Հ.Հ. ՍՓԻՒՌՔԻ ՆԱԽԱՐԱՐՆ ԸՆԴՈՒՆԵԼ Է Ե.Ա.Հ.Կ.-Ի ԿՈՂՄԻՑ ՊԱՏՒԻՐԱԿՈՒԹԵԱՆԸ

 

Աղբիւր՝ www.mindiaspora.am

 

Ապրիլի 15-ին Հ.Հ. Սփիւռքի նախարարի պաշտօնակատար Հրանուշ Յակոբեանն ընդունել է Ե.Ա.Հ.Կ.-ի գործող նախագահի Հարաւային Կովկասի հարցերով յատուկ ներկայացուցիչ Անջելօ Գնեդինգերի գլխաւորած պատւիրակութեանը: Հանդիպմանը մասնակցում էին նաեւ Հ.Հ. Սփիւռքի նախարարութեան աշխատակազմի ղեկավար Ֆիրդուս Զաքարեանը եւ «Սիրիահայերի հիմնախնդիրները համակարգող կենտրոն» հասարակական կազմակերպութեան նախագահ Լենա Հալաջեանը:

Հանդիպման ընթացքում Հ.Հ. Սփիւռքի նախարարի պաշտօնակատար Հրանուշ Յակոբեանը ներկայացրեց Սիրիայի քաղաքացիական պատերազմի հետեւանքով Հայաստան տեղափոխւած հայերի հիմնախնդիրների լուծման ուղղութեամբ Հ.Հ. իշանութիւնների դիրքորոշումն ու իրականացրած ծրագրերը: Մասնաւորապէս, նախարարն անդրադարձաւ սիրիահայերին աջակցելու նպատակով Հ.Հ. իրաւական ակտերում Սփիւռքի նախարարութեան նախաձեռնութեամբ իրականացւած փոփոխութիւններին, կրթութեան, առողջապահութեան, գործարարութեան ոլորտներում, ինչպէս նաեւ՝ աշխատանքով եւ կացարաններով ապահովելու ուղղութեամբ տարւող աշխատանքներին:

Հ.Հ. Սփիւռքի նախարարի պաշտօնակատարն անդրադարձաւ նաեւ Սիրիայում եւ յատկապէս հայաբնակ վայրերում տիրող ծանր իրավիճակին, մասնաւորապէս Քեսաբի խնդրին՝ յաւելելով, որ վտանգւած է քաղաքացիների, այդ թւում՝ հայութեան ֆիզիքական գոյութիւնը:

Ե.Ա.Հ.Կ.-ի գործող նախագահի Հարաւային Կովկասի հարցերով յատուկ ներկայացուցիչ Անջելօ Գնեդինգերին իր խօսքում նշեց, որ տպաւորւած է Հ.Հ. Սփիւռքի նախարարութեան կողմից իրականացւող աշխատանքների ծաւալով:  Անջելօ Գնեդինգերը կարեւորեց Հ.Հ. Սփիւռքի նախարարութեան հետ համագործակցութիւնը եւ յոյս յայտնեց, որ այն այսուհետեւ եւս արդիւնաւէտ կը լինի:

Հանդիպման աւարտին Հ.Հ. Սփիւռքի նախարարի պաշտօնակատար Հրանուշ Յակոբեանը նշեց, որ սիրիական թնջուկում միջազգային կազմակերպութիւնների դերը շատ կարեւոր է, եւ շնորհիւ այդ կազմակերպութիւնների՝ կը կարողանանք հասնել տարածաշրջանում խաղաղութեան հաստատմանը: