյն հանդէսի առաքելութիւնն է հայ մատաղ սերնդին սովորեցնել հայոց լեզուն, հայկական սովորոյթներն ու աւանդոյթները, փոխանցել ազգային արժէքները, մանուկների ոգին լցնել հայ լինելու հպարտութեամբ եւ դա  անել ամենամանկական, զւարճալի ու հետաքրքրաշարժ միջոցներով:

Այնուհետեւ օրդ. Դաւթեանը ներկայցրեց երկու տեսա-լսողական սկաւառակները: 

- «Օրօր ու Նանի» մանկական ձայնասկաւառակն իր մէջ է ընդգրկում մանկական Աստւածաշնչից վերցրած պատմութիւններ ու առակներ, որոնք ներկայացւում են մանկական ու մանուկին հաճելի ձեւերով, նրանց մէջ ներշնչելու քրիստոնէական դաստիարակութիւնն ու մարդկութեան բարի արժէքները:

- «Մանական տօնախաղ» ձայնասկաւառակն օգտագործելով ժամանակակից միջոցներն ու հետաքրքրութիւնները, մուլտֆիլմի ու խաղերի միջոցով հայ մանուկին ծանօթացնում է եկեղեցական-ազգային-պետական կարեւորագոյն տօներին եւ հայ մանուկ-պատանուն հոգեւոր դաստիարակութիւն է փոխանցում:

Օրդ. Դաւթեանն իր խօսքն աւարտեց շնորհակալական խօսք ուղղելով Սպահանի հայոց թեմի առաջնորդին, Կրօնական խորհրդին, համայնքի ազգային մարմիններին եւ անդամներին իրենց ցուցաբերած ջերմ համագործակցութեան առթիւ:

Ապա իւրաքանչիւր սկավառակից ցուցադրւեցին որոշ բաժիններ, որոնք հաճելի ու գեղեցիկ տպաւորութիւն թողեցին ներկաների վրայ:

Յաջորդ բաժնում արտայայտւեց Կրօնական խորհրդի անդամ՝ պրն. Սաքօ Տէր Յովհաննիսեանը, օրդ. Դաւթեանին ուղղելով խորհրդի շնորհաւորանքի եւ քաջալերանքի խօսքերը, յայտնելով, որ ներկայ համաշխարհայնացման պայմաններում, երբ վտանգւած են մշակոյթն ու կրօնը, նման միջոցառումները եւ աշխատանքները ծառայելու են որպէս հայի ինքնութեան եւ արժէքների զարգացման միջոց:

Փակման խօսքն ասելու համար բեմ հրաւիրւեց առաջնորդ Սրբազան Հայրը: Նա իր արտայայտութիւնների մէջ իր հպարտութիւնը յայտնեց այս աշխատանքի իրագործման եւ նախաձեռնողի հետեւողականութեան առթիւ, անհրաժեշտ համարելով նման դաստիարակչական ծրագրերի շարունակականութիւնը: Վերջում գնահատանքի խօսք ուղղեց օրդ. Դաւթեանին, օրհնելով նրա կատարած գործը:

Հարկ է նշել, որ սոյն աշխատանքի իրագործմանն աջակցել են համայնքիս երիտասարդներ՝ տկն. Լեռնիկ Ծատուրեանը եւ պրնյք. Մհեր Պօղոսեանն ու Դրօ Մարգարեանը:

Միջոցառման վերջին բաժնում Կաքաւիկի մեղմ երաժշտութեան ներքոյ տեղի ունեցաւ համեստ հիւրասիրութիւն: