ԻՐԱՆԱՀԱՅ ՊԱՐԻ ԱՌԱՋԻՆ ՓԱՌԱՏՕՆ, ՆՒԻՐՒԱԾ ՝ՍՐԲՈՑ ԹԱՐԳՄԱՆՉԱՑ ԵՒ ՀԱՅ ՄՇԱԿՈՅԹԻ ՏՕՆԵՐԻՆ

Սրբոց Թարգմանչաց եւ հայ Մշակոյթի տօների նշման ձեռնարկների շարանում, ուրբաթ՝ հոկտեմբերի 26-ի երեկոյեան, Նոր Ջուղայի Հայ Մ. Մ. «Արարատ» միութեան հանդիսութիւնների դահլիճում, ներկայութեամբ Մշակութային եւ համայնքային գծով Իրանում Հայաստանի Հանրապետութեան դեսպանատան խորհրդական՝ Էդւարդ Խաչատրեանի, Ազգային մարմինների ներկայացուցիչների, հոգեւորականաց դասի, հրաւիրեալների եւ հոծ բազմութեան, կայացաւ Իրանահայ պարի առաջին փառատօնը: Ձեռնարկի նախաձեռնողն ու կազմակերպողը նոյն միութեան Մշակութային միաւորի վարչութիւնն էր, որին մասնակցութիւն էին բերել Իրանի երեք թեմերում գործող միութիւնների ու մասնաւոր պարախմբերի ներկայացուցիչները: 

Բացման եւ ողջոյնի խօսքով հանդէս եկաւ հաղորդավարուհի Մանիա Ղուկասեանը, ով նշեց. «Փառատօնների կազմակերպումը, յատկապէս երբ դա կրում է համահայկական եւ համաիրանական բնոյթ, մեծ նշանակութիւն եւ կարեւորութիւն ունի հասարակութեան մշակութային կեանքում եւ արւեստի զարգացման գործընթացում, խթան է հանդիսանում զգաստացման եւ նորարարութեան եւ կատարելագործման ձգտման: Իսկ մեր պարագային գլխաւոր նպատակն է իրանահայ համայնքների երիտասարդութեան համախմբումը եւ միմեանց հետ շփումը…։ Նոր Ջուղայի «Արարատ» միութիւնը իր հիւրընկալ դռներն է բացել իրանահայ արւեստի ոլորտի երիտասարդների առջեւ, նպատակ ունենալով միասնաբար տօնախմբելու մեր գոյութեան եւ լինելութեան իմաստը հանդիսացող հայոց հրաշափառ տառերի գիւտը՝ Թարգմանչաց տօնը»: 

Բացման խօսքից յետոյ հիւրընկալ միութեան «Կռունկ» թիւ 2 պարախումբը ներկաներին ողջունեց «Սասուն»-ի աւանդական պարով, ինչը շարունակւեց Թեհրանի, Թաւրիզի եւ Նոր Ջուղայի պարախմբերի թւով 16 պարային համարների ելոյթներով, որոնք արժանացան հանդիսատեսի երկարատեւ ծափողջոյններին։ Միջոցառման ընթացքում հանդիսավարները համառօտ տեղեկութիւններ փոխանցեցին իւրաքանչիւր խմբի հիմնադրման, ծաւալած աշխատանքների ու ձեռքբերումների մասին, եւ իւրաքանչիւր խմբին նւիրեցին իրենց անւանը կապւող բանաստեղծական կտորներ:

Յայտագրում նախատեսւել էր նաեւ վերջերս կեանքից հեռացած աշխարհահռչակ երգիչ եւ դերասան Շառլ Ազնաւուրին նւիրւած մի բաժին, որտեղ հաղորդավարների միջոցով հնչեցին գեղեցիկ խօսքեր շնորհալի հայի մասին եւ ներկաները նրա յիշատակը յարգեցին երգչի պատկերի ներքոյ ծափահարութիւնով։ Շաղիկ Մատթէոսեանը ասմունքեց «Բոհեմ»-ի հայերէն թարգմանութիւնը, ապա Հարմա Կարապետեանը կատարեց Ազնաւուրի «Բոհեմ» երգը, ինչը ուղեկցւեց միութեանս «Կռունկ» պարախմբի անդամուհի՝ Նազէ Ասատրեանի համահունչ պարով: 

 Յաջորդիւ ձեռամբ ՀՀ դեսպանատան ներկայացուցիչ՝ Էդւարդ Խաչատրեանի, Սպահանի Հայոց թեմի Պատգ. Ժողովի եւ միութեանս արտօնատէր՝ Թաթուլ Օհանեանի, Կենտրոնական վարչութեան նախագահ՝ Զարեհ Յովսէփեանի եւ Մշակութային միաւորի «Կռունկ» ասմունքի խմբի ղեկավար եւ մշակութային վաստակաւոր գործիչ՝ Ռիմա Սիմոնեան-Օհանեանի, ծաղիկներ, գնահատագրեր եւ յուշանւէրներ յանձնւեցին փառատօնին մասնակից՝ Թեհրանի «Ակունք» պարային համոյթի գեղարւեստական ղեկավար եւ պարուսոյց՝ Կարինէ Մանուչերեանին, Թեհրանի Հ.Մ.Մ. «Րաֆֆի» համալիրի «Անի» պարախմբի գեղարւեստական ղեկավար եւ բեմադրիչ՝ Արտեօմ Նալբանդեանին, Փերիոյ Կրթասիրաց Միութեան Ն. Ջուղայի մասնաճիւղի «Էրեբունի» պարախմբի գեղարւեստական ղեկավար եւ պարուսոյց՝ Ալինա Գրիգորեանին, Թեհրանի «Կակաչ» պարախմբի գեղարւեստական ղեկավար՝ Արուս Սարգսեան-Աւագեանին, Թեհրանի Հ.Մ.Մ. «Նայիրի» Միութեան «Նայիրի» պարախմբի գեղարւեստական ղեկավար՝ Արտաւազդ Աւետիսեանին եւ պարուսոյց Մելան Սեֆեանին, Թեհրանի Հայ Մշակութային «Սիփան» Միութեան «Սիփան» պարախմբի գեղարւեստական ղեկավար՝ Լոռետա Աւետիսեանին, Հայ Օգնութեան Միութեան Թաւրիզի մասնաճիւղի «Տաթեւ» պարախմբի գեղարւեստական ղեկավար եւ պարուսոյց՝ Կարինէ Մանուչերեանին, Ն. Ջուղայի Հ.Մ.Մ. «Արարատ» Միութեան մշակութային միաւորի «Կռունկ» պարախմբի գեղարւեստական ղեկավար եւ պարուսոյց՝ Նունէ Մկրտչեանին եւ տւեալ պարախմբերի փորձավարներին, իսկ մասնակից միութիւնները եւ պարախմբերը իրենց շնորհակալութիւնները եւ շնորհաւորանքները յայտնեցին ծաղկեկողով եւ յուշանւէրներ յանձնելով, որից յետոյ բեմ հրաւիրւեցին պարախմբերի անդամ-ուհիները: 

 Երեկոյի եզրափակիչ խօսքը վերապահւած էր միութեան արտօնատէր՝ Թաթուլ Օհանեանին, ով բարձր մակարդակով իրականացւած Իրանահայ պարի առաջին փառատօնը, պարախմբերի մասնակցութիւնը եւ մանաւանդ ՀՀ դեսպանատան ներկայացուցչի ներկայութիւնը համարեց պատւաբեր մի իրադարձութիւն՝ Նոր Ջուղայի եւ կազմակերպիչ միութեան համար: Պրն. Օհանեանը բարձր գնահատեց նաեւ մեծ հայի՝ Շառլ Անզնաւուրի յիշատակին նւիրւած բաժինը, ապա բնութագրելով պարարւեստը, որպէս ազգերի մշակոյթի մի մասնիկ եւ մարդկային յոյզերի ու ապրումների դրսեւորման կարեւորագոյն միջոցներից մէկը, բարձր գնահատեց շնորհալի երիտասարդների կատարումները՝ բոլոր առումներով:

 Պրն. Օհանեանը նաեւ իր գնահատանքի եւ շնորհակալական խօսքերը ուղղեց բոլոր մասնակիցներին, ի մասնաւորի միութիւնների ու պարախմբերի ղեկավար կազմերին, որոնք ընդառաջելով հրաւէրին մասնակցեցին այս գեղեցիկ միջոցառմանը եւ ի վերջոյ շնորհակալական խօսք ուղղեց հանդիսատեսին, ով իր ներկայութեամբ եւ խրախուսական ծափողջոյններով գնահատեց եւ արժեւորեց երեկոն: 

 Նշելի է, որ երեկոյի ընթացքում ընթերցւեց Ատրպատականի հայոց թեմի առաջնորդ գերշ. Տ. Գրիգոր եպս. Չիֆթչեանի շնորհաւորանքի ուղերձը՝ համաիրանական Պարի առաջին փառատօնի կապակցութեամբ:

 Երեկոյի հաղորդավարներն էին միութեան «Կռունկ» ասմունքի խմբի անդամներ՝ Մանիա Ղուկասեանը, Սօսէ Ասատրեանը, Վանանդ Իսաղուլեանը եւ Շաղիկ Մատթէոսեանը: 

 

 Ն. Ջ. Հայ Մ. Մ. «Արարատ» միութեան 

 Թղթակից՝ Երանուշ Թահմազեան

 Լուսանկարիչ՝ Գեւիկ Խաչատրեան

 
 

 

 

 


Մեկնաբանութիւն գրել


Security code
Թարմացնել

 
Persian   Armenian

Ֆոտօռեպորտաժ

Տեսաֆիլմ