«Միասնութիւն՝ աhա գրաւականը յաղթանակի» նշանաբանի ներքոյ, թւականիս մարտի 20-ի ժամը 20:00-ին, Նոր Ջուղայի Հայ Մ. Մ. «Արարատ» միութեան մարզասրահում տեղի ունեցաւ իրանահայ 31-րդ Գարնանային խաղերի հանդիսաւոր բացումը, ներկայութեամբ՝ պաշտօնական հրաւիրեալների, իրանահայ երեք թեմերից մասնակցած մարզական պատւիրակութիւնների, միութենականների եւ հոծ բազմութեան:

 Ներկաներին հայերէն եւ պարսկերէն լեզուներով ողջունեց եւ բացման խօսքով հանդէս եկաւ հանդիսավարուհի՝ Մանիա Ղուկասեանը, որից յետոյ միութեան Սկաուտական միաւորի Արի-Արենուշ հատւածների ներկայացուցիչների մասնակցութեամբ կատարւեց դրօշակի արարողութիւնը եւ ներկաների յոտնկայս ունկնդրութեամբ հնչեց Իրանի Իսլ. Հանրապետութեան օրհներգը։ Ապա տեղի ունեցաւ բասկետբոլի եւ սեղանի թենիսի ճիւղերում հրաւիրեալ մարզական պատւիրակութիւնների խանդավառ տողանցք-շքերթը մասնակցութեամբ՝ Թեհրանի Հայ Մշակութային «Արարատ» կազմակերպութեան (Հ.Մ.Ա.Կ) եւ նոյն կազմակերպութեան Թաւրիզի մասնաճիւղի, Հայ Մ. «Նայիրի», Հայ Ուսումնասիրաց Չհարմահալ, Հայ Մ. «Սարդարապատ», Հայ Մ. «Սիփան», Հայ Մ. «Րաֆֆի» համալիրի եւ Ն. Ջուղայի հայ Մ. Մ. «Արարատ» միութեան Շահինշահրի մասնաճիւղի։ Տողանցքից յետոյ ցուցադրւեց մարտի 15-ին Ս. Ամենափրկիչ վանքում տեղադրւած Սրբոց նահատակաց յուշարձանի առջեւ կայացած ջահավառութեան արարողակարգից պատրաստւած տեսանիւթը, ապա անսալով խաղերի նշանաբանին, միութեան Մարզական միաւորի բոլոր մարզիկները, գլխաւորութեամբ պատկան մարզաճիւղից ընտրւած ջահակիր մարզիկ-մարզուհիների, ջահերով մուտք գործեցին դահլիճ։ Խմբերի ներկայացուցիչ ջահակիրներն էին Մարտունի Խաչիկեանը, Ադրիան Ծատուրեանը, Վանանդ Շիրւանեանը, Մարինէ Մկրտչեանը, Նարէ Ղարախանեանը, Նինել Մարկոսեանը, Անիշա Խաչեանը, Արինէ Ղազարեանը եւ Վահէ Յարութիւնեանը։ Այս բաժնին յաջորդեց գլխաւոր ջահակիրների խմբի մուտքը, որին մաս էին կազմում Վանէ Յովսէփեանը, Մինելիա Մարկոսեանը, Արամէ Մինասքանեանը եւ Լուսինէ Ասատրեանը, ովքեր ընթացիկ տարւայ ընթացքում յաջողութիւններ էին արձանագրել երկրի մակարդակում։ Խմբերի ներկայացուցիչների ջահերով վառւեց գլխաւոր ջահակիր՝ բասկետբոլիստուհի՝ Լուսինէ Ասատրեանի ջահը, որով նա բոցավառեց 31-րդ Գարնանային խաղերի խորհրդանշական կրակը: 

Կենտրոնական վարչութեան ողջոյնի խօսքն ընթերցեց հանդիսավարուհին, ով ներկայացնում էր նաեւ միութեան Կենտրոնական վարչութիւնը: Խօսքում մէջբերւած էր. «Այսօր մեկնարկելու է իրանահայ 31-րդ Գարնանային խաղերը, նշանաբան ունենալով՝ «Միասնութիւն՝ ահա գրաւականը յաղթանակի»։ Շուրջ եօթ տասնամեակներ առաջ միութենական ոգով տոգորւած անհատների միասնականութեան արդիւնքում կերտւեց այս միութիւնը, ապա՝ շուրջ երեք տասնամեակներ առաջ՝ Գարնանային խաղերը: Այսօր՝ 31-րդ Գարնանային խաղերի մեկնարկին, անսալով խաղերի նշանաբանին, անհրաժեշտ է աւելի քան երբեք լինել միասնական՝ ժամանակի դժւարութիւնները յաղթահարելու եւ նոր յաղթանակներ արձանագրելու համար:  Գարնանային այս խաղերի անցկացման նպատակն է՝ մարզական կեանքի վերելքին նպաստելը, մարզական հմտութիւնները կատարելագործելը, ինչպէս նաեւ մարզիկների համար ստեղծել միջավայր՝ միմեանց հետ առաւել շփւելու, երիտասարդութեանը հայեցի դաստիարակութիւն տալու եւ նրանց մէջ միասնականութեան ոգին սերմանելու համար»։

Յաջորդիւ մարզիկների եւ իրաւարար կազմի ներկայացուցիչներ՝ Շարա Ծատուրեանի եւ Անայիս Խուդավերդեանի միջոցով կատարւեց երդման կարգը։

Ծրագրի պաշտօնական բաժնի աւարտին Սպահանի հայոց թեմի առաջնորդ Գերշ. Տ. Սիփան եպս. Քէչէճեանը հանդէս եկաւ Հայրական պատգամով: Ահա մի հատւածի մէջբերում.«Խաղերի կարգախօսը կերպարանափոխւած արտայայտութիւնն է մեր գրականութեան մէջ իւրայատուկ տեղ գտած ամրակուռ այն ճշմարտութեան, որ ապագայատեսիլ, իրապաշտ ու հանճարեղ մի մտքի արտայայտութիւնն է ՝որպէս դեղ ու դարման մեր յուսալքւած ժողովրդի էական, անհրաժեշտ ու հրամայական փրկութեան։ Որպէս ազգ, բոլորս էլ ոչ միայն մտածում ենք կամ ընդունում, այլեւ հաւատում ենք, որ մեր փրկութիւնն ու գոյատեւումը մեր միութեան ու միասնականութեան մէջ է կայանում, եւ այդ միութիւնն ու միասնութիւնը մեր փոքր տարիքից կամ մանուկ հասակից պէտք է ճամբւի մեզ որպէսզի նրա աւիշով թրծւենք եւ մեր հաւատարմութիւնը սկսենք կերտել ազգի ու հայրենիքի նկատմամբ: Արդ եթէ այս է պայմանը, ուրեմն պէտք է նաեւ սրա վայրն ու ենթահողը։ Այս բոլոր պահանջերի լաւագոյն ամբողջացումն է կազմակերպւած «Գարնանային խաղերը», որն իր արդար ու անաչառ հրաւէրով փորձում է հաւաքել եւ իմի բերել իրանահայ երեք թեմերից մեր մարզիկներին, հայկական դաստիարակիչ մթնոլորտի մէջ, մարզական ոգով, ջրտուքը կատարելու միութեան, միասնութեան, սիրոյ, յարգանքի ու եղբայրութեան արմատների»։

Գեղարւեստական յայտագիրը սկիզբ առաւ Վանա Շիրւանեանի «Սուէյ» երգով, որին միութեան «Կռունկ» պարախմբի անդամներ Ելենա Մանուկեանը եւ Քրիստինէ Յակոբեանը ընկերակցեցին ժապաւէնի շարժումներով պարով։ Երգը համադրւած էր նոյն եղանակի վրայ՝ Ռիմա Սիմոնեանի եւ Կարին Տէր-Մարտիրոսեանի հեղինակած Նոր Ջուղայի եւ Գարնանային խաղերի գովքը կատարող ստեղծագործութեան հետ։ Գեղարւեստական բաժնում Թեհրանից հրաւիրւած Քառոլին Խուդադադեանը հանդէս եկաւ միստիկական պտոյտներով պարերով՝ առաջինը նւիրւած Կոմիտասի ծննդեան 150-ամեակին «Ալ այլուղ» երաժշտութեան եւ երկրորդը Արա Գէորգեանի «Արցախ» ստեղծացործութեան ներքոյ։ Հարմա Կարապետեանը, Վանա Շիրւանեանը, Վանանդ Իսաղուլեանը եւ Լալագէ Իսաղուլեանը հանդէս եկան «Shape of you», «recarnation», «lady gaga» եւ «sia» խմբական երգերով։

Երեկոն եզրափակւեց «Կռունկ» պարախմբի «Շողոտ-շաղոտ» երգի ներքոյ պարային համարով: 

 Նշելի է, որ հնգօրեայ մարզական փառատօնը իրականացաւ Նոր Ջուղայի Հայ Մ. Մ. «Արարատ» միութեան Կենտրոնական վարչութեան նախաձեռնութեամբ, 31-րդ Գարնանային խաղերի կազմակերպիչ յանձնախմբի կազմակերպութեամբ եւ միութեան Մարզական, Մշակութային, Երէցների, Սկաուտական եւ Ուսանողական միաւորների, Կարգապահական կազմի ու մի շարք անհատների անշահախնդիր համագործակցութեամբ։

 

 ***

Մարտի 24-ի երեկոյեան, Նոր Ջուղայի Հայ Մ. Մ. «Արարատ» միութեան հանդիսութիւնների դահլիճում, կայացաւ Իրանահայ Գարնանային 31-րդ խաղերի սեղանի թենիս մարզաճիւղի մեդալաբաշխման հանդիսութիւնը: 

 Նւաճած մեդալները, գնահատագրերը եւ գաւաթները յանձնեցին Միութեանս Կենտրոնական վարչութեան ներկայացուցիչ՝ Ադրինէ Խաչատրեանը, Մարզական միաւորի վարչութեան ներկայացուցիչներ՝ Սերժիկ Մինասքանեանը եւ Էդնա Փուլադեանը եւ 31-րդ Գարնանային խաղերի կազմակերպիչ յանձնախմբի ներկայացուցիչներ՝ Ռոբերտ Սիմոնեանը եւ Սեւադա   Պետրոսեանը:

Հանդիսութիւնը իր խրախուսական ներկայութեամբ պատւել էր Միութեանս արտօնատէր Թաթուլ Օհանեանը:   

Հանդիսութիւնը վարեց Վանա Շիրւանեանը: 

 

***

Մարտի 25-ի երեկոյեան, Նոր Ջուղայի Հայ Մ. Մ. «Արարատ» միութեան մարզասրահում տեղի ունեցաւ  իրանահայ Գարնանային 31-րդ խաղերի փակումը՝  բասկետբոլի մարզաճիւղի յաղթողների մեդալաբաշխման հանդիսութեամբ։

Մեդալաբաշխմանը ներկայ էին «Ֆուլադ Մոբարաքէ Սեփահան» մարզամշակութային ակումբի տնօրէն՝ Մասուդ Թաբեշը, Միութեանս արտօնատէրեր՝ Թաթուլ Օհանեանը եւ Այլին Մելիքեանը, Ազգային մարմինների եւ Հայ Դատի յանձնախմբի ներկայացուցիչները,  մարզիկները, միութենականներ  եւ մարզասէր  հասարակութիւնը:

Ծրագրի սկզբում հանդիսավարուհի՝ Վանա Շիրւանեանը շնորհակալական խօսք ուղղեց խաղերի կազմակերպիչներին եւ մասնակից միութիւնների  պատւիրակութիւններին ու իրաւարար կազմին, ապա  տեղի ունեցաւ մրցանակաբաշխումը: Նւաճած մեդալները, գաւաթները եւ գնահատագրերը յանձնեցին միութեան արտօնատէր եւ Սպահանի Հայոց թեմի Պատգ. ժողովի ատենապետ՝ Թաթուլ Օհանեանը, Թեմական խորհրդի ատենապետ՝ Վարուժ Մինասեանը, միութեան Կենտրոնական վարչութեան նախագահ՝ Զարեհ Յովսէփեանը եւ անդամներ՝ Էդւարդ Ղազարեանը, Լորետա Դաւթեանը, Ադրինէ Խաչատրեանը եւ Մանիա Ղուկասեանը, Մարզական միաւորի վարչութեան նախագահ՝ Վահիկ Ծատուրեանը եւ անդամներ՝ Արթուր Խաչիկ Գրիգորեանը, Անահիտ Սարհադեանը, 31-րդ Գարնանային Խաղերի կազմակերպիչ յանձնախմբի նախագահ՝ Արթին Վարդանեանը եւ անդամներ՝ Արսինէ Մանսուրեանը եւ Անիտա Քալանթար-Օհանեանը:

     

Խաղերի ընդհանուր պատասխանատուն էր Էդւարդ Ղազարեանը, իսկ կազմակերպիչ յանձնախմբի անդամներն էին՝ Արթին Վարդանեանը, Ռոբերտ Սիմոնեանը, Արսինէ Մանսուրեանը, Անիտա Քալանթար-Օհանեանը, Լալագէ Իսաղուլեանը, Վանէ Մինասեանը, Թանիա Մինասեանը, Սեպուհ Վարդանեանը եւ Սեւադա Պետրոսեանը։ Կենտրոնական վարչութեան եւ յանձնախմբի կապ էր նշանակւած Ադրինէ Խաչատրեանը։

 

 Ն. Ջ. Հայ Մ. Մ. «Արարատ» միութեան

 թղթակից Երանուշ Թահմազեան

 Լուսանկարները՝ հեղինակի եւ Գեւիկ Խաչատրեանի