Կիրակի՝ 2018 թւականի փետրւարի 25-ի երեկոյեան ժամը 6-ին, նախաձեռնութեամբ Սպահանի հայոց թեմի Պատգամաւորական ժողովի դիւանի տեղի ունեցաւ խորհրդակցական հանդիպում Շահինշահրի «Սրբոց Վարդանանց» համայնքային կենտրոնում: Սոյն հանդիպմանը ներկայ էին թեմի առաջնորդ Տ. Սիփան ծ. վրդ. Քէչէճեանը, համայնքի հոգեւոր տեսուչ Տ. Անանիա ծ. վրդ. Գուճանեանը, արժ. Տ. Սահակ քհնյ. Մինասեանը, համայնքի պատգամաւորները, Թեմական եւ Կրօնական խորհուրդների, համայնքի Վարչութեան եւ միութիւնների, Հայ Դատի յանձնախմբի ներկայացուցիչները եւ հայոց ազգային «Նարեկ» մանկապարտէզ-նախակրթարանի եւ «Սրբոց Վարդանանց» տարրական դպրոցի տեսչութիւնը, ուսուցչական կազմը եւ մի քանի հրաւիրեալներ: 

Սոյն հանդիպման գլխաւոր թեման էր համայնքի թւային նւազեցման հետեւանքով առաջացած մի շարք խնդիրներ եւ դժւարութիւններ, որոնք անտարակոյս անդրադառնում են համայնքի ազգային կեանքի տարբեր ոլորտներին՝ ի մասնաւորի հայոց ազգային մանկապարտէզ-նախակրթարան եւ տարրական դպրոցների ու միութենական կեանքի գործունէութեանը:

Ժողովը բացւած յայտարարեց Պատգամաւորական ժողովի ատենապետ Թաթուլ Օհանեանը, ով ներկայացրեց ժողովի օրակարգը եւ հրաւիրեց ներկաներին արտայայտելու իրենց տեսակէտները, մտահոգութիւնները, եւ նաեւ լուծումներ առաջարկել պարագայաբար առաջացած խնդիրները եւ խոչընդոտները վերացնելու կամ առնւազն կասեցնելու ուղղութեամբ:

Ժողովը համայնքի ապագայի մասին աւելի յստակ պատկերացում կազմելու համար որդեգրեց իրատես լինելու գաղափարը եւ այս լոյսի ներքոյ արտայայտւեցին թեմի առաջնորդը, համայնքի հոգեւոր տեսուչը, քհնյ. հայրը եւ ներկաներից մի քանիսը, ովքեր միաժամանակ պահպանեցին կացութիւնը ճշգրիտ գնահատելու եւ իրերին իրենց անունով կոչելու սկզբունքը:

Համայնքի ստեղծւած դժւարութիւնները թւարկելով, ժողովը շօշափեց հայոց միջնակարգ դպրոց չունենալու իրողութիւնը, իսկ միութենական կեանքում բիւջէտային խնդիրները եւ մարդոյժի պակասը: Անդրադառնալով անցեալում թեմի Կրթական խորհրդի եւ հայ համայնքի Վարչութեան նախաձեռնութեամբ կազմակերպւած հայերէն դասընթացներին, նշւեց որ դժբախտաբար այս վերջին տարիներին նոյնիսկ հայ համայնքի Վարչութեան ցուցաբերած ջանքերով հանդերձ՝ մի շարք պատճառաբանութիւնների բերումով նշեալ դասընթացների կազմակերպումը չեն ընդառաջւել աշակերտների կողմից, սակայն յամենայն դէպս Պատգամաւորական ժողովի դիւանը պնդեց, թէ ելքեր են փնտռելու աշակերտներին խրախուսելու եւ սիրաշահելու ուղղութեամբ եւ յաջորդ ուսումնական տարեշրջանից անտարակոյս կազմակերպւելու են նշեալ դասընթացները՝  լրացնելու պարսկական դպրոց յաճախող հայ աշակերտի հայեցի դաստիարակութեան բացը: 

Համայնքի առջեւ ծառացած գերխնդիրները դիմագրաւելու համար, հնչեցին մի շարք առաջարկութիւններ եւ ժողովականները ընդգծեցին նաեւ միասնականութեան ազդեցիկ դերակատարութիւնը յաջողութիւններ եւ ձեռքբերումներ արձանագրելու ուղղութեամբ՝  բոլորը մի ընդհանուր յայտարարի գալով, թէ  իրենց ջանքերն ի սպաս են դնելու համայնքի ազգային կեանքն իր բնականոն հունով ընթանալու համար:

Սոյն հանդիպումն աւարտւեց երեկոյեան ժամը 8:30-ին:

 

Շահինշահրի Հայ Համայնքի Թղթակից՝   Վ. Յարութիւնեան

 
shahinshahr_handipoom_01.jpg shahinshahr_handipoom_02.jpg shahinshahr_handipoom_03.jpg