Համայն հայութիւնը ՀՀ-ում եւ Սփիւռքում, աշխարհի բոլոր կողմերում ոգեկոչում է Հայոց Ցեղասպանութեան զոհերի յիշատակը այն պայմաններում երբ մեր քոյրերը եւ եղբայրները Արցախում շրջափակւած են։

Միջազգային հանրութեան ոչ պատշաճ եւ ուշացած գնահատականներն, նոր ոճիրներ իրականացնելու առիթ հանդիսացան ոչ միայն Թուրքիայի, այլ նաեւ Ադրբեջանի համար։ 108 տարի հետեւողականօրէն ժխտելով Հայոց Ցեղասպանութիւնը եւ ջանալով չէզոքացնել միջազգային հանրութեան կողմից դրա ճանաչման ցանկացած փորձ՝ Թուրքիան ու Ադրբեջանը առ այսօր չեն դադարեցնում իրենց ոճրագործ քաղաքականութիւնը հայութեան նկատմամբ։ 1988 թւականից ցայսօր հայ ժողովուրդը բազմիցս առերեսւել է ցեղասպան քաղաքականութեան դրսեւորումների:

Հայ ազգաբնակչութեան ջարդերը եւ զանգւածային սպանութիւնները Սումգայիթում, Բաքւում, 2016 եւ 2020 թթ․ Արցախի դէմ թուրք-ադրբեջանական ագրեսիան մարդատեացութեան վառ օրինակներ են։ Մեծ Եղեռնը չսպիացող վէրք է մեզ համար։ Այն նաեւ քաղաքական, իրաւական եւ բարոյական խարան է միջազգային հանրութեան վրայ, որը կարելի է ջնջել միայն Հայոց Ցեղասպանութեան համաշխարհային ճանաչման եւ դատապարտման միջոցով։

«108 տարի առաջ հայ ժողովուրդը յայտնւեց մեն-մենակ ոճրագործութեան դէմ: Այսօր, նոյնպէս այդպէս է, այդ առումով, հայ ժողովուրդը իր միասնականութեան մէջ պիտի շարունակի պայքարել»:

Ապրիլի 24-ը մեզ համար այլեւս խնկարկումի եւ յարութեան օր չի, այլ գիտակցելու, համախմբւելու եւ զարթօնքի օր պիտի դառնայ.

Փրկութեան Գաղտնիքը մեզ ասւած է Խրիմեան Հայրիկի մարգարէական խօսքի մէջ,

Երկաթէ շերեփ է պէտք, երկաթէ կամք է պէտք,  ուրեմն պէտք է

          վերականգնել Հայաստան, Արցախ եւ Սփիւռք եռամիասնութիւնը։

Հայոց Ցեղասպանութեան 108-ամեակի Ոգեկոչման Յանձնախումբ

19 ապրիլ 2023 թ.                                                                                     

Ազգային Առաջնորդարան – Ս. Ա. Վանք

Երեքշաբթի՝ ապրիլի 11-ին, Ն.Ջ. Հայ Մ.Մ. «Արարատ» միութեան Շահինշահրի մասնաճիւղի յարկի ներքոյ, նախաձեռնութեամբ նոյն մասնաճիւղի Մշակութային միաւորի, մեծարման երեկոյ իրականացւեց՝ Մայրութեան եւ գեղեցկութեան տօնի առթիւ, ուր հրաւիրւել էին Շահինշահրի հայ համայնքի բոլոր մայրերը:

Սկզբում Մշակութային միաւորի անունից շնորհաւորանքի եւ բարեմաղթանքի խօսքերով ելոյթ ունեցաւ Էմմա Օրդուբէգեանը: Նա յատկապէս անդրադառնալով հայ մայրերի առանցքային դերակատարութեանը ազգային-հասարակական կեանքում՝ շեշտեց, որ համայն հայ մայրերը պէտք է իրենց ձայնը միացնեն հայրենիքում ապրող մայրերի պահանջատէր ձայնին, ովքեր այս օրերին դժւարին պայմանները յաղթահարելով եւ իհրակէ պարտութիւնը չընդունելով, յանուն հայ ազգի արժանապատւութեան եւ հայրենիքի հողային ամբողջականութեան պահպանման, իրենց ամենաթանկն են զոհաբերում այս նւիրական ճանապարհին:

Շարունակութեան մէջ տօնի առթիւ շնորհաւորանքներ ու բարեմաղթանքներ ասաց նաեւ մասնաճիւղի վարչութեան անդամուհի Վարդուհի Պօղոսեանը, այնուհետեւ խանդավառ մթնոլորտի ներքոյ միջոցառումն շարունակւեց վիճակախաղով, խաղ-մրցոյթներով եւ հիւրասիրութեամբ. հրաւիրեալներից հանդէս եկան երգերով, ասմունքներով եւ իհարկէ հայ մայրերին ձօնւած խօսքերով ու մաղթանքներով:

Թղթակից (Նոր Ջուղա)

Լուսանկարները տրամադրել են կազմակերպիչները:

Հովանաւորութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի, Հայ եկեղեցասէր կանանց հոգեւոր լսարանի եւ «Շուշանիկ» երգչախմբի հիմնադրման 20-րդ ամեակի առիթով, կազմակերպւել է հոգեւոր թեմաներով լսարանների շարան, որոնցից երկուսն իրականացւեցին ապրիլի 3-ին եւ 11-ին, Նոր Ջուղայի հայոց ազգ. կրթահամալիրի «Ալենուշ Տէրեան» դահլիճում, ներկայութեամբ՝ թեմակալ Առաջնորդ Սրբազան Հօր, Կանանց հոգեւոր լսարանի պատասխանատու արժ. Տ. Վարդան քհնյ. Աղաբաբայեանի, թեմի քահանայից եւ դպրաց դասերի, ազգային մարմինների, հայոց դպրոցների եւ միութիւնների ներկայացուցիչների, յոբելեար լսարանի եւ երգչախմբի անդամուհիների եւ մի շարք այլ հրաւիրեալների:

Իրականացւած լսարանների թեմաներն էին հերթաբար՝ «Քրիստոսի չարչարանքներն ու խաչելութիւնը» եւ «Քրիստոսի յարութիւնը»: Ներկայացւած նիւթերի բովանդակութիւնները կազմել էին Կանանց հոգեւոր լսարանի անդամուհիներ՝ Մարինէ Առաքելեանն ու Մարինէ Մխիթարեանը. որպէս խորհրդատուներ յիշեալների հետ համագործակցել էին՝ բրշ. Ալբերտ սրկ. Ղազարեանը, «Շուշանիկ» հոգեւոր երգչախմբի ղեկավար ու յոբելեար լսարանի անդամուհի Անուշ Յովհաննիսեանը՝ գլխաւորութեանբ գերշ. Տ. Սիփան Ս. Եպս. Քէչէճեանի:

Լսարաններն ընթացել են հետեւեալ ձեւաչափով՝ սկզբում հնչել է «Տէրունական աղօթք»-ը, այնուհետեւ իւրաքանչիւր թեմայի շրջագծում ընթերցւել են Աւետարանական հատւածներ Մարինէ Մխիթարեանի միջոցով, իսկ յաջորդիւ ներկաներն ունկնդրել են Մարինէ Առաքեալեանի մեկնաբանութիւնները նոյն հատւածների կապակցութեամբ. Անուշ Յովհաննիսեանը կատարել է հոգեւոր երգերից հատւածներ՝ աշխարհաբար տարբերակով, ապա շարունակութեան մէջ բացատրութեամբ է հանդէս եկել մի շարք մանրանկարչութիւնների եւ Նոր Ջուղայի եկեղեցիներում պատկերւած որմնանկարչութիւնների մասին. վերջինիս ելոյթները նոյնպէս առնչւում էին լսարանի թեմաներին:

Յատկանշական է, որ մի շարք սլայդների հայթայթման գործում կազմակերպիչներին օժանդակել է Արլետ Հայրապետեանը, հոգեւոր երգերը աշխարհաբարի վերածելու գործն իրականացրել է Թովմա սրկ. Գալստանեանը, իսկ ընդհանուր սլայդների պատարստումը կատարել է Մարինէ Մխիթարեանը:

Այս շրջագծում եւս լսարաններ են տեղի ունենալու յառաջիկայ շաբաթներին՝ «Յիսուս Քրիստոսի չարչարանքների, խաչելութեան, մահւան եւ յարութեան կարեւորութիւնը մեր կեանքում» թեմայով:

Նշելի է նաեւ, որ յոբելեանական միջոցառումների շարանի մեկնարկը տրւել է ընթացիկ տարւայ յունւարի 29-ին, Ս. Ամենափկիչ վանքի «Ներսէս Շնորհալի» գրադարանում կազմակերպւած Ս. Ծննդեան տօնին նւիրւած լսարանով, որին մասնակցել էին՝ թեմակալ Առաջնորդ Սրբազան Հայրը, անդամուհիներն ու սահմանափակ թւով հրաւիրեալներ:

Թղթակից (Նոր Ջուղա) 

 Հինգշաբթի՝ ապրիլի 13-ի երեկոյեան, նախաձեռնութեամբ Նոր Ջուղայի Հայ Կանանց Գթութեան միութեան վարչութեան եւ կազմակերպութեամբ պատկան կազմակերպիչ յանձնախմբի, նոյն միութեան յարկի ներքոյ, որը գտնւում է Նոր Ջուղայի հայոց ազգ. ծերանոցում, Մայրութեան եւ գեղեցկութեան տօնի առթիւ իրականացւեց մեծարման միջոցառում, որտեղ գնահատւեցին եւ մեծարւեցին միութեան անդամուհիները:

Երեկոն սկիզբ առաւ վարչութեան խօսքով, որն ընթերցեց Մարինէ Ասատրեանը, ով տօնի առթիւ շնորհաւորանքներ եւ բարեմաղթանքներ արտայայտելուց յետոյ, ասաց. «Մայրերը հայ օջախների հենքն ու սիւնն են: Հայ մայրն իր նւիրումով, իր սիրով ու աշխատասիրութեամբ երաշխաւորում  է ազգի գոյատեւումը: «Մայրերի ափերի մէջ պիտի փնտրել ազգի փրկութիւնը», ասել է մեծն Նժդեհը: Այս բացառիկ տօնի առիթով առանձնայատուկ բարեմաղթանքներ ենք յղում նաեւ մեր նորօրեայ պատմութեան բոլոր հերոսածին մայրերին, քանի որ վերջին ժամանակներում հայրենիքը անգամ եւս սրբացւեց ու սրբացւում է նրանց որդիների սխրագործութեամբ ու թանկագին արեամբ»:

Այնուհետեւ մտերմիկ մթնոլորտի ներքոյ իրականացւեցին՝ զւարճալի խաղ-մրցոյթներ, հաւկթախաղ եւ հիւրասիրութիւն:

Աւարտին իւրաքանչիւր անդամուհու նւիրւեց միութեան վարչութեան նախաձեռնութեամբ տպագրւած «Կանայք Առաջին Հանրապետութեան խորհրդարանում» գիրքը եւ ծաղիկ:

Հարկ է նշել, որ կազմակերպիչ յանձնախմբի միջոցով ճոխ ծրագիր էր նախատեսւել օրւայ առթիւ, սակայն ի յարգանք վերջերս Ադրբեջանի ԶՈՒ ստորաբաժանումների միջոցով բացւած կրակի հետեւանքով Հայաստանի Տեղ գիւղում զոհւած հայորդիների յիշատակին, զեղչւեց ծրագրի մեծ բաժինը եւ միութեան վարչութիւնը սահմանափակւեց միայն վերոնշեալ ծրագրով:

Թղթակից (Նոր Ջուղա) 

Ս. Զատկի Ճրագալոյցին, շաբաթ՝ ապրիլի 8-ի երեկոյեան, Նոր Ջուղայի «Ս. Մինաս» եւ Շահինշահրի «Սրբոց Վարդանանց» եկեղեցիներում մատուցւեց Սուրբ եւ Անմահ Պատարագ:

Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանը նախագահեց «Ս. Մինաս» եկեղեցու Պատարագին:

Ընթացքում թեմակալ Առաջնորդն ընթերցեց տօնի առթիւ իր պատգամը, ուր անդրադառնալով Յարութեան դրւագի սկզբնական բաժնին՝ Իւղաբեր Կանանց օրինապահ աշխատանքին, ովքեր պարտաճանաչ գիտակցութեամբ մեկնեցին գերեզման՝ օծելու համար խաչեալ Յիսուսի անշնչացած մարմինը, աւելացրեց. «Իւղաբեր Կանայք յուսահատւած ու ձեռնածալ ողբալու փոխարէն, իրենց պարտաճանաչութեան ու գիտակցութեան շնորհիւ, արժանացան Քրիստոսի Յարութեան առաջին ականատեսներն ու վկաները դառնալու… Պարտաճանաչութիւնը կարելի է նկատել որպէս սքանչելի բարոյական բարեմասնութիւն, սակայն այն իր կատարելութեան է հասնում երբ նրան ընկերակցի բանականութիւնն ու գիտակցութիւնը: Ուստի, պարտաճանաչութիւն եւ գիտակցութիւն սկսենք ցուցաբերել առաջին հերթին մեր քրիստոնէական ու բարոյական, երկրորդ՝ մեր ազգային ու հայրենական, իսկ երրորդ՝ մեր մարդկային ու ընկերային պարտաւորութիւնների նկատմամբ, եւ ի վերջոյ, մանաւանդ, մեր ընտանեկան պարտաւորութիւնների նկատմամբ, որպէսզի արժանանանք Աստծու ողորմութեանը, գթութեանը, օրհնութեանն ու շնորհքներին՝ վայելելու յաջող, առողջ ու բարգաւաճ կեանք»:

Յաջորդ օրը, կիրակի՝ ապրիլի 9-ի առաւօտեան, Փրկչի յաղթական Յարութեան տօնը Սուրբ եւ Անմահ Պատարագի մատուցմամբ նշւեց Նոր Ջուղայի «Ս. Ստեփանոս» եւ Շահինշահրի «Սրբոց Վարդանանց» եկեղեցիներում:

«Ս. Ստեփանոս» եկեղեցում եպիսկոպոսական Սուրբ եւ Անմահ Պատարագ մատուցւեց ձեռամբ թեմակալ Առաջնորդ գերշ. Տ. Սիփան Ս. Եպս. Քէչէճեանի:

Որպէս օրւայ քարոզ Սրբազան Հայրն ընթերցեց Ն.Ս.Օ.Տ.Տ. Արամ Ա. Վեհափառ Հայրապետի Յարութեան տօնի պատգամը. ահա մի հատւածի մէջբերում նշւած պատգամից.

«Քրիստոսի յարութեան նշումը յիշեցում է, որ Քրիստոսը մեզ հետ է՝

- Կեանքի փոթորիկների մէջ, որպէս մեր փրկութեան լաստը.

- Կեանքի խաւարի մէջ, որպէս մեր երկնային լոյսը.

- Կեանքի դժւարութիւնների մէջ, որպէս մեր կենդանի յոյսը.

- Կեանքի մոլոր ճանապարհների մէջ, որպէս մեր ճշմարիտ ճանապարհը.

Յարուցեալ Քրիստոսը մեզ հետ է մինչեւ աշխարհի վախճանը: Նա խոստացաւ դարձեալ գալ՝ դատելու մեզ, մեր ապրած կեանքի ու կատարած գործերի համար: Պատրա՞ստ ենք ընդունելու Քրիստոսին, որպէս մեր Տէրն ու Փրկիչը»:

Նշելի է, որ Յարութեան տօնի Սուրբ Պատարագին ներկայ գտնւեց նաեւ Սպահանում Ռուսաստանի գլխաւոր հիւպատոս՝ Բորիս Բուրմիսթրոֆը։

Կիրակի երեկոյեան, Ս. Ամենափրկիչ վանքում, գերշ. Տ. Սիփան Ս. Եպս. Քէչէճեանն ընդունեց ազգայինների եւ համայնքի անդամների շնորհաւորանքները՝ տօնի առթիւ:

Թղթակից (Նոր Ջուղա) 

Աւագ հինգշաբթի՝ ապրիլի 6-ի առաւօտեան, Յիսուս Քրիստոսի Վերջին ընթրիքի յիշատակի օրւայ առթիւ, Ս. եւ Անմահ Պատարագ մատուցւեց Նոր Ջուղայի «Ս. Յովհաննու Կարապետ» եկեղեցում, նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի:

Օրւայ պատարագիչն էր արժ. Տ. Վարդան քհնյ. Աղաբաբայեանը. Պատարագին մասնակցում էին նաեւ թեմի քահանայից եւ դպրաց դասերը:

Ընթացքում, ըստ Հայաստանեայց Առաքելական Սուրբ եկեղեցու կարգ ու կանոնի, քարոզախօսութեան փոխարէն Սրբազան Հայրն ընթերցեց Ս. Բարսեղ հայրապետի աղօթքը:

Նշելի է, որ Նոր Ջուղայի հայոց ազգ. «Քանանեան-Կատարինեան» միջնակարգ դպրոցի աշակերտ-ուհիները ներկայացան Ս. Պատարագին եւ ներկայ միւս հաւատացեալների կողքին ստացան Ս. Հաղորդութիւն:

Նոյն օրը ցերեկւայ ժամը 4:00-ին, Նոր Ջուղայի «Ս. Ստեփանոս», «Ս. Գրիգոր Լուսաւորիչ» եւ «Ս. Յովհաննու Կարապետ», իսկ Շահինշահրի «Սրբոց Վարդանանց» եկեղեցիներում իրականացւեց Ոտնլւայի կարգը: «Ս. Յովհաննու Կարապետ» եկեղեցու արարողութիւնը տեղի ունեցաւ թեմակալ Առաջնորդ Սրբազան Հօր միջոցով:

Նոր Ջուղայի հայոց ազգ. «Արմէն» տարրական եւ «Քանանեան-Կատարինեան» միջնակարգ դպրոցների տնօրէնութիւնների համագործակցութեամբ, դպրոցի սաները արարողութեան ընթացքում մարմնաւորեցին Քրիստոսի 12 աշակերտներին, տարրականի աշակերտները «Ս. Ստեփանոս» եւ «Ս. Գրիգոր Լուսաւորիչ», իսկ միջնակարգինը՝ «Ս. Յովհաննու Կարապետ» եկեղեցիներում:

Որպէս քարոզ՝ գերշ. Տ. Սիփան Ս. Եպս. Քէչէճեանն անդրադառնալով Քրիստոսի միջոցով աշակերտների ոտքերի լւացմամբ մարդկութեանը տրւած խոնարհութեան, հեզութեան, սիրոյ եւ ծառայութեան օրինակներին, դիմելով աշակերտութեանը յորդորեց, որ ոչ միայն յաճախակիօրէն մասնակցեն արարողութիւններին, այլ նաեւ օգնեն տիրացուներին, որպէսզի հնարաւոր լինի անցեալի նման եկեղեցական կարգերը իրականացնել թաղային բոլոր եկեղեցիներում:

Աւելի ուշ՝ երեկոյեան ժամը 7:30-ին, Նոր Ջուղայի «Ս. Մինաս», «Ս. Յովհաննու Կարապետ» եւ «Ս. Ստեփանոս», իսկ Շահինշահրի «Սրբոց Վարդանանց» եկեղեցիներում սկիզբ առաւ Խաւարման կարգը:

Գերշ. Տ. Սիփան Ս. Եպս. Քէչէճեանի միջոցով իրականացւեց «Ս. Յովհաննու Կարապետ» եկեղեցու արարողութիւնը: Սրբազան Հայրն ընթացքում անդրադարձաւ  Քրիստոսի ձերբակալութեանը, որը տեղի ունեցաւ Յուդա առաքեալի մատնութեան արդիւնքում, մատնանշելով, թէ նա տրւելով եռեսուն արծաթի գայթակղութեանը, դրանք վեր դասեց գերհոգեւոր եւ աստւածային արժէքից: Այնուհետեւ թեմակալ Առաջնորդն ընդգծելով, որ իւրաքանչիւր անձ իր կեանքում բազմաթիւ անգամներ կանգնում է հոգեւորի եւ աշխարհականի միջեւ ընտրութեան առջեւ, յորդորեց, թէ բոլորը ինքնագիտակցութեամբ քննեն իրենց ապրած օրերը, որպէսզի սխալ ընտրութիւններ կատարած լինելու պարագային, սրբագրեն դրանք եւ յաջորդիւ նմանօրինակ պայմաններում, չտրւելով գայթակղութիւնների, մերժեն աշխարհայինը եւ ճշգրիտ ընտրութիւն կատարեն:  

Յաջորդ օրը՝ ապրիլի 7-ի երեկոյեան ժամը 6:00-ին, Նոր Ջուղայի «Ս. Ստեփանոս», իսկ Շահինշահրի «Սրբոց Վարդանանց» եկեղեցիներում իրականացւեց Քրիստոսի չարչարանքի, խաչելութեան եւ թաղման յիշատակի օրւայ առթիւ արարողութիւնը՝ Թաղման կարգը:

Թեմակալ Առաջնորդ Սրբազան Հայրը նախագահեց «Ս. Ստեփանոս» եկեղեցու կարգը: Նա ընթացքում որպէս քարոզ անդրադառնալով Քրիստոսի թաղմանը պատկանող աւետարանական դրւագին, յատկապէս շեշտեց, որ ոչ ոք, այդ թւում նաեւ Մարիամ Աստւածածինը չէր կարող ընդունել, թէ Քրիստոսը մահւանից յետոյ պէտք է յարութիւն առնի: Նա աւելացրեց, որ այսօր թէեւ բոլորս գիտենք յարութեան պատմութիւնը, սակայն մեր հարազատների մահւան մեծ ցաւն ու վիշտը խանգրում է մեզ հաւատալ յարութեանը եւ այս դէպքում վիշտը հաւատից զօրեղ է գտնւում: Սրբազան Հայրն իր խօսքի աւարտին ասաց. «Մահն անխուսափելի երեւոյթ է, սակայն ինչպէս Քրիստոսը յարութիւն առաւ, նոյնպէս էլ բոլոր ննջեցեալները մի օր յարութիւն են առնելու գերեզմաններից եւ Աստծու դիմաց ներկայացնելու են իրենց ապրած օրերի հաշիւը. ուստի պէտք է ապրենք աստւածահաճոյ կեանք՝ Աստծու ողորմութեանն ու օրհնութեանը արժանանալու համար»:

Թղթակից (Նոր Ջուղա) 

Երեքշաբթի՝ ապրիլի 4-ի երեկոյեան, Նոր Ջուղայի «Ս. Ստեփանոս», «Ս. Գրիգոր Լուսաւորիչ», «Ս. Մինաս» եւ «Ս. Յովհաննու Կարապետ», իսկ Շահինշահրի «Սրբոց Վարդանանց» եկեղեցիներում նշւեց Տասը կոյսերի առակի յիշատակի օրը: «Ս. Յովհաննու Կարապետ» եկեղեցու արարողութիւնն իրականացրեց Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանը:

Ընթացքում ընթերցւեցին պատկան աստւածաշնչական դրւագներն ու սուրբգրային հատւածները, իսկ վերջին ընթերցման պահին պարմանուհիների կատարմամբ մարմնաւորւեց 10 կոյսերի առակը:

Աւարտին Սրբազան Հայրն դիմեց արարողութեանը մասնակից աշակերտուհիներին եւ ասաց, որ իրենք այս տարիքում տակաւին իմաստութեան ճանապարհի վրայ են, սակայն կեանքի ընթացքում լինելու են պահեր, որտեղ հարկադրւած դժւար որոշումներ պէտք է կայացնեն, իսկ ճիշտ որոշում կատարելու համար՝ պէտք է նախ աղօթեն Աստծուն՝ իրենց իմաստութիւն եւ յաջողութիւն պարգեւելու, ապա խորհրդակցեն ծնողների եւ ուսուցիչների հետ: Նա իր խօսքի շարունակութեան մէջ իմաստութեան գլխաւոր բանալին համարեց՝ աստւածահաճոյ ընթացք որդեգրելը, բարեգործութիւն կատարելը եւ աղօթելը,  Աստւածաշնչի ընթերցելն ու եկեղեցի յաճախելը:

Յատկանշական է, որ առակը մարմնաւորող օրիորդների մասնակցութիւնն ապահովւելու հարցում թեմի Կրօնական խորհրդի հետ համագործակցել էին Նոր Ջուղայի «Արմէն» տարրական եւ «Քանանեան-Կատարինեան» միջնակարգ դպրոցների տնօրէնութիւնները:

Թղթակից (Նոր Ջուղա) 

Քրիստոսի Երուսաղէմ կատարած յաղթական մուտքի յիշատակի տօնի` Ծաղկազարդի առիթով, կիրակի՝ 2 ապրիլի առաւօտեան, Նոր Ջուղայի «Ս. Ստեփանոս» եւ Շահինշահրի «Սրբոց Վարդանանց» եկեղեցիներում մատուցւեց Սուրբ եւ Անմահ Պատարագ: Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանը նախագահեց Շահինշահրի  եկեղեցու Պատարագին:

Սրբազան Հայրն օրւան պատշաճ իր քարոզախօսութեան մէջ բնաբան ունենալով «Յիսուս` Դաւթի որդի, ողորմի՛ր մեզ»-ը՝ անդրադարձաւ երկու կոյրերի բժշկութեան աւետարանական հատւածին եւ նշեց, թէ թւում է որ երկու կոյրերը Քրիստոսի ճանապարհին էին յայտնւել պատահականօրէն, քանի որ ոչ ոք իրենց չէր տեղեկացրել այդ մասին, սակայն այդ դէպքում գոյութիւն ունի աստւածային կամք եւ ծրագիր, որը ծառայեց երկու նպատակների՝ հիւանդների՝ ֆիզիքական աչքերի բժշկւելուն եւ նրանց հոգու ու մտքի աչքերի բացմանը:  

Նա իր քարոզի շարունակութեան մէջ ընդգծելով նշւած աւետարանական հատւածի պատգամը՝ յորդորեց. «Լսել եւ զգալ Քրիստոսի ոտնաձայնը եւ խնդրանքներն ու աղաչանքները ներկայացնել Աստծուն՝ Բարձրեալից շնորհք, գթութիւն եւ ողորմութիւն ստանալու համար»:

Հարկ է նշել Նոր Ջուղայի «Ս. Ստեփանոս» եկեղեցում պատարագեց արժ. Տ. Խաչատուր քհնյ. Զարգարեանը, իսկ քարոզեց արժ. Տ. Մեսրոպ Ա. քհնյ. Գալստանեանը. Շահինշահրում պատարագիչ հայրն էր արժ. Տ. Վարդան քհնյ. Աղաբաբայեանը:

Զոյգ եկեղեցիներում Սուրբ Պատարագի աւարտին օրհնւեցին եւ ժողովրդին բաժանւեցին ձիթենու ճիւղերը:

Նոյն օրը երեկոյեան Դռնբացէքի կարգն իրականացւեց Նոր Ջուղայի «Ս. Ստեփանոս», «Ս. Մինաս», «Ս. Աստւածածին» եւ «Ս. Յովհաննու Կարապետ», իսկ  Շահինշահրի «Սրբոց Վարդանանց» եկեղեցինեում:

Նոր Ջուղայի «Ս. Յովհաննու Կարապետ» եկեղեցու արարողութիւնը տեղի ունեցաւ գերշ. Տ. Սիփան Ս. Եպս. Քէչէճեանի միջոցով, որտեղ երգեցողութիւնը կատարեց «Շուշանիկ» հոգեւոր երգչախումբը:

Աւետարանական ընթերցումներից, շարականներից եւ փոխասացութիւններից յետոյ, Սրբազան Հօր միջոցով փակ վարագոյրի առջեւ իրականացւեց երկնային արքայութեան դռների փակելը խորհրդանշող բաժինը, որից յետոյ բացւեց Մեծ Պահքի ընթացքում փակ մնացած վարագոյրը:

Աւարտին Սրբազան Հայրն անդրադառնալով օրւայ խորհրդին, պատգամեց. «Այս առիթը պատեհ համարելով, մի անգամ եւս քննութեան ենթարկենք մեր կեանքը, որպէսզի աստւածահաճոյ կեանք ապրած լինելու դէպքում, ոչ միայն շարունակենք նոյն ընթացքը, այլ նաեւ հարստացնենք ու ճոխացնենք եղածը, իսկ հակառակ պարագային, եթէ գտնում ենք, որ անցած ժամանակները լի են մեղքերով եւ ոչ աստւածահաճոյ արարքներով, ինքնագիտակցութեամբ սրբագրենք եւ բարեփոխենք այն:

Թղթակից (Նոր Ջուղա) 

Հ.Յ.Դ. «Ռուբէն» երիտասարդական միութիւնը Հայ Դատի քարոզչութեան ուղղութեամբ իր աշխատանքների ծիրում, իրանական նոր տարւայ՝ Նոռուզի արձակուրդները պատեհ առիթ համարելով, մարտի 20-ից 25-ը, Ս. Ամենափրկիչ վանքի շրջափակում կազմակերպեց գրքի ցուցահանդէս-վաճառք, որը մեծ ընդառաջում գտաւ վանքի թանգարանային համալիր այցելող հոծ զբօսաշրջիկների կողմից:

Ցուցահանդէսում ներկայացւած գրքերի մեծ տոկոսը կազմում էին Հայոց ցեղասպանութեան եւ Հայ Դատի թեմաներով գրական աշխատութիւնները: Միութենականները սպառիչ տեղեկութիւններ էին մատուցում այցելուներին՝ Հայոց ցեղասպանութեան իրողութեան, Արցախի շրջափակման եւ դրա հետեւանքով արցախցիների գոյութեանը սպառնացող զանազան վտանգների կապակցութեամբ եւ պատասխանում այդ շրջագծում այցելուներին յուզող հարցերին: Պատրաստւել էին էջանիշներ նւիրւած Հայոց ցեղասպանութեանը եւ Արցախի 100-օրեայ շրջափակման հարցին, որոնց վրայ տպագրւած էին նշւած իրողութիւնների մասին իրազեկող կայքերի հասցէները: Այս էջանիշները անվճար կերպով տրամադրւեցին բոլոր այցելուներին:

Հարկ է նշել, որ այս ցուցահանդէս-վաճառքը իրականացւում է 1998 թւականից ցայսօր:

Թղթակից (Նոր Ջուղա) 

Մարտի 24-ին աւարտւեցին Իրանահայ 32-րդ Գարնանային խաղերը։ Խաղերի ծրագրում ընդգրկւել էին 4 մարզաձեւեր՝ սեղանի թենիս, շախմատ, ֆուտբոլ եւ բասկետբոլ, մասնակցութեամբ Թեհրանից, Շիրազի, Ուրմիայից, Շահինշահրից ժամանած եւ Նոր Ջուղայի մարզիկ-մարզուհիների։

Վերոնշեալ ընթացքում, մարզական միցոյթներին զուգահեռ, Նոր Ջուղայի Հայ Մ. Մ. «Արարատ» միութեան միաւորների եւ խաղերի Կազմակերպիչ յանձնախմբի նախաձեռնութեամբ կազմակերպւել էին մի շարք միջոցառումներ, որոնց ստորեւ ներկայացնում ենք.

Երեքշաբթի՝ մարտի 21-ի երեկոյեան, միութեան շրջափակում, Սկաուտական միաւորի կազմակերպութեամբ տեղի ունեցաւ դաշտահանդէս, որտեղ հակառակ գարնանային անձրեւոտ եղանակին, ժողովուրդն առիթ ունեցաւ վայելել նախատեսւած խաղերը եւ ճաշակել միաւորի անդամների եւ ծնողական յանձնախմբի միջոցով պատրաստւած ուտելիքները։

Չորեքշաբթի՝ մարտի 22-ի երեկոյեան, միութեան դահլիճում, Կազմակերպիչ յանձնախմբի նախաձեռնութեամբ իրականացւեց հումորային-երաժշտական երեկոյ, որտեղ ներկաները խանդավառ պահեր վայելեցին՝ Արէն Սաֆարեանի հումորային ներկայացումների եւ դիջէյ Վահան Վարդեւանեանի երաժշտութիւնների շնորհիւ:

Հինգշաբթի՝ մարտի 23-ի առաւօտեան, միութեան շրջափակում, նախաձեռնութեամբ Մշակութային միաւորի վարչութեան եւ համագործակցութեամբ նոյն միութեան Ձեռնարկային յանձնախմբի, փոքրիկիների համար կազմակերպւեց «Գիտունիկի տնակ» ծրագիրը, որտեղ ռեփ ներկայացմամբ հնչեց «Մի կաթիլ մեղր» հեքիաթը, մասնակիցները պատրաստեցին մեղւի թեմայով Ձեռքի աշխատանքներ, իսկ վերջում իւրաքանչիւրը զարդարեց ու ճաշակեց իրեն տրամադրւած դոնաթ-խմորեղէնը:

Նոյն օրը երեկոյեան դարձեալ միութեան շրջափակում, սկզբում Ուսանողական միաւորի վարչութեան նախաձեռնութեամբ իրականացւեց գիտելիքների մրցոյթ, այնուհետեւ ցուցադրւեց Մշակութային միաւորի վարչութեան պատրաստած «Անցուդարձ» անւամբ տեսանիւթը:

Գիտելիքների մրցոյթի շրջագծում միմեանց հետ մրցեցին վեց խմբեր, որոնք կազմւել էին խաղերին մասնակից պատւիրակութիւններից՝ «Հ.Մ.Ա.Կ.»-ի եւ նոյն կազմակերպութեան Շիրազի ու Ուրմիայի մասնաճիւղերից, «Րաֆֆի», «Նայիրի» եւ Նոր Ջուղայի Հայ Մ. Մ. «Արարատ» միութիւններից: Հարցաշարի մէջ տեղ էին գտել գիտելիքի, ֆիզիքական եւ երգ-երաժշտութեան հետ կապւած հարցումներ:

Արդիւնքում յաղթող ճանաչւեց Հ.Մ.Ա.Կ.-ի խումբը, իսկ երկրորդ եւ երրորդ հանդիսացան «Նայիրի» եւ «Րաֆֆի» միութիւնների ներկայացուցիչները: Նշւած երեք լաւագոյնները գնահատւեցին եւ պարգեւատրւեցին Ուսանողական միաւորի կողմից:

Անցուդարձի տեսանիւթում արտացոլւած էր Գարնանային խաղերի ընթացքում տեղի ունեցած զւարճալի իրադարձութիւններն ու մի շարք մրցոյթներ: 

Հարկ է նշել, որ 23-րդ Գարնանային խաղերի ընթացքում ակտիւօրէն աշխատել են նաեւ Հ.Յ.Դ. «Թադէոս Թադէոսեան» պատանեկան միութեան անդամները. այդ աշխատանքներն էին.

-Պատանիների շուրջ մէկ ամիս շարունակական աշխատանքի արդիւնքում պատրաստւել էին աւելի քան 100 արձաններ եւ այլ ձեռքի աշխատանքներ, որոնք բոլորը վաճառւեցին Արցախեան պատերազմի 35-ամեակի առիթով «Արարատ» միութեան շրջափակում կազմակերպւած ցուցահանդէս-վաճառքում: Ամբողջ ձեռքի աշխատանքները ունէին հայրենասիրական եւ յատկապէս Արցախի խորհրդանիշ նախշեր, որոնք պատրաստւել էին խեցից, ռեզինից, փայտից եւ նկարչական ու այլ նիւթերից:

-Արացխի աւելի քան 100-օրեայ շրջափակման կապակցութեամբ պատրաստւել էին տեղեկատւական որմազդներ, որոնք ցուցադրւել էին «Արարատ» միութեան շրջափակում:

- Լուսանկարչական տաղաւար, որտեղ ցանկացողներն առիթ ունեցան «Մենք ենք մեր լեռները» յուշարձանի տեսքով ձեւաւորւած տաղաւարում լուսանկարւելով, իրենց աջակցութիւնը յայտնելու Արցախին եւ արցախահայութեանը:

-Իրականացւեց պատանեկան աշխատանոց, ուր պատանիները արւեստի նմուշների իրագործմամբ իրենց սէրն ու աջակցութիւնը յայտնեցին հայրենիքի շրջափակւած բեկորին՝ Արցախին:

Աւելացնենք նաեւ, որ Հ.Յ.Դ. «Ռուբէն» երիտասարդական միութեան միջոցով պատրաստւել էին Արցախին նւիրւած երկու պաստառներ, որոնք նոյնպէս ցուցադրւել էին  «Արարատ» միութեան շրջափակում:

Թղթակից (Նոր Ջուղա) 

Նախաձեռնութեամբ Նոր Ջուղայի Հայ Մարզա-մշակութային «Արարատ» միութեան Կենտ. վարչութեան, կազմակերպութեամբ Գարնանային խաղերի Կազմակերպիչ յանձնախմբի եւ համագործակցութեամբ նոյն միութեան բոլոր միաւորների, համաճարակի պատճառով շուրջ չորս տարի դադարից յետոյ, մարտի 20 առ 24-ը տեղի ունեցաւ Իրանահայ 32-րդ Գարնանային խաղերը, նւիրւած լինելով Արացխին սատարելուն եւ հզօր կամքի տէր արցախահայութեանը:

Խաղերի բացման հանդիսութիւնը տեղի ունեցաւ երկուշաբթի՝ մարտի 20-ի երեկոյեան ժամը 6:00-ին, Նոր Ջուղայի Հայ Մ.Մ. «Արարատ» միութեան մարզասրահում, ներկայութեամբ՝ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի, Իրանի Իսլ. խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանի, Սպահան նահանգի սպորտի եւ երիտասարդութեան կազմակերպութեան գլխաւոր տնօրէն պրն. Մոհամմադիի, Իրանում ՀՀ դեսպանատան մշակութային-հասարակական հարցերում խորհրդատու պրն. Գրիգորեանի, թեմի ազգային մարմինների եւ շրջանի Հայ Դատի յանձնախմբի ներկայացուցիչների, մի շարք հայ եւ պարսիկ հրաւիրեալների, հիւրընկալի՝ Նոր Ջուղայի Հայ Մ.Մ. «Արարատ»  միութեան  Կենտ. վարչութեան, միարւորների վարչութիւնների եւ պատկան անդամների, Թեհրանից, Շիրազից, Ուրմիայից, Շահինշահրից եւ Նոր Ջուղայից մարզական պատւիրակութիւնների մարզիկների, մազիչների ու պատասխանատուների եւ հոծ թւով ժողովրդի:

Սկզբում հանդիսատեսին ջերմ ողջունեց երեկոյի հանդիսավար Մանիա Ղուկասեանը, ապա միութեան Սկաուտական միաւորի Արի-Արենուշ հատւածների ներկայացուցիչների մասնակցութեամբ տեղի ունեցաւ դրօշակի արարողութիւն եւ ներկաների յոտնկայս ունկնդրութեամբ հնչեց Իրանի Իսլ. Հանրապետութեան օրհներգը:

Այնուհետեւ տեղի ունեցաւ բասկետբոլի, ֆուտբոլի, սեղանի թենիսի եւ շախմատի ճիւղերում մարզական պատւիրակութիւնների տողանցք-շքերթը, մասնակցութեամբ՝ Թեհրանի Հայ Մշակութային «Արարատ» կազմակերպութեան (Հ.Մ.Ա.Կ) եւ նոյն կազմակերպութեան Ուրմիայի եւ Շիրազի մասնաճիւղերի, Հայ Մշակութային «Նայիրի» միութեան (Թեհրան), Հայ Մշակութային «Սիփան» միութեան (Թեհրան), Հայ Մարզա-մշակութային «Րաֆֆի» համալիրի (Թեհրան) եւ Նոր Ջուղայի հայ Մ. Մ. «Արարատ» միութեան ու նոյն միութեան Շահինշահրի մասնաճիւղի: Տողանցքից յետոյ ցուցադրւեց մարտի 17-ին Ս. Ամենափրկիչ վանքում, Սրբոց նահատակաց յուշարձանի առջեւ կայացած ջահավառութեան արարողակարգի տեսանիւթը, ապա ջահակիր խումբը մուտք գործեց դահլիճ եւ գլխաւոր ջահակիր Անայիս Խուդավերդեանի միջոցով վառւեց 32-րդ Գարնանային խեղերի կրակը: Անայիս Խուդավերդեանը տարիներ եղել է Նոր Ջուղայի «Արարատ» միութեան բասկետբոլի խմբի անդամ, իսկ վերջերս «Շիմիդոռ»-ի կազմում հանդիսացել է երկրի Ա կագի լիգայի ախոյեան, տարբեր ժամանակներում մաս է կազմել երկրի հաւաքականի ճամբարներին եւ նոյն հաւաքականի հետ մասնակցել է Օմանում կայացած Արեւմտեան Ասիայի մրցաշարին:  

Ջահակիր խմբի միւս անդամներն էին՝ երկրի եւ այլ մակարդակներում զանազան յաջողութիւններ արձանագրած մարզիկներ, բասկետբոլիստներ՝  Մինելիա Մարկոսեանը, Մելիսա Սիմոնեանը, Մարալ Մարկոսեանը, Արփի Ղազարեանը, Անայի Խաչեանը, Լիլիան Ծատուրեանը, Անիա Յովսէփեանը, Սինթիա Փանոսեանը, Գիլբերտ Թահմազեանն ու Մոնթէ Յովհաննէսը, սկաւառականետող Նարէ Ղարախանեանը եւ ըմբշամարտիկ Մենուա Մարկոսեանը:

Յաջորդիւ տեղի ունեցաւ խաղերի երդման կարգը. մարզիկների անունից երդւեց Սէրլի Նազարեանը, իսկ իրաւարարների անունից՝ Մարինէ Մկրտչեանը, ապա օրւայ ելոյթների բաժնում հանդէս եկան Նոր Ջուղայի Հայ Մ.Մ. «Արարատ» միութեան Կենտ. վարչութեան նախագահ Ժորժ Ղազարեանը, պատգամաւոր Ռոբերտ Բեգլարեանը եւ թեմակալ Առաջնորդ գերշ. Տ. Սիփան Ս. Եպս. Քէչէճեանը:

Ժորժ Ղազարեանն իր խօսքում ողջունեց չորս տարի դադարից յետոյ մարզական պատւիրակութիւնների ներկայութիւնը «Արարատ» միութեան յարկի ներքոյ, ապա անդրադառնալով հայկական միութիւնների առաքելութեանը, շեշտեց, որ միութիւնները պատանի-երիտասարդների մէջ սերմանում են ազգային պահանջատիրութեան ոգի եւ նրանց մղում են համազգային նշանակութեամբ հիմնահարցերում գործօն դերակատարութիւն ունենալ: Նա նշելով նաեւ, որ 32-րդ Գարնանային խաղերը նւիրւած են Արցախին սատարելուն եւ հզօր կամքի տէր արցախահայութեանը, յոյս յայտնեց, որ այն միջոց կը հանդիսանայ հայ ժողովրդի խօսքը լսելի դարձնելու եւ ամրակուռ կամքի տէր արցախահայութեանը զօրակցելու համար:

Ռոբերտ Բեգլարեանն իր ելոյթում եկեղեցին, դպրոցը եւ ընտանիքը հայ ժողովրդի հասարակական կեանքի հիմքը համարելով, յատկապէս շեշտեց, թէ երիտասարդների մօտ հայրենասիրութիւնը, բարոյականութիւնը, կարգապահութիւնը եւ ինքնավստահութիւնը ձեւաւորւում են ընտանիքում, եկեղեցում, դպրոցում եւ մարզա-մշակութային ոլորտներում իրականացւող միջոցառումների արդիւնքում: Նա իր ելոյթի մէտ այլ բաժնում անդրադառնալով տարածաշրջանային վերջին իրադարձութիւններին՝ յատկապէս կարեւորեց Կապանում Իրանի Իսլ. Հանրապետութեան հիւպատոսարանի բացումը եւ ասաց, որ Իրանն այդ քայլով հաստատեց, թէ չի նահանջելու իր համար կարմիր գիծ համարւող սահմանային անվտանգութեան խնդրից: Պրն. Բեգլարեանը շեշտելով, որ իրանահայութիւնը որպէս Իրանի քաղաքացիներ պաշտպանում են երկրի հողային ամբողջականութիւնը, իսկ որպէս հայ գիտակցում են, որ իրենց մուսուլման հայրենակիցների կողքին կարող են կառուցողական առաջընթաց արձանագրել եւ մեծ դերակատարութիւն ունենալ տարածաշրջանում՝ աշխարհաքաղաքական իմաստով, կոչ արեց, որ այսուհետ մշակութային եւ մարզական ոլորտներում մրցաշարերի եւ փառատօնների չսպասել, եւ ցանկացած առիթը պատեհ համարելով ընդարձակել Իրանի, իրանահայութեան եւ Հայաստանի մարզական խմբերի, մարզիկների եւ մշակութային խմբակների փոխ-յարաբերութիւնները:   

Թեմակալ Առաջնորդ Սրբազան Հայրն իր խօսքում յաղթանակ համարելով չորսամեայ դադարից յետոյ Գարնանային խաղերի կազմակերպումը, յոյս յայտնեց. «Այս խաղերը լինելու են դասատու օրինակներ մեր բոլոր քաղաքագէտներին ու դիւանագէտներին, որպէսզի մեր յաղթանակներով ներշնչւած կազմեն իրենց ազգանպաստ ու հայրենաշէն օրակարգերը, իսկ աշխարհաքաղաքական մոլորեցուցիչ, վտանգաւոր ու վնասաբեր խաղերում մնայուն կերպով ցուցաբերեն հաւատարմութիւն եւ յարատեւօրէն կարողանան խուսանաւել բոլոր սադրանքները, տագնապներն ու որոգայթները, մինչեւ արդիւնքում՝ փոթորկում յայտնւած մեր հայկական նաւը հասնի խաղաղ ու անդորր նաւահանգիստ»:

Հանդիսութեան շարունակութեան մէջ մարզական կատարումներով հերթաբար հանդէս եկան Նոր Ջուղայի «Արարատ» միութեան գիմնաստիկայի եւ կառաթէյի խմբերը, ապա սպորտային պար իրականացւեց Փերիոյ կրթասիրաց միութեան «Նայիրի» հիփ-հոփ պարախմբի միջոցով՝ ղեկավարութեամբ Ալինէ Յարութիւնեանի եւ Սիւնէ Ուղուրեանի:

Հարկ է նշել, որ գիմնաստիկայի խմբի մարզիչն է Վիլմա Վարդանեանը, իսկ նրա օգնականը՝ Թենի Համազասպեանը. միութեան կառաթէյի խմբի մարզիչներն են՝ պրնյք. Ջէյհանին, Նեժադ Սահեբնին, Սէյեդ Բաղերին եւ Սազմանդը:

Ծրագրի գեղարւեստական բաժնում, որն իրականացւել էր Ռիմա Սիմոնեանի եւ Կարին Տէր-Մարտիրոսեանի ղեկավարութեամբ, պարային կատարումների շարանով հանդէս եկաւ «Արարատ» միութեան Մշակութային միաւորի «Կռունկ» եւ Նոր Ջուղայի հայոց ազգ. «Քանանեան-Կատարինեան» միջնակարգ դպրոցի պարախմբերից կազմւած խումբը. խմբի պարուսոյցն էր Քաթրին Մարկոսեանը: Պարային ելոյթներին զուգահեռ երգերի կատարումներով հանդէս եկան երիտասարդ երգիչներ՝ Թանիա Մինասեանը, Վանա Շիրւանեանը եւ Վեդի Յարութիւնեանը, իսկ դրամի նւագակցութեամբ պարախմբին ընկերակցեց Էրւին Յովսէփեանը: Գեղարւեստական բաժինը ընդհանրութեան մէջ պատգամեց Սփիւռքին՝ համախմբւած եւ միասնական ուժերով լծւի Արցախին սատարման գործին:

Հարկ է նշել, որ բացման հանդիսութիւնն ընդմիջւեց Արէն Սաֆարեանի հումորային ներկայացումներով:

***

Մարտի 24-ի երեկոյեան, դարձեալ Նոր Ջուղայի Հայ Մ.Մ. «Արարատ» միութեան մարզասրահում տեղի ունեցաւ Իրանահայ 32-րդ Գարնանային խաղերի փակման միջոցառումը՝ մեդալաբաշխման ծրագրով, հանդիսավարութեամբ Անդրիա Խաչատրեանի:

Մեդալները, գնահատագրերն ու գաւաթները առաջին, երկրորդ եւ երրորդ կարգերը նւաճած խմբերին ու մարզիկներին յանձնեցին՝ Նոր Ջուղայի Հայ Մ.Մ. «Արարատ» միութեան Կենտ. վարչութեան, միութեան Մարզական միաւորի վարչութեան ու 32-րդ Գարնանային խաղերի Կազմակերպիչ յանձնախմբի անդամները եւ միութեան Ֆուտբոլի յանձնախմբի ու Հայ Մ. «Արարատ» կազմակերպութեան (Հ.Մ.Ա.Կ.) ներկայացուցիչները:

32-րդ Գարնանային խաղերի մրցոյթների արդիւնքներն են՝

Սեղանի թենիս-տղայոց երէց խմբային

Առաջին կարգ՝ Հայ Մ. «Արարատ» կազմակերպութիւն (Հ.Մ.Ա.Կ.)

Երկրորդ կարգ՝ Հայ Մ. «Նայիրի» միութիւն

Երրորդ կարգ՝ միասնաբար Ն. Ջ. Հայ Մ.Մ. «Արարատ» միութիւն եւ Հայ Մ. «Արարատ» կազմակերպութեան Շիրազի մասնաճիւղ

Սեղանի թենիս-օրիորդաց երէց անհատական

Առաջին կարգ՝ Աննա Քեշիշեան (Հայ Մ. «Նայիրի» միութիւն)

Երկրորդ կարգ՝ Անդրիա Խաչատրեան (Ն. Ջ. Հայ Մ.Մ. «Արարատ» միութիւն)

Երրորդ կարգ՝ միասնաբար Ալին Քեշիշեան եւ Փաթրիշիա Դանղեան (Հայ Մ.  «Նայիրի» միութիւն)

Սեղանի թենիս-օրիորդաց երիտասարդական անհատական

Առաջին կարգ՝ Էմմի Մկրտչեան (Ն. Ջ. Հայ Մ.Մ. «Արարատ» միութիւն)

Երկրորդ կարգ՝ Էմիլի Նաւասարդեան (Ն. Ջ. Հայ Մ.Մ. «Արարատ» միութիւն)

Երրորդ կարգ՝ միասնաբար Դանիթա Ղազարեան եւ Սէրլի Շահմիրզայեան (Ն. Ջ. Հայ Մ.Մ. «Արարատ» միութիւն)

Սեղանի թենիս-տղայոց երիտասարդական անհատական

Առաջին կարգ՝ Միրօ Մանուկեան (Հայ Մ. «Արարատ» կազմակերպութեան Շիրազի մասնաճիւղ)

Երկրորդ կարգ՝ Անդրու Վարդումեան (Ն. Ջ. Հայ Մ.Մ. «Արարատ» միութիւն)

Երրորդ կարգ՝ միասնաբար Յաւերժ Յակոբեան եւ Արէն Մարկոսեան (Ն. Ջ. Հայ Մ.Մ. «Արարատ» միութիւն)

Սեղանի թենիս-տղայոց երէց անհատական

Առաջին կարգ՝ Արսէն Գէորգեան (Հայ Մ. «Արարատ» կազմակերպութիւն)

Երկրորդ կարգ՝ Արին Ղարիբջանեան (Հայ Մ. «Նայիրի» միութիւն)

Երրորդ կարգ՝ միասնաբար Միշէլ Գէորգեան եւ Ռոնի Մեհդիխանեան (Հայ Մ. «Արարատ» կազմակերպութիւն)

Շախմատ

Առաջին կարգ՝ Կարէն Խանլարեան (Ն. Ջ. Հայ Մ.Մ. «Արարատ» միութիւն)

Երկրորդ կարգ՝ Վահան Վարդեւանեան (Ն. Ջ. Հայ Մ.Մ. «Արարատ» միութիւն)

Երրորդ կարգ՝ Արգիշտ Քեշիշեան (Ն. Ջ. Հայ Մ.Մ. «Արարատ» միութիւն)

Ֆուտբոլ

Առաջին կարգ՝ Ն. Ջ. Հայ Մ.Մ. «Արարատ» միութիւն խումբ 1

Երկրորդ կարգ՝ Հայ Մ.Մ. «Րաֆֆի» համալիր

Երրորդ կարգ՝ Ն. Ջ. Հայ Մ.Մ. «Արարատ» միութիւն խումբ 2

Բասկետբոլ- տղայոց 3*3 ձեւաչափ

Առաջին կարգ՝ Ն. Ջ. Հայ Մ.Մ. «Արարատ» միութիւն խումբ 1

Երկրորդ կարգ՝ Հայ Մ. «Արարատ» կազմակերպութիւն (Հ.Մ.Ա.Կ.) խումբ 2

Երրորդ կարգ՝ Հայ Մ.Մ. «Րաֆֆի» համալիր խումբ 1

Բասկետբոլ տղայոց երէց

Առաջին կարգ՝ Ն. Ջ. Հայ Մ.Մ. «Արարատ» միութիւն

Երկրորդ կարգ՝ Հայ Մ. «Արարատ» կազմակերպութիւն (Հ.Մ.Ա.Կ.) խումբ 1

Երրորդ կարգ՝ Հայ Մ. «Սիփան» միութեան

Նշելի է նաեւ, որ Գարնանային խաղերի ընթացքում տեղի են  ունեցել բասկետբոլի 3*3 ձեւաչափի երկսեռ խմբերի ընկերական մրցոյթներ, որոնց մասնակիցներին շնորհւել է գնահատագրեր:

Իրանահայ 32-րդ խաղերի Կազմակերպիչ յանձնախմբի անդամներն են եղել՝ Ռոբերտ Սիմոնեանը, Դիմիթրի Յովհաննիսեանը, Նինելիա Բաղդասարեանը, Արթուր Խաչիկ Գրիգորին, Անդրիա Խաչատրեանը, Նարեգա Սիմոնեանը, Ռազմիկ Նազարեանը, Գալիա Դիլանչեանը եւ Գեւիկ Մկրտչեանը:

Թղթակից (Նոր Ջուղա) 

Իւրաքանչիւր տարի՝ իրանական Նովռուզի արձակուրդների ընթացքում, Նոր Ջուղայի Հայ Կանանց Գթութեան միութիւնը իրականացնում է ձեռարւեստի ցուցահանդէս-վաճառք՝ Ս. Ամենափրկիչ վանքի ցուցասրահում, որը  հրաշալի առիթ է հայ ձեռներէց կանանց համար ներկայացնելու եւ վաճառքի հանելու իրենց արւեստի աշխատանքները, ինչպէս նաեւ Ս. Ա. Վանք այցելող զբօսաշրջիկներին ծանօթացնելու հայկական ձեռարւեստին:

Եւ այսպէս՝ չորս տարի դադարից յետոյ, թւականիս մարտի 20-ի առաւօտեան ժամը 10:30-ին, տեղի ունեցաւ ցուցահանդէս-վաճառքի պաշտօնական բացումը՝ միասնական Տէրունական աղօթքով եւ խորհրդանշական ժապաւէնի հատումով՝ ձեռամբ Սպահանի հայոց թեմի Առաջնորդ՝ գերշ. Տ. Սիփան Ս. եպս. Քէչէճեանի, որից յետոյ թեմակալ Առաջնորդը շնորհաւորանքի եւ շնորհակալական խօսքեր ուղղեց ծրագրի նախաձեռնող միութեան վարչութեանը, կազմակերպիչ յանձնախմբին ու անդամներին՝ գեղեցիկ մտայղացման համար, նաեւ գնահատեց Հայոց ազգային ծերանոցում եւ այլ ոլորտներում միութեան ծաւալած աշխատանքներն ու աշխոյժ գործունէութիւնը եւ մաղթեց յաջող ընթացք վաճառքին։ Նա յոյս յայտնեց, որ 1402 թւականը լինելու է բախտաւորութեան եւ բարգաւաճման տարի բոլորի համար:

Սրբազան Հայրը խօսքն աւարտելուց յետոյ, ուղեկցութեամբ միութեան նախագահուհի՝ Արմինէ Սիմոնեանի եւ անձնակազմի, շրջեց ցուցահանդէսով եւ ծանօթացաւ աշխատանքներին:

Ցուցահանդէս-վաճառքին ներկայացւել էին արւեստի զանազան ճիւղերից գործեր ու հայկական աւանդական թխւածքներ:

Յատկանշական է, որ վաճառքից գոյացած հասոյթը ամբողջութեամբ յատկացւելու է   բարեգործական ծրագրերին:

Թղթակից (Նոր Ջուղա) 

Համաճարակի պատճառով շուրջ 4 տարի դադարից յետոյ, ուրբաթ՝ մարտի 17-ի կէսօրին ժամը 1:30-ին, Ս. Ամենափրկիչ վանքում, ձեռամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի եւ Նոր Ջուղայի Հայ Մ. Մ. «Արարատ» միութեան Կենտ. վարչութեան նախագահ Ժորժ Ղազարեանի, վանքի շրջափակում գտնւող Հայոց Ցեղասպանութեան Սուրբ Նահատակների յիշատակը յաւերժացնող յուշարձանի անմար կրակից բոցավառւեց Իրանահայ 32-րդ Գարնանային խաղերի ջահը, որից յետոյ այն օրհնւեց Սրբազան Հօր միջոցով:

Արարողութեանը ներկայ էին՝ թեմի Պատգամաւորական ժողովի Դիւանի եւ Թեմական ու Կրօնական խորհուրդների ներկայացուցիչները, Նոր Ջուղայի Հայ Մ. Մ. «Արարատ» միութեան՝ կանանց բաժնի պատասխանատու Այլին Մելիքեանը եւ Կենտ. վարչութեան, 32-րդ Գարնանային խաղերի Կազմակերպիչ յանձնախմբի ու Մարզական միաւորի վարչութեան անդամները եւ իհարկէ ջահակիր խումբը:

Այս Գարնանային խաղերի գլխաւոր ջահակիրն է բասկետբոլիստ Անայիս Խուդավերդեանը, որին ընկերակցում են մարզիկներ՝ Մելիսա Սիմոնեանը, Արփի Ղազարեանը, Մարալ Մարկոսեանը, Նարէ Ղարախանեանը, Մինելիա Մարկոսեանը, Անայի Խաչեանը, Լիլիան Ծատուրեանը, Անիա Յովսէփեանը, Սինթիա Փանոսեանը, Գիլբերտ Թահմազեանը, Մոնթէ Յովհաննէսն ու Մենուա Մարկոսեանը:

Իրանահայ 32-րդ Գարնանային խաղերը, որը նւիրւել է Արցախին սատարմանը եւ հզօր կամքի տէր արցախահայութեանը, մեկնարկելու են  հանդիսաւոր միջոցառմամբ, երկուշաբթի՝ մարտի 20-ի երեկոյեան ժամը 6:00-ին, Նոր Ջուղայի Հայ Մ. Մ. «Արարատ» միութեան մարզասրահում:

Թղթակից (Նոր Ջուղա) 

Նախաձեռնութեամբ Նոր Ջուղայի Հայ Մ. Մ. «Արարատ» միութեան Կենտ. վարչութեան, կազմակերպութեամբ Գարնանային խաղերի Կազմակերպիչ յանձնախմբի եւ համագործակցութեամբ նոյն միութեան բոլոր միաւորների, մարտի 20 առ 24-ը, տեղի են ունենալու Իրանահայ 32-րդ Գարնանային խաղերը:

 Խաղերի մեկնարկը տրւելու է երկուշաբթի` մարտի 20-ի երեկոյեան ժամը 6:00-ին, «Արարատ» միութեան մարզասրահում՝ բացման հանդիսաւոր միջոցառմամբ:

Գարնանային խաղերը յագեցած են լինելու մարզական մրցոյթներով, մշակութային միջոցառումներով, խաղերով եւ ժամանցային այլ ծրագրերով:

Մարզական մրցոյթների շարանում տեղի են ունենալու բասկետբոլի, ֆուտբոլի, սեղանի թենիսի եւ շախմատի մրցաշարեր, մասնակցութեամբ Նոր Ջուղայից, Թեհրանից, Շահինշահրից, Ուրմիաից եւ Շիրազից մարզական պատւիրակութիւնների:

Հարկ է նշել, որ խաղերի գլխաւոր ջահի բոցավառման արարողութիւնը տեղի է ունենալու ուրբաթ՝ մարտի 17-ի կէսօրին ժամը 1:30-ին, Ս. Ամենափրկիչ վանքում, նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի:

Թղթակից (Նոր Ջուղա) 

«ՀՈՒՍԿ» հասարակական կազմակերպութեան նախաձեռնութեամբ իրականացւած «Հայ Դատն այսօր» խորհրդաժողովի զեկուցաբեր՝ Հայաստանից հրաւիրւած, տարածքային անվտանգութեան հարցերով փորձագէտ Հրանտ Մելիք Շահնազարեանը, մարտի 6-ին այցելեց Նոր Ջուղա, որի ընթացքում իրականացրեց մի շարք հանդիպումներ եւ այցելութիւններ:

Պրն. Շահնազարեանը թեմի կառոյցին եւ գործունէութեան հետ ծանօթացաւ Սպահանի հայոց թեմի Պատգամաւորական ժողովի ատենապետ Նոէլ Մինասեանի հետ ունեցած հանդիպման ընթացքում. նա հանդիպեց նաեւ Նոր Ջուղայի Հայ Մ.Մ. «Արարատ» միութեան Կենտ. վարչութեան հետ:

Այցելութիւնների շրջագծում ներկայ գտնւեց՝ Ս. Ամենափրկիչ վանքի «Ներսէս Շնորհալի» գրադարան եւ Նոր Ջուղայի հայոց ազգ. դպրոցներ, ուր հանդիպեց տնօրէններին եւ ծանօթացաւ ուսումնական աշխատանքներին. այցելութիւններ կատարեց նաեւ Ս. Ամենափրկիչ վանքի «Ս. Յովսէփ Արիմաթացի» եկեղեցի ու թանգարաններ եւ Սպահանի այլ տեսարժան վայրեր:

Թղթակից (Նոր Ջուղա) 

Երեքշաբթի՝ մարտի 7-ի առաւօտեան, նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի եւ մասնակցութեամբ արժ. Տ. Խաչատուր քհնյ. Զարգարեանի ու դպրաց դասի ներկայացուցիչների, Արեւագալի ժամերգութիւն տեղի ունեցաւ Նոր Ջուղայի հայոց ազգ. ծերանոցում: Ընթացքում երգեցողութեամբ հանդէս եկաւ «Շուշանիկ» հոգեւոր երգչախումբը՝ ղեկավարութեամբ Անուշիկ Յովհաննիսեանի:

Ժամերգութեանը ներկայ էին ծեարնոցի բնակիչները, աշխատակազմը եւ այս հանգստեան տան կառավարիչ՝ Նոր Ջուղայի Հայ Կանանց Գթութեան միութեան մի շարք անդամուհիներ:

Սրբազան Հայրն օրւան պատշաճ իր խօսքում անդրադառնալով Արեւագալի ժամերգութեան խորհրդին՝ յատկապէս ընդգծեց, որ որպէս քրիստոնեաներ ոչ միայն խօսքով, այլ նաեւ մտածողութեամբ ու գործով պէտք է փառաբանենք Աստծուն. նա իր խօսքի շարունակութեան մէջ նշւած երեք միջոցներից առաւել կարեւորելով գործը, յորդորեց՝ որպէս իսկական հաւատացեալներ ուխտել, որ կեանքի մնացեալ ընթացքում մտածումով, խօսքով եւ գործով օրհնել եւ փառաբանել Աստծու անունը՝ Բարձրեալի ողորմութեանն ու շնորհներին արժանանալու համար:

Արարողութեան աւարտին՝ հիւրասիրութեան ընթացքում՝ Թեմակալ Առաջնորդ Սրբազան Հօրը եւ ժամերգութեան կազմակերպիչներին իր շնորհակալական խօսքն ուղղեց Ն.Ջ. Հայ Կանանց Գթութեան միութեան վարչութեան նախագահ Արմինէ Սիմոնեանը, ապա օրւան պատշաճ խօսքերով ու մաղթանքներով արտայայտւեցին արժ. Տ. Խաչատուր քհնյ. Զարգարեանն ու Անուշիկ Յովհաննիսեանը: Գերշ. Տ. Սիփան Ս. Եպս. Քէչէճեանը գովեստի խօսքերով հանդէս եկաւ՝ ուղղւած Կանանց Գթութեան միութեանը եւ արարողութեան իրականացման գործում դերակատարներին:

Թղթակից (Նոր Ջուղա) 

Շաբաթ՝ մարտի 4-ի երեկոյեան, Ս. Ամենափրկիչ վանքի Ծաղկեայ դահլիճում, նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի, հանդիպում իրականացւեց Հ.Յ.Դ. Հայաստանի Գերագոյն մարմնի ներկայացուցիչ եւ ՀՀ Ազգային ժողովում «Հայաստան» խմբակցութեան պատգամաւոր Իշխան Սաղաթէլեանի, նոյն խմբակցութեան պատգամաւոր Աննա Գրիգորեանի եւ Սպահանի հայոց թեմի Պատգամաւորական ժողովի ու Թեմական եւ Կրօնական խորհուրդների անդամների եւ շրջանի Հայ Դատի յանձնախմբի ներկայացուցիչների միջեւ:

Հանդիպումն սկիզբ առաւ թեմակալ Առաջնորդ Սրբազան Հօր ողջոյնի եւ բարիգալստեան խօսքերով: Ապա Սրբազան Հօր, Պատգամաւորական ժողովի, Թեմական եւ Կրօնական խորհուրդների ատենապետներ՝ Նոէլ Մինասեանի, Վրէժ Տէր-Մարտիրոսեանի եւ Զաւէն Սիմոնեանի միջոցով բացատրութիւններ տրւեցին թեմի պատմական անցեալի, պատկան ազգային մարմնի գործունէութեան եւ պարտականութիւնների վերաբերեալ:

Շարունակութեան մէջ Նոէլ Մինասեանը ազգային մարմինների անունից աւելացրեց, որ անհրաժեշտ է համահայկական կարեւոր օրակարգերի ուղղութեամբ ամրապնդել Հայաստան-Արցախ-Սփիւռք եռամիասնութիւնը եւ լիարժէք օգտագործել հայկական ներուժը՝ զերծ մնալով անհատական գործողութիւններից:

Պրն. Սաղաթէլեանը դրւատանքի խօսք ասելով համայնքի կազմակերպւածութեան, հայոց դպրոցներում մատուցւող ազգային դաստիարակութեան եւ ժողովրդի հայրենասիրութեան մասին՝ աւելացրեց, որ այն ինչ այստեղ տեսանք մեզ աւելի է պարտաւորեցնելու Հայաստանում մեր պայքարը շարունակելու համար: Նա նաեւ գովեստի խօսք ասաց առ այն, որ համայնքս բոլոր դժւարութիւններով հանդերձ, միշտ եղել է Հայաստանի եւ Արցախի կողքին:

Շրջանի Հայ Դատի յանձնախմբի ներկայացուցիչ Արբի Բաբայեանը նոյնպէս բարի գալստեան խօսք ասաց հիւրերին, ապա յայտնեց, որ հարաւային իրանահայութեան համայնքները ինչպէս այնցեալում, այուհետեւ եւս լինելու են Արցախի եւ Հայաստանի կողքին, յատկապէս ապազգային իշխանութեան գործողութիւնների դէմ մղւող գոյապայքարում։

Հանդիպման երկրորդ բաժնում Իշխան Սաղաթէլեանն ու Աննա Գրիգորեանը պատասխանեցին Արցախի եւ Հայաստանի իրավիճակին կապւող ներկաների հարցումներին:

Վերջում յուշանւէրներ նւիրւեցին հիւրերին:

Նշելի է, որ նոյն օրը առաւօտեան Իշխան Սաղաթէլեանը ընկերակցութեամբ Աննա Գրիգորեանի եւ ազգային մարմինների ու շրջանի Հայ Դատի յանձնախմբի ներկայացուցիչների, այցելեց Նոր Ջուղայի հայոց ազգ. դպրոցներ:

Թղթակից (Նոր Ջուղա) 

Նախաձեռնութեամբ շրջանի Հայ Դատի յանձնախմբի, ուրբաթ՝ մարտի 3-ի երեկոյեան, Նոր Ջուղայի Հայ Մ. Մ. «Արարատ» միութեան սրահում, հանդիսաւոր տօնակատարութեամբ նշւեց Հայ Յեղափոխական Դաշնակցութեան հիմնադրութեան 133-ամեակը: 

Երեկոյին ներկայ էին՝ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանը, Հ. Յ. Դ. Գերագոյն մարմնի ներկայացուցիչ Իշխան Սաղաթէլեանը, շրջանի Հայ Դատի յանձնախմբի անդամները, թեմի հոգեւորական դասի եւ ազգային մարմինների, միութիւնների եւ հայոց ազգ. դպրոցների ներկայացուցիչները, մի շարք այլ հրաւիրեալներ ու ժողովուրդ:  

Ծրագիրն սկիզբ առաւ յոբելեար կուսակցութեան քայլերգ «Մշակ Բանւոր»-ով, ապա բացման խօսքով հանդէս եկաւ հանդիսավար Մանիա Ղուկասեանը, ով իր խօսքի եզրափակիչ հատւածում կարեւորութեամբ նշեց. «Դաշնակցութիւնը շարունակելու է Հայ Դատի լուծման ուղղութեամբ իր պայքարը եւ ինչպէս միշտ իր բոլոր հնարաւորութիւններով պայքարելու է Ցեղասպանութեան ճանաչման ու մեր իրաւունքների ձեռքբերման ուղղութեամբ: Դաշնակցութիւնը պայքարեց Արցախի ազատութիւնը նւաճելու համար: 2020 թւականին, երբ ապաշնորհ ղեկավարութեան եւ իշխանութիւնների վարած դաւադիր քաղաքականութեան պատճառով կորցրինք հայկական աշխարհի այդ գողտրիկ շրջանի մի մասը, մեր կուսակցութիւնը չկորցրեց իր պայքարելու կամքը եւ  շարունակում է իր երթը վերջնական յաղթանակը ապահովելու համար»:

Այնուհետեւ բանախօսական ելոյթ ունեցաւ Իշխան Սաղաթէլեանը, ով իր խօսքն սկսեց հետեւեալ տողերով. «Դաշնակցութեան պատմութիւնը անհնար է տարնաջատել մեր ժողովրդի պատմութիւնից: Պայքարի ու անմնացորդ նւիրումի 133 տարիների ընթացքում Դաշնակցութիւնը հաւատարիմ է մնացել Հայաստանի ու հայութեան ազատագրութեան դատին ծառայելու իր առալքելութեանը»:

Շարունակութեան մէջ բանախօսն անդրադառնալով այսօրւայ պայմաններում Հայաստանի եւ Արցախի առջեւ ծառացած մարտահրաւէրներին, յատկապէս ընդգծեց, որ դրանք յաղթահարելու համար մեր ժողովրդին անհրաժշտ է կամք, հաւատք, ուժ եւ պայքար: Նա նշելով, որ Արցախեան 44-օրեայ պատերազմը փոխեց հայ ժողովրդի անցած 30 տարիների կեանքի ու արարումի տրամաբանութիւնը եւ Հայաստանում հակահայ ուժերի իշխանութեան գալով, ոչ միայն փոխւեց ժողովրդի ճակատագիրը, այլ նաեւ երկրի դարպասները բացւեցին թշնամու առջեւ, այսպէս աւելացրեց. «Մենք պէտք է ընտրութիւն կատարենք պետութիւնից հրաժարւելու կամ ամէն գնով մեր այդքան երազած պետականութիւնը պահպանելու, ծնկած ապրելու կամ ոտքի կանգնելու, յանձնւելու կամ պայքարելու միջեւ: Մէկտեղելով մեր ուժրը մենք ոչ միայն կարող ենք դիմագրաւել թշնամու հարւածներին, այլեւ կարող ենք դարձեալ վերածնւել, ինչպէս դա արել ենք բազմաթիւ անգամներ»:

Բանախօսն ընդգծելով, որ հայ ժողովրդին կենսական զիջումների գնալու համար՝ թշնամիները համոզում են, որ սպառւել են բոլոր ուժերը եւ այլեւս չկան՝ ուժ եւ հնարաւորութիւն պաշտպանւելու համար, աւելացրեց. «Մեր համազգային կարեւորագոյն ուժը մշտապէս եղել է Հայաստան-Արցախ-Սփիւռք եռամիասնութեան ապահովման մէջ: Երբ մենք կարողացել ենք ապահովել այս եռամիասնութիւնը, ստացել ենք բոլոր մարտահրաւէրներին դիմագրաւելու ուժը: Դա հայ ժողովրդի միասնականութիւնն է: Միասնականութիւն ոչ թէ անձերի, այլ հայրենիքը պաշտպանելու գաղափարի շուրջ»: Նա նաեւ աւելացրեց, որ Հայաստանն այս պայքարում միայնակ չէ եւ ունի դաշնակիցներ, որոնց հետ համընկնում է իր ստրադեգական շահերը. այդ դաշնակիցների թւում է Իրանի Իսլամական Հանրապետութիւնը, որն իր յայտարարութիւններով ու գործողութիւններով դրական եւ կաեւոր ազդեցութիւն է ունեցել տարածաշրջանը ապակայունացնող ուժերի զսպման գործում։

Նա որպէս ուժի հսկայական աղբիւր նշեց՝ Արցախում չյանձնւող 120 հազարանոց բնակչութիւնը, Հայաստանում միլիոնաւոր քաղաքացիներ, ովքեր դէմ են Արցախը Ադրբեջանի կազմում լինելուն եւ սփիւռքահայութեան մեծ հատւածը, որոնք ամէն կերպ իրենց զօրակցութիւնն են ցուցաբերում հայրենիքին, ապա անդրադառնալով Դաշնակցութեան վճռորոշ դերակատարութեանը այս գոյապայքարում, աւելացրեց. «Մենք պէտք է ապացուցենք, որ ժողովուրդն է այն գործօնը, որը կարող է փոխել իրավիճակը: Մենք Հայաստանում, Արցախում եւ Սփիւռքում աւելի լայն թափով, նոր մօտեցումներով պէտք է շարունակենք մեր աշխատանքները մեր հայրենակիցների հետ. բացատրենք մեզ սպասւող վտանգները եւ համախմբենք ողջ հայ ժողովրդի կարող ուժերը… Դաշնակցութիւնը յարատեւ պայքարի կուսակցութիւն է. դաշնակցականները պայքարի համար զինւորագրւած եւ պայքարով ապրող տեսակ են: Մենք աննահանջ շարունակելու ենք մեր պայքարը ի պաշտպանութիւն Հայաստանի եւ Արցախի եւ ի բարեկեցութիւն հայ ժողովրդի»:

Տօնակատարութեան գեղարւեստական բաժնում ազգային-յեղափոխական երգերի կատարմամբ հանդէս եկաւ «Դումահ» խումբը՝ երգեցողութեամբ Վահան Վարդեւանեանի եւ նւագակցութեամբ՝ Շանթ Սարեանի (լիդ գիթար), Կարէն Դիլանչեանի (ռիթմ գիթար), Սերգէյ Փանոսեանի (բաս գիթար) եւ Էրւին Յովսէփեանի (հարւածային գործիքներ), իսկ ասմունքներով հանդէս եկան Հ.Յ.Դ. «Թադէոս Թադէոսեան» պատանեկան միութեան անդամներ՝ Վանէ Յովսէփեանն ու Մենուա Մարկոսեանը:

Թղթակից (Նոր Ջուղա) 

Հ.Յ.Դ. անդամ եւ ՀՀ Ազգային ժողովի «Հայաստան» խմբակցութեան պատգամաւոր Քրիստինէ Վարդանեանը, ով որպէս բանախօս Ացախին զօրակցութեան հանրահաւաքին մասնակցելու համար եռօրեայ այցով ժամանել էր Նոր Ջուղա, նշւած ժամանակաշրջանում ունեցաւ մի շարք այցելութիւններ եւ հանդիպումներ, որոնց համառօտ անդրադառնում ենք:

Չորեքշաբթի՝ փետրւարի 22-ի առաւօտեան, այցելեց հայոց ազգ. Մանկապարտէզ-նախակրթարան, «Արմէն» տարրական եւ «Քանանեան-Կատարինեան» միջնակարգ երկսեռ դպրոցներ. նշւած բոլոր հանդիպումների ընթացքում նա ծանօթացաւ դպրոցների աշխատանքներին եւ հնարաւորութիւններին, ինչպէս նաեւ հանդիպում ունեցաւ տնօրէնութիւնների հետ:

Նոյն օրը, երեկոյեան այցելեց Նոր Ջուղայի Հայ Մ. Մ. «Արարատ» միութիւն, որտեղ կազմակերպւել էր հանդիպում մասնակցութեամբ՝ Ն. Ջ. Հայ Կանանց Գթութեան միութեան, Ն. Ջ. Հայուհեաց Բարեգործական ընկերութեան եւ Հայ Ուս. «Չհարմահալ» միութեան Նոր Ջուղայի մասնաճիւղի վարչութիւնների, Փերիոյ Կրթ. միութեան եւ Ն. Ջ. Հայ Մ. Մ. «Արարատ» միութեան Կենտ. վարչութիւնների եւ իհարկէ վերջինիս միաւորների ու Շահինշահրի մասնաճիւղի վարչութիւնների: 

Վերոնշեալ հանդիպման ընթացքում Քրիստինէ Վարդանեանն անդրադարձ ունեցաւ Արցախում եւ Հայաստանում ստեղծւած իրավիճակներին, Սփիւռքի համայնքների տրամադրութեանն ու ապագայ անելիքներին, իսկ աւարտին պատասխանեց ներկաներին յուզող հարցերին: Այս հանդիպմանը հիւրին ընկերակցում էր Արցախին զօրակցութեան յանձնախմբի նախագահ Զօրիկ Յովսէփեանը։ 

Հինգշաբթի՝ փետրւարի 23-ի առաւօտեան, «Ս. «Ամենափրկիչ» վանքում հանդիպեց Արցախին զօրակցութեան յանձնախմբի անդամներին, որտեղ նախ տեղեկութիւններ փոխանցւեցին, ապա մտքեր փոխանակւեցին ուրբաթ առաւօտեան կայանալիք հանրահաւաքի ծրագրի շուրջ, այնուհետեւ Թեմական խորհրդի գրասենեակում հանդիպում իրականացւեց ազգային մարմինների ներկայացուցիչների հետ՝ նախագահութեամբ թեմակալ Առաջնորդ գերշ. Տ. Սիփան Ս. Եպս. Քէչէճեանի եւ մասնակցութեամբ՝ Թեմական խորհրդի ատենապետ եւ փոխ-ատենապետ՝ Վրէժ Տէր-Մարտիրոսեանի ու Վաչիկ Հայրապետեանի, Կրօնական խորհրդի ատենապետ Զաւէն Սիմոնեանի եւ Ազգային առաջնորդարանի դիւանապետ Արիս Դաւթեանի: 

Այս հանդիպման ընթացքում քննարկումներ ընթացան Հայաստանի եւ Արցախի ներքաղաքական իրավիճակի շուրջ եւ ազգայինները բացատրութեամբ հանդէս եկան համայնքի տրամադրութեան մասին՝ 2020 թւականի նոյեմբերի 9-ից սկսեալ: Հանդիպման աւարտին Քրիստինէ Վարդանեանին նւիրւեց «Պատմութիւն Նոր Ջուղայի» գիրքը։

Հարկ է նշել, որ Քրիստինէ Վարդանեանը նշւած ժամանակաշրջանում այցելել է նաեւ հայոց ազգ. ծերանոց եւ Ազգային առաջնորդարանի թանգարաններ:

Թղթակից (Նոր Ջուղա)