ՀՀ ՎԱՐՉԱՊԵՏԻ ԱՅՑԸ ԿՆՊԱՍՏԻ ՏՆՏԵՍԱԿԱՆ ՀԱՄԱԳՈՐԾԱԿՑՈՒԹԵԱՆ ԱԿՏԻՒԱՑՄԱՆԸ. ԻՐԱՆԻ ԱՌԱՋԻՆ ՓՈԽՆԱԽԱԳԱՀ

Աղբիւր՝ www.yerkirmedia.am

ՀՀ վարչապետ Կարէն Կարապետեանն Իրանի Իսլամական Հանրապետութեան առաջին փոխնախագահ Էսհաղ Ջահանգիրիի հրաւէրով պաշտօնական այցով ժամանել է Իրան: Ինչպէս տեղեկացրին ՀՀ կառավարութեան տեղեկատւութեան եւ հասարակայնութեան հետ կապերի վարչութիւնից, վարչապետ Կարապետեանի գլխաւորած պատւիրակութիւնն ուղեւորւել է ԻԻՀ թագաւորական «Սաադաբադ» պալատ, որտեղ կայացել է Կարէն Կարապետեանի եւ Էսհաղ Ջահանգիրիի հանդիպում-առանձնազրոյցը:

Վարչապետը բարձր է գնահատել բարեկամ Իրանի հետ ձեւաւորւած սերտ, բարիդրացիական յարաբերութիւնները, որոնք շարունակում են զարգանալ փոխվստահութեան մթնոլորտում: «Լիայոյս եմ, որ այս հանդիպումից յետոյ մենք նոր շունչ կը հաղորդենք մեր համագործակցութեանը եւ մեր օրակարգում գտնւող բոլոր ծրագրերին: Տնտեսական համագործակցութեանն անդրադառնալով` պէտք է նշեմ, որ այն զգալիօրէն զիջում է մեր երկրների միջեւ առկայ բարձր մակարդակի քաղաքական երկխօսութեանը: Սակայն աւելի քան վստահ եմ, որ կարող ենք նոր յաջողութիւններ արձանագրել մեր համագործակցութեան տնտեսական հարթութիւնում»,- նշել է Կարէն Կարապետեանը:

ԻԻՀ առաջին փոխնախագահ Էսհաղ Ջահանգիրիին վստահութիւն է յայտնել, որ վարչապետ Կարապետեանի պաշտօնական այցը կնպաստի տնտեսական համագործակցութեան էլ աւելի ակտիւացմանն ու ընդլայնմանը:

ՀՀ վարչապետն ու Իրանի նախագահի առաջին տեղակալը երկկողմ տնտեսական օրակարգի կարեւոր ծրագրերից են համարել Իրան-Հայաստան 400 կվ լարման էլեկտրահաղորդման 3-րդ գծի կառուցման ծրագիրը, որը հնարաւորութիւն կը տայ աւելացնել երկու երկրների միջեւ էլեկտրաէներգիայի եւ գազի փոխանակման ծաւալները` նպաստելով թէ երկրների միջեւ տնտեսական յարաբերութիւնների զարգացմանը, թէ այս բնագաւառում տարածաշրջանային համագործակցութեան ընդլայնմանը: Կողմերը մեծապէս կարեւորել են նաեւ Մեղրիի Հէկ-ի ծրագրի իրականացումը: Իրան-Հայաստան տնտեսական, առեւտրային յարաբերութիւնների զարգացման համար նշանակալի է համարւել «Սիւնիք ազատ տնտեսական գօտու» դերը, վերջինիս եւ իրանական «Արաս» ազատ գօտիների համագործակցութիւնը:

Կարէն Կարապետեանի եւ Էսհաղ Ջահանգիրիի առանձնազրոյցին յաջորդել է ընդլայնւած կազմով հանդիպումը, որի ընթացքում քննարկւել են տարբեր ոլորտներում համագործակցութեան հեռանկարները:

Անդրադարձ է կատարւել Հայաստան-Իրան-Թուրքմէնստան եռակողմ էներգետիկ համագործակցութեանը: Վարչապետ Կարապետեանը տեղեկացրել է, որ ՀՀ կառավարութիւնը նախաձեռնել է Հայաստան-Իրան սահմանային անցակէտի արդիականացման ծրագիրը:

ԿարԷն Կարապետեանն Էսհաղ Ջահանգիրիին պաշտօնական այցով հրաւիրել է Հայաստան, ինչը սիրով ընդունւել է:

 

Մեկնաբանութիւն գրել


Security code
Թարմացնել

 
Persian   Armenian

Ֆոտօռեպորտաժ

Տեսաֆիլմ