Ն. Ջ. ՀԱՅ Մ. Մ. «ԱՐԱՐԱՏ» ՄԻՈՒԹԵԱՆ ՇԱՀԻՆՇԱՀՐԻ ՄԱՍՆԱՃԻՒՂԻ ՆՈՐԱԿԱՌՈՅՑ ԿԵՆՏՐՈՆԱՏԵՂԻԻ ԲԱՑՄԱՆ ՀԱՆԴԻՍՈՒԹԻՒՆ

Ուրբաթ՝ 2017 թ. նոյեմբերի 3-ի երեկոյեան ժամը 7:30-ին, Շահինշահրում տեղի ունեցաւ Նոր Ջուղայի Հայ Մարզա-Մշակութային «Արարատ» միութեան Շահինշահրի մասնաճիւղի նորակերտ կենտրոնատեղիի բացման հանդիսութիւնը՝ ներկայութեամբ Սպահանի հայոց թեմի թեմակալ առաջնորդ Տ. Սիփան ծ. վրդ. Քէչէճեանի, Շահինշահրի հոգեւոր տեսուչ Տ. Անանիա ծ. վրդ. Գուճանեանի, Տ. Սահակ քհնյ. Մինասեանի, Իսլամական խորհրդարանում Սպահանի եւ հարաւային իրանահայութեան պատգամաւոր Ժորժիկ Աբրահամեանի, թեմի ազգային իշխանութեան մարմինների եւ ենթամարմինների ներկայացուցիչների եւ հոծ թւով հայորդիների: 

Ամենասկզբում տեղի ունեցաւ բացման արարողութիւնը թեմակալ առաջնորդի եւ համայնքի հոգեւոր տեսուչի ձեռամբ եւ ազգայինների մասնակցութեամբ:

Ողջոյնի խօսքով հանդէս եկաւ օրւայ հանդիսավար Մարիա Խուդավերդեանը, ով բեմ հրաւիրեց Թեմական խորհրդի ատենապետ Վարուժ Մինասեանին: Պրն. Մինասեանն իր խօսքում հակիրճ ներկայացնելով նորակերտ շէնքի կառուցման հանգամանքները՝  ընդգծեց համայնքում միութենական կեանքի աշխուժացման   անհրաժեշտութիւնը, որը սերտօրէն կապւած է ժամանակակից յարմարութիւններով օժտւած համալիրի, որտեղ  իրենց միութենական ստեղծարար գործունէութեամբ եւ խոհեմ ընթացքով զարկ կը տան համայնքի անդամները:

Նոր Ջուղայի Հայ Մարզա-Մշակութային «Արարատ» միութեան վարչութեան խօսքն արտայայտեց նախագահ Մասիս Մինասեանը, ով իր խօսքում  նշեց.

«Այսօր անկիւնադարձային մի նոր էջ է բացւում Սպահանի հայոց թեմի եւ Շահինշահրի հայ համայնքի պատմութեան մէջ: Շահինշահրում համայնքային, մարզա-մշակութային, սկաուտական եւ ուսանողական կեանքի բոլոր ոլորտներում հնարաւորութիւնների ընդլայնումը, նրանց ակտիւ աշխատանքը, անխախտելիօրէն կապւած էր յարմարաւէտ մի տարածք  ունենալուն: Սպահանի հայոց թեմի ազգային մարմինները իրենց գործունէութեամբ ձեռնամուխ եղան այս դժւար, սակայն կարեւոր եւ անխուսափելի աշխատանքի իրականացմանը: Անցել ենք երկար ճանապարհ եւ այսօր վայելում ենք այդ կատարած աշխատանքի արդիւնքն ու արդէն իսկ միասնաբար համախմբւած ենք հարազատ այս յարկի՝ Նոր Ջուղայի Հայ Մարզա-Մշակութային «Արարատ» միութեան Շահինշահրի մասնաճիւղի նորակառոյց շէնքում»: 

Մասնաճիւղի վարչութեան անունից Արիս Դաւթեանը իր անհուն հրճւանքն ու անսահման երջանկութիւնը յայտնեց՝ համայնքի անդամների վաղեմի երազանքն ու բուռն ցանկութիւնը իրականացած տեսնելով, որն էր՝ համայնքում ունենալ մարզա-մշակութային յարմարաւէտ եւ նորօրեայ կենտրոնատեղի, որտեղ  անշուշտ պէտք է կենտրոնանան համայնքի ազգային եւ մարզա-մշակութային աշխատանքները՝ յօգուտ հայ համայնքի կեանքի աշխուժացման ու բարգաւաճման: Նա իր երախտագիտական խօսքն ուղղեց ազգային իշխանութեանը՝ օրէնսդիր եւ գործադիր մարմիններով հանդերձ, որոնք նոր կենտրոնատեղին կառուցելու ուղղութեամբ չխնայեցին որեւէ ճիգ ու ջանք եւ շարունակ հովանաւորեցին եւ սատար հանդիսացան այդ կարեւոր նախագիծը գործադրւելու աշխատանքին: 

Այնուհետեւ իր խօսքում շնորհակալութիւն յայտնեց Ն. Ջ. Հայ Մ. Մ. «Արարատ» միութեան բոլոր շրջանների վարչութիւններին, որոնք միշտ բարեցակամութեամբ իրենց նիւթա-բարոյական հովանաւորութիւնն են ցուցաբերել մասնաճիւղին:

Որպէս օրւայ հանդիսութեանն աւելի փայլ ու բուրմունք հաղորդող՝ իրենց գեղեցիկ երգ ու ասմունքով հանդէս եկան համայնքի Հ. Ազգ. «Սրբոց Վարդանանց» դպրոցի աշակերտ-ուհիները՝ երգուսոյց Նարբէ Տ. Գրիգորեանի գլխաւորութեամբ եւ Նոր Ջուղայի Հայ Մարզա-Մշակութային «Արարատ» միութեան Մշակութային միաւորի «Կռունկ» պարախումբը ղեկավարութեամբ՝ պարուսոյց Նունէ Մկրտչեանի:

Մասնաճիւղի վարչութիւնը օրւայ առիթը պատեհ համարելով, թեմակալ առաջնորդի ձեռամբ գնահատագրեր յանձնեց Թեհրանի Համահայկական 49-րդ շրջանի խաղերին մասնակցած եւ յաջողութիւններ արձանագրած մարզիկ-ուհիներին:

Ծրագրի պաշտօնական բաժնի աւարտին բեմ հրաւիրւեց թեմակալ առաջնորդն՝  իր հայրական պատգամն արտայայտելու համար: 

Թեմակալ առաջնորդը բարձր գնահատելով օրւայ ելոյթը եւ հնչած արտայայտութիւնները յայտնեց. «Մեր բոլորի աղօթքները փափագների եւ իղձերի հետ միախառնւեցին եւ բարձրացան առ Աստւած եւ այդ աղօթքներին որպէս պատասխան Աստւածային օրհնաբեր լոյս ծագեց  երկնքից  եւ այդ լոյսի կենտրոնի պրիսմակը զետեղւեց Շահինշահրի այս կենտրոնում, ուր տարիներ առաջ հիմնօրհնէքը կատարւեց եւ ահա այս երեկոյ հայկական այս շքեղ, փառապանծ ապարանքի բացումը կատարեցինք: Եւ այս ապարանքին մուտք գործող իւրաքանչիւր հայորդի իրաւունք ունի իրեն զգալու դրա թագաւորը եւ իշխանը»:

Թեմակալ առաջնորդը եզրափակեց իր սրտի խօսքը՝  շնորհաւորելով թեմի ազգային իշխանութեանը, միութեան սեփականատիրոջը, «Արարատ» միութեան թէ Կենտրոնական եւ թէ մասնաճիւղի վարչութիւններին, ազգայիններին, ղեկավարներին, եւ մանաւանդ Շահինշահրի համայնքին ու հայորդիներին այս գեղեցիկ կենտրոնն ունենալու առիթով: Իր իւրայատուկ շնորհակալական եւ մանաւանդ երախտագիտական խօսքն ուղղեց թեմի ազգային իշխանութեանը, յատկապէս Պատգամաւորական ժողովին, որ իր հետեւողական աշխատանքով փորձեց խթանել այս աշխատանքը, Թեմական խորհրդին, որ ամբողջօրէն նեցուկ  կանգնեց «Արարատ»-ի շրջանային վարչութեանը, ինչպէս նաեւ Շահինշահրի Հայ համայնքի վարչութեանը, որի համագործակցութեան շնորհիւ ի կատար ածւեց այս գործը եւ այսօր կարողացանք վայելել նրա համեղ պտուղը: Նա իր խօսքում ընդգծելով Շահինշահրի հայ համայնքի հոգեւոր տեսուչ Տ. Անանիա ծ. վրդ. Գուճանեանի անգնահատելի դերն ու հեղինակութիւնը համայնքի անդամներին ի մասնաւորի երիտասարդներին ճիշտ ուղղորդելու գործում՝  բարձր  գնահատեց Հայր Սուրբի ցուցաբերած հովանաւորութիւնը : 

Այնուհետեւ օրւայ հանդիսավարը  շնորհակալութիւն յայտնեց գեղարւեստական բաժնի բոլոր կատարողներին, պատասխանատուներին, ծրագրի իրականացման գործընթացում իրենց անվերապահ աջակցութիւնը ցուցաբերած բոլոր մարմիններին եւ անհատներին:

Օրւայ հանդիսութիւնը եզրափակւեց ջերմ մթնոլորտում կազմակերպւած պատշաճ հիւրասիրութեամբ:

 
 
 
Ն. Ջ. Հայ Մ. Մ. «Արարատ» Միութեան
Շահինշահրի Մասնաճիւղի Թղթակից՝ Վ. Յարութիւնեան
Լուսանկարիչ՝ Գեւիկ Խաչատրեան
 
 


Մեկնաբանութիւն գրել


Security code
Թարմացնել

 
Persian   Armenian

Ֆոտօռեպորտաժ

Տեսաֆիլմ