«ԱՆՀՐԱԺԵՇՏ Է ԿԱՐԵԼԻ ՓՈՒԹՈՎ ԼՈՒԾՄԱՆ ՄԻ ԳՈՐԾԸՆԹԱՑ ՃՇՏԵԼ ՍԻՐԻԱԿԱՆ ՏԱԳՆԱՊԻՆ»

 

Աղբիւր՝ www.armenianorthodoxchurch.org

 

Չորեքշաբթի՝ յունւարի 15-ին առաւօտեան, Ն.Ս.Օ.Տ.Տ. Արամ Ա Կաթողիկոսը բացումը կատարելով Եկեղեցիների համաշխարհային խորհրդի կազմակերպած Ժնեւ-2 ժողովի համար կայացող համագումարի, կարեւորութեամբ շեշտեց յիշեալ համագումարի վճռական կարեւորութիւնն ամբողջ Միջին արեւելքի համար:  Վեհափառ Հայրապետն ասաց. «Եթէ Ժնեւ-2 ժողովը դրական արդիւնք չունենայ, նրա հետեւանքները կարող են աննախատեսելի լինել ամբողջ Միջին արեւելքի համար, եւ նոյնիսկ՝ դրանից այն կողմ»: Ապա Վեհափառ Հայրապետն աւելցրեց. «Ա՛յս պատասխանատւութեամբ պէտք է մեր մասնակցութիւնը բերենք այս ժողովին եւ աւելին՝ սովորական յայտարարութիւն պէտք չէ կատարենք, այլ՝ յստակ մի ուղեցոյց ճշտենք, այն փոխանցելու համար Ժնեւ-2 ժողովի պատասխանատուներին»:

Խօսելով Եկեղեցիների համաշխարհային խորհրդի կազմակերպած ներկայ համագումարի մասին, Վեհափառ Հայրապետը շեշտեց հետեւեալ երեք կէտերի կարեւորութիւնը.- ա) Հաւաքական քրիստոնէական մօտեցում ճշտել սիրիական տագնապի լուծման, բ) Մեր փորձառութիւնները եւ հայեցակէտերը բաժնել իրար, ինչպէս նաեւ արեւմտեան աշխարհի հետ, գ) Միասնաբար որոնել Ժնեւ-2 ժողովին մեր բերելիք նպաստը, որ պէտք է լինի ազդու, գործնական ու յստակ: 

Ապա Վեհափառ Հայրապետն ասաց. «Հարկ է, որ մեր մօտեցումը լինի իրապաշտ՝ հեռու մնալով զգացական, միակողմանի ու քաղաքական մօտեցումներից: Այլ խօսքով՝ պէտք է կարեւորութեամբ շեշտել Ժնեւ-2 ժողովին մեր բերելիք նպաստի իւրայատկութիւնը»: Մեկնելով իր կատարած այս հաստատումից, Նորին Սրբութիւնը շեշտեց հետեւեալ երկու կէտերը.- ա) Անհրաժեշտ է կարեւորութեամբ ընդգծել, թէ սիրիական տագնապը կարելի չէ զէնքի ուժով լուծել, այլ՝ բանակցութեամբ, բ) Անհրաժեշտ է, որ բանակցութեանը մասնակցեն կառավարութիւնը, ընդդիմութիւնը եւ բոլոր համայնքների պատասխանատուները: 

Համագումարի բացմանը նաեւ խօսք առաւ Եկեղեցիների համաշխարհային խորհրդի ընդհանուր քարտուղարը, որ իր կարգին պարզեց խորհրդի կատարած աշխատանքները՝ սիրիական տագնապի սկզբից ի վեր, յատկապէս մարդասիրական մարզում: Յայտնենք, որ համագումարին մասնակցում են պատրիարքներ եւ եկեղեցիների ներկայացուցիչներ: Մեծի տանն Կիլիկիոյ կաթողիկոսութեան կողմից իրենց մասնակցութիւնը են բերում գերշ. Տ. Սեպուհ արքեպս. Սարգիսեանը եւ տկն. Թենի Սիմոնեանը, իսկ Ամենայն հայոց կաթողիկոսութեան կողմից՝ գերշ. Տ. Վիգէն արքեպս. Այւազեանը: Մասնակցում են նաեւ Ռուսիոյ, Ամերիկայի, Գերմանիոյ, Ֆրանսայի, Անգլիոյ եւ այլ եկեղեցիների պաշտօնական ներակայացուցիչները:


Մեկնաբանութիւն գրել


Security code
Թարմացնել

 
Persian   Armenian

Ֆոտօռեպորտաժ

Տեսաֆիլմ