Սրբազան պաշտպանութեան շաբաթւայ առթիւ շնորհաւորանք փոխանցելու նպատակով, երեքշաբթի՝ 2020 թւականի սեպտեմբերի 22-ին, Սրբազան պաշտպանութեան արժէքների պահպանման եւ տարածման Սպահան նահանգի գլխաւոր տնօրէն գեներալ Շիռւանեանը Ազգային առաջնորդարանում հանդիպում ունեցաւ Սպահանի հայոց թեմի առաջնորդ Տէր Սիփան եպս. Քէչէճեանի, Թեմական խորհրդի ատենապետ Վարուժ Մինասեանի եւ դիւանապետ Արիս Դաւթեանի հետ:

Գեներալ Շիռւանեանը նախ ներկայացրեց Սրբազան պաշտպանութեան շաբաթւայ առթիւ գերատեսչութեան նախատեսած ծրագրերը, այնուհետեւ Թեմակալ առաջնորդին հրաւիրեց այցելելու «Սրբազան պաշտպանութեան այգի-թանգարան» եւ մասնակցելու Իրան-Իրաք պարտադրեալ պատերազմի հայ նահատակներին նւիրւած կրպակի բացմանը:

Հանդիպման ընթացքում խօսւեց նաեւ նահատակ Հրաչ Յակոբեանի դին գտնւելու ու նրա թաղման կարգի մասին եւ որոշւեց մօտ ապագայում աւելի մանրամասնօրէն քննարկել այդ հարցը: