Երեքշաբթի՝ 2018 թւականի մարտի 27-ի երեկոյեան, Նոր Ջուղայի «Ս. Գրիգոր Լուսաւորիչ», «Ս. Ստեփանոս», «Ս. Յովհաննու Կարապետ» եւ «Ս. Մինաս» եկեղեցիներում տեղի ունեցաւ եկեղեցական արարողութիւն՝ Տասը կոյսերի առակի յիշատակի օրւայ առթիւ: 

«Ս. Գրրիգոր Լուսաւորիչ» եկեղեցու կարգը իրականացւեց Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանի նախագահութեամբ ու կատարողութեամբ եւ արժ. Տ. Խաչատուր քհնյ. Զարգարեանի ու սարկաւագաց դասի մասնակցութեամբ:

Ընթացքում ընթերցւեցին  պատկան աստւածաշնչական դրւագներն ու սուրբգրային հատւածները, իսկ վերջին ընթերցման պահին 10 երիտասարդուհիների կատարմամբ մարմնաւորւեց 10 Կոյսերի առակը: 

Ներկայացման աւարտին առաջնորդ Հայր Սուրբն օրւայ առթիւ իր հայրական պատգամում շեշտելով, որ մեր հայրերը 10 Կուսանաց արարողութեամբ փորձել են մեզ ցոյց տալ կեանքի մեծագոյն գաղտնիքն ու մեծագոյն իմաստութիւնը, ընդգծեց, թէ նման պարագաներում եկեղեցին դառնում է մի դպրոց, որտեղ սովորում ենք հոգեւոր կեանքի գիտութիւնները. գիտութիւններ, որոնց կարող ենք ընդօրինակել՝ մեր հոգեւոր կեանքում առաւել բարգաւաճելու եւ բարեփոխումներ կատարելու համար: Նա աւելացնելով, որ հակառակ սովորական դպրոցների, կեանքի դպրոցում միայն մէկ անգամ ապրելու եւ քննութիւն յանձնելու առիթ ունենք, յորդորեց՝ իմաստուն լինել եւ յաջողութեամբ անցկացնել այս քննութիւնը: 

Յատկանշական է, որ առակը մարմնաւորող օրիորդների մասնակցութիւնն ապահովելու հարցում Սպահանի հայոց թեմի Կրօնական խորհրդի հետ համագործակցել էր Նոր Ջուղայի հայոց ազգ. «Արմէն» երկսեռ տարրական կրթահամալիրի տնօրինութիւնը: 

Թղթակից (Նոր Ջուղա)