Չորեքշաբթի՝ 2018 թւականի մարտի 7-ի առաւօտեան Սպահանի հայոց թեմի առաջնորդ՝ գերպ. Տ. Սիփան ծ. վրդ. Քէչէճեանը եւ իրեն ուղեկցող հոգեւոր հայրերն ու համայնքի վարչութեան ներկայացուցիչները այցելեցին «Սրբոց Վարդանանց» տարրական դպրոցը, որտեղ գերպ. Տ. Սիփան ծ. վրդ. Քէչէճեանը հակիրճ եւ մատչելի լեզւով բացատրեց պահեցողութեան իմաստը եւ Միջինքի խորհուրդը աշակերտների համար:
    Այնուհետեւ Շահինշահրի «Սրբոց Վարդանանց» եկեղեցու սրահում տեղի ունեցաւ Արեւագալի արարողութիւն՝ Սպահանի հայոց թեմի առաջնորդ՝ գերպ. Տ. Սիփան ծ. վրդ. Քէչէճեանի ձեռամբ եւ ներկայութեամբ համայնքի հոգեւոր տեսուչ գերպ. Տ. Անանիա ծ. վրդ. Գուճանեանի, արժն. Տ. Սահակ քհնյ. Մինասեանի եւ դպրաց դասի: Օրւայ արարողութեանը մասնակցել էին նաեւ համայնքի ազգային մարմինների եւ միութիւնների ներկայացուցիչները եւ անդամները:
    Արեւագալի արարողութեանը յաջորդեց Շահինշահրի «Հայ կանանց եկեղեցասիրաց» միութեան նախաձեռնութեամբ Միջինքի առիթով կազմակերպւած միջոցառումը՝ համայնքի ազգայինների, միութենականների եւ հաւատացեալ հայորդիների մասնակցութեամբ:
    Ողջոյնի խօսքով հանդէս եկաւ կազմակերպիչ միութեան նախագահ Անահիտ Օհանեանը, ով բարի գալուստ մաղթեց ներկաներին եւ գեղեցկօրէն ներկայացրեց Միջինքի խորհուրդը եւ դրա հետ կապւած գեղեցիկ աւանդոյթները:
    Այնուհետեւ թեմի առաջնորդը օրհնեց օրւայ առիթով պատրաստւած ճաշի սեղանը եւ բոլոր ներկաները ճաշակեցին անուշաբոյր ու ախորժալի մախոխը, փարինջէ փլաւն ու ոսպապուրը: Ձեռնարկի ընթացքում Փերիոյ, Չհարմահալի եւ Կիլիկիոյ շրջանների տարազներով զգեստաւորւած միութեան երեք անդամուհի Միջինքի բախտախաղի կարկանդակ բաժանեցին ներկաներին:
    Այնուհետեւ իրենց գեղեցիկ երգով ու ասմունքով ելոյթ ունեցան Մագի Յարութիւնեանը եւ Այիդա Մուրադեանը:
    Յաջորդիւ տկն. Օհանեանը միութեան անունից շնորհակալական խօսք ուղղեց հոգեւոր հայրերին, դպրաց դասին, Հայ համայնքի վարչութեանը՝ իրենց ցուցաբերած հովանաւորութեան եւ համագործակցութեան համար:
    Ծրագրի աւարտին իր հայրական պատգամով արտայայտւեց գերպ. Տ. Սիփան ծ. վրդ. Քէչէճեանը, ով շնորհաւորելով Միջինքը՝ յայտնեց, որ Միջինքը առիթ է հաւատացեալներին յիշեցնելու իրենց արարքների մասին պահեցողութեան ժամանակաշրջանում: Նա իր խօսքում դրւատեց «Հայ կանանաց եկեղեցասիրաց» միութեան տարած բոլոր աշխատանքները՝ մաղթելով նրանց առաւել ոյժ ու կորով: Թեմի Առաջնորդն իր խօսքը եզրափակեց բարձր գնահատելով Հայ համայնքի վարչութեան ծաւալած գործունէութիւնը եւ օգտաշատ դերակատարութիւնը համայնքի ազգային կեանքում:


Շահինշահրի Հայ Համայնքի Վարչութեան թղթակից՝
Վ. Յարութիւնեան

 
mijink_sh_01.jpg mijink_sh_02.jpg mijink_sh_03.jpg

mijink_sh_04.jpg