Սուրբ Աստւածածնի Վերափոխման տօնը Հայ Առաքելական Սուրբ Եկեղեցու հինգ տաղաւար տօներից չորրորդն է եւ Տիրամօրը նւիրւած տօներից ամենահինը:

Այս տօնի առթիւ կիրակի՝ 2018 թւականի օգոստոսի 12-ին, Նոր Ջուղայի «Ս. Մինաս», «Ս. Ստեփանոս», «Ս. Յովհաննու» եւ «Ս. Աստւածածին» եկեղեցիներում մատուցւեց Ս. եւ անմահ պատարագ: Ս. Աստւածածին եկեղեցում պատարագը մատուցեց Սպահանի հայոց թեմի առաջնորդ գերշ. Տ. Սիփան եպս. Քէչէճեանը:

Պատարագին մասնակցում էին եկեղեցու ծխատէր արժ. Տ. Խաչատուր քհնյ. Զարգարեանն ու դպրաց դասի ներկայացուցիչներ: Երգեցողութիւնը կատարեց Ս. Ամենափրկիչ վանքի «Կոմիտաս» երգչախումբը:

Արարողութեան ընթացքում յաւուր պատշաճի քարոզեց առաջնորդ Սրբազան Հայրը, որն իր խօսքն սկսեց տօնի մասին բացատրութիւններով, ապա ակնարկ կատարելով “Յովհաննէս” աւետարանի 19-րդ գլխի 26 եւ 27 համարներին, ամփոփեց թէ. «Աստւածածինը դարձաւ մաքրամաքուր հաւատացեալ ընտանիքի խորհրդանիշ, եւ մայրութիւնն ստացաւ նոր ու սուրբ իմաստ, յատկապէս հայ ընտանեկան յարկի ներքոյ»: 

Քարոզիչն իր խօսքի շարունակութեան մէջ ներկաներին բացատրեց, թէ որպէս քրիստոնեաներ ունենք երկու տեսակի ծնողներ. մարմնական ծնողներ, ովքեր ֆիզիքական հասկացութեամբ մեր ծնողներն են՝ հայրն ու մայրը, որոնց յարգելու եւ մեծարելու ու մանաւանդ ծերանալուց յետոյ՝ խնամելու եւ գուրգուրելու պատւիրանը ստացել ենք Աստւածաշնչից, եւ հոգեւոր ծնողներ՝ Սուրբ Աւետարանն ու Հայաստանեաց Առաքելական Սուրբ եկեղեցին: Վերջում Սրբազան Հայրը յորդորեց, որ Աստւածածնի Վերափոխման այս տօնը յարմարագոյն առիթը դարձնել մեր ուխտը վերանորոգելու եւ մեր սէրն ու մանաւանդ հաւատարմութիւնը արտայայտելու թէ՛ մեր մարմնական եւ թէ՛ մեր հոգեւոր ծնողների նկատմամբ՝ Աստծու ողորմութեանը, օրհնութեանն ու շնորհքներին արժանանալու համար:

Պատարագից յետոյ կատարւեց խաղողօրհնէք եւ օրհնւած խաղողը բաժանւեց հաւատացեալ ժողովրդին:

Թղթակից (Նոր Ջուղա)

khaghoghorhnek_01.JPG khaghoghorhnek_02.JPG khaghoghorhnek_03.JPG

khaghoghorhnek_04.JPG khaghoghorhnek_05.JPG khaghoghorhnek_06.JPG

khaghoghorhnek_07.JPG