ՊԵՏԱԿԱՆ ՄԱՐՄԻՆՆԵՐԻ ԵՒ ՊԱՏՒԻՐԱԿՈՒԹԻՒՆՆԵՐԻ ԱՅՑԵԼՈՒԹԻՒՆ՝ ԱՄԱՆՈՐԵԱՅ ԵՒ Ս. ԾՆՆԴԵԱՆ ՏՕՆԵՐԻ ԱՌԻԹՈՎ

Կիրակի՝ 2017 թւականի յունւարի 15-ի յետմիջօրէի ժամը 3:00-ին, «Սրբոց Վարդանանց» դպրոցի շրջափակում Շահինշահրի հայ համայնքի պատասխանատուներին այցելեցին Շահինշահրի ուրբաթօրեայ աղօթապետը, գաւառապետի քաղաքական տեղակալը, քաղաքապետը ընկերակցութեամբ՝ գաւառապետարանի եւ քաղաքապետարանի բարձրաստիճան պաշտօնատարների եւ քաղաքի խորհրդի նախագահի ու անձնակազմի:

Դպրոցի սրահում  հիւրերին ընդունեցին համայնքի հոգեւոր տեսուչ գերպ. Տ. Անանիա ծ. վրդ. Գուճանեանը, Տ. Սահակ քհնյ. Մինասեանը եւ Հայ Համայնքի Վարչութեան անդամները:

Վարչութեան անունից բարիգալստեան խօսքով հանդէս եկաւ պրն. Արիս Դաւթեանը, ով Քրիստոսի Ծնունդն ու Աստւածայայտնութեան խորհուրդը գեղեցկօրէն ներկայացնելով՝ շնորհակալութիւն յայտնեց քաղաքի պատասխանատուներին իրենց կատարած Ամանորեայ այցելութեան առթիւ եւ խօսքը  փոխանցեց ուրբաթօրեայ աղօթապետին: Աղօթապետը շնորհաւորելով Ամանորը եւ Ս. Ծնունդը՝ իր գոհունակութիւնն յայտնեց Աստծուն՝ իսլամ եւ քրիստոնեայ ժողովուրդների միջեւ փոխադարձ սէր ու յարգանք եւ միաբանութիւն հաստատելու համար: Նա շեշտեց, որ նոյնիսկ իրաւական ատեաններում եւ դատարաններում, ոչ մի խտրականութիւն չկայ՝ երկու միաստւածեան կրօնների հետեւորդների միջեւ եւ համահաւասար պաշտպանւում է իւրաքանչիւր իրանահպատակի դատն ու իրաւունքը:

Յաջորդիւ ելոյթ ունեցաւ Գերպ. Հայր Սուրբը, ով եւս իր հերթին իր ուրախութիւնը յայտնեց պետական բարձրաստիճան պաշտօնէութեան եւ պատասխանատուների այցելութեան առթիւ՝  այն որակելով որպէս պետութեան եւ փոքրամասնութիւնների միջեւ փոխյարգանքի ու համագործակցութեան դրսեւորումներից մէկը: Հայր Սուրբն իր խօսքում արտայայտեց. «Աշխարհի ոչ մի անկիւնում այսպիսի սէր ու փոխյարգանք չկայ համատեղ ապրող ժողովուրդների միջեւ եւ Իրանի Իսլամական Հանրապետութիւնը որպէս սիրոյ խորհրդանիշ՝ մարդկանց ապահովութիւն է ներշնչում: Չնայած տարածաշրջանում Ամերիկայի եւ Իսրայէլի սադրանքներին ու եղբայրասպան պատերազմներ հրահրելու եւ սերմանելու նենգ ջանքերին՝ Իրանը միշտ տարածաշրջանում հաստատել է խաղաղութիւն եւ եղբայրութիւն եւ ամէն ջանք ի սպաս է դրել նմանատիպ նենգութիւնները չէզոքացնելու ուղղութեամբ: Ուստի որտեղ սիրով, յարգանքով եւ վստահութեամբ են միացել ժողովուրդները՝ չարն անզօր է այդ անդորրը խափանելու գործում եւ չարաչար պարտւած է:» Հայր Սուրբն օրհնելով բոլոր պատասխանատուներին՝ մաղթեց նրանց ոյժ, կորով, եռանդ եւ առողջութիւն:

Այնուհետեւ հերթաբար արտայայտւեցին քաղաքապետ պրն. Ամիրին, քաղաքի խորհրդի տնօրէն պրն. Բիդրամը եւ գաւառապետի տեղակալը, որոնցից իւրաքանչիւրն ըստ արժանւոյն բարձր գնահատեց հայ համայնքին որպէս օրինապահ, ազնիւ ու յանձնառու քաղաքացիներ՝  երկրի բարգաւաճմանը համագործակցելու եւ երկրում կազմակերպւող ընտրութիւններին ակտիւօրէն մասնակցելու համար:

Օրւայ առիթով կազմակերպւել էր հիւրասիրութիւն, որը վայելեցին ներկաները զարդարւած դահլիճում՝ ջերմ ու հիւրընկալ մթնոլորտում: Աւարտին Հայ Համայնքի Վարչութիւնը յուշանւէրներ յանձնեց բոլոր հիւրերին: Իսկ քաղաքապետարանի կողմից Վարչութեանը նւիրւեց մի գեղեցիկ տօնածառ:

Հայ Համայնքի Վարչութեան Թղթակից՝
Վ. Յարութիւնեան
 

Մեկնաբանութիւն գրել


Security code
Թարմացնել

 
Persian   Armenian

Ֆոտօռեպորտաժ

Տեսաֆիլմ