Նոր Ջուղայի հայոց ազգ. «Արմէն» տարրական երկսեռ կրթահամալիրի տնօրինութիւնը տարիներ է, ինչ Մարմնակրթութեան շաբաթը պատեհ առիթ համարելով, նախաձեռնում է մի շարք միջոցառումներ՝ ընտանիքների՝ ի մասնաւորի աշակերտների մօտ առողջ ապրելակերպի գաղափարն առաւել արմատաւորելու նպատակով: Այս տարի նոյնպէս նշւած շաբաթը  յագեցած էր աշակերտների համար կազմակերպւած զանազան ծրագրերով, որոնց շարանը եզրափակւեց չորեքշաբթի՝ 2018 թւականի հոկտեմբերի 24-ի առաւօտեան ժամը 8:00-ին սկիզբ առած միջոցառմամբ: Դպրոցի անձնակազմից ու աշակերտներից բացի եզրափակիչ այս ծրագրին ներկայ էին նաեւ Կրթական խորհրդի ներկայացուցիչներն ու սաների ծնողները:

Միջոցառման մեկնարկը տրւեց «Արմէն» կրթահամալիրի տնօրէն Վրէժ Շիրւանեանի ողջոյնի խօսքով, ով շարունակութեան մէջ շնորհակալութիւն յայտնելով հիւրերին՝ դպրոցի հարւէրին ընդառաջելու եւ ծրագրին մասնակցելու կապակցութեամբ, կարեւորութեամբ շեշտեց, թէ Կրթական խորհրդի անդամների ու ծնողների ներկայութիւնը դպրոցի աշխատանքներին, ոչ միայն խանդավառութիւն է պարգեւում աշակերտներին, այլեւ ոգեւորում եւ գօտեպնդում է դպրոցի պատասխանատուներին՝ առաւել բծախնդիր գործունէութիւն ծաւալելու՝ յանուն հայ մատաղ սերնդի դաստիարակութեան եւ կրթութեան:

Տնօրէնի արտայայտութիւններին յաջորդեց դպրոցի ծնողներից դոկտ. Վոլգա Յովսէփեանի ելոյթը, ով հիմնականում անդրադարձաւ մարզանքի յատկութիւններին ու առողջ ապրելակերպի առաւելութիւններին:

Այնուհետեւ բոլորի մասնակցութեամբ իրականացւեց առաւօտեան մարզանք, որը վարեց էրոբիկ շարժումների մարզիչ Յասմիկ Յովսէփեանը: Աշխոյժ եւ բուռն դրական լիցքերով ողողւած այս մարզական մթնոլորտը վայելեցին սաները, դպրոցի անձնակազմը, հրաւիրեալներն ու ծնողները, որից յետոյ բոլորը ճաշակեցին ծնողական խորհրդի պատրաստած նախաճաշը, ուր միայն մատակարարւել էր առողջարար սնունդ:

Նախաճաշից յետոյ ներկաներն առիթ ունեցան կրթահամալիրի սրահում դիտելու մարմնակրթութեան շաբաթւան առնչւող աշակերտական ցուցահանդէսը, որը բաղկացած էր մանրակերտներից, ստեղծագործական ձեռքի աշխատանքներից ու պատի թերթերից:

Թղթակից (Նոր Ջուղա)

Լուսանկարները տրամադրեց «Արմէն» կրթահամալիրի գրասենեակը

 

armen_marmnamarzootyoon_01.jpg armen_marmnamarzootyoon_02.jpg armen_marmnamarzootyoon_03.jpg

armen_marmnamarzootyoon_04.jpg armen_marmnamarzootyoon_05.jpg armen_marmnamarzootyoon_06.jpg

armen_marmnamarzootyoon_07.jpg armen_marmnamarzootyoon_08.jpg armen_marmnamarzootyoon_09.jpg

armen_marmnamarzootyoon_10.jpg armen_marmnamarzootyoon_11.jpg armen_marmnamarzootyoon_12.jpg

armen_marmnamarzootyoon_13.jpg armen_marmnamarzootyoon_14.jpg armen_marmnamarzootyoon_15.jpg

armen_marmnamarzootyoon_16.jpg armen_marmnamarzootyoon_17.jpg armen_marmnamarzootyoon_18.jpg

armen_marmnamarzootyoon_19.jpg armen_marmnamarzootyoon_20.jpg